Çoxları üçün məsum görünən bir əyləncə növü var - qəlyan. Azərbaycanda qəlyan son illər xeyli populyarlaşıb. Bir çox kafe, restoran müxtəlif qəlyan növləri təklif etməklə müştərilərinin sayını artırmağa çalışır.
Bir çox insan qəlyanı zərərsiz hesab etsə də, ekspertlər əksini iddia edirlər. Elə bu səbəbdən də bir çox ölkədə qəlyan satışı və istifadəsi qadağan olunub. Analoji qərar bu günlərdə ölkəmizdə də tətbiq olundu. Məlumdur ki, son zamanlar bütün dünya koronavirusdan əziyyət çəkir.
Nazirlər Kabinetinin yanında Operativ qərargahın yaydığı məlumatda qeyd olunur ki, koronavirus (COVİD - 19) infeksiyasının tənəffüs damcıları ilə birbaşa təmas yolu ilə ötürüldüyü və yuxarı tənəffüs yollarının infeksiyası kimi təzahür etdiyi nəzərə alınaraq, ölkə ərazisindəki bütün ictimai iaşə obyektlərində çoxdəfəli istifadə üçün nəzərdə tutulmuş qəlyan avadanlıqlarından istifadə qadağan edilir.
Qadağaya baxmayaraq, Bakıdakı bəzi kafelər hələ də qəlyandan istifadə edirlər. Bakı Şəhər İcra Hakimiyyətinin Ticarət və Xidmət Departamenti rayon polis idarələri ilə birgə paytaxtın ictimai iaşə obyektlərində, kafe və restoranlarında qəlyan çəkilməsinin qarşısının alınması məqsədilə keçirilən reyd zamanı pozuntular aşkar olunub. Məlumat üçün bildirək ki, neqativ hallar Səbail rayonu, İçərişəhərdəki "Museum İnn" otelinin kafesində, Nəsimi rayonu, Süleyman Rüstəm küçəsi 11 ünvanındakı "Pafos" Karaoke Sinema Klubda, Cavadxan küçəsindəki "Korona" kafesində, Nəsimi rayonundakı "Badam" çay evində, Sabunçu rayonunda "MM" çay evində, Suraxanı rayonu, Yeni Günəşli qəsəbəsi, "Çardaq" kafesində aşkar edilib.
Maraqlıdır, qadağaya əməl etməyən iaşə obyektlərini nə kimi cəza gözləyir?
“Cəriməyə rəğmən, tətbiq olunmuş qadağaya məhəl qoymayan kafelərin fəaliyyəti dayandırılmalıdır”
Sosial sahə üzrə mütəxəssis İlqar Hüseynli “Bakı-Xəbər”ə açıqlamasında qeyd etdi ki, dövlət tərəfindən müəyyən olunmuş qadağaya əməl etməyən iaşə obyektlərinin sahibləri sərt şəkildə cəzalandırılmalıdırlar: “İlk olaraq həmin kafelər müəyyən məbləğdə cərimələnməlidirlər. Cəriməyə rəğmən, tətbiq olunmuş qadağaya məhəl qoymayan kafelərin fəaliyyəti dayandırılmalıdır. Məlumdur ki, bu qadağa koronavirusla mübarizə üçün tətbiq olunub. Bu xəstəlik də nəfəs yolu ilə keçir. Danılmaz faktdır ki, qəlyan, eyni zamanda, yoluxucu xəstəliklərin yayılmasına səbəb olur. Gün ərzində qəlyandan onlarla insan istifadə edir, ağızlığı və suyu nə qədər dəyişdirilsə də, dumanın keçdiyi boru dəyişmir. Bu səbəbdən də nəfəs yolu ilə xəstəliklərin keçməsi qaçılmaz olur. Xəstə insanın qəlyandan istifadə etməsi mikroorqanizmlərin o boruya yerləşməsinə və sağlam birini yoluxdurmasına səbəb olur”.
Günel CƏLİLOVA
