Hələ koronavirus təhlükəsi ölkəmizin sərhədlərinə yetişmədiyi və yalnız Çində yayıldığı ilkin dövrdən etibarən Azərbaycan apteklərində tibbi maska və spirt qıtlığı meydana çıxmağa başladı. Paytaxt apteklərinin bir çoxunda tibbi maskaların defisit olması bir yana, qiymət artımı da baş verdi. 10 qəpiyə satılan maskanın qiyməti birdən-birə qalxıb 1 manat 10 qəpik oldu. Hətta iş o yerə çatdı ki, Prezident İlham Əliyev ölkədə qəsdən maska, spirt qıtlığı yaradan möhtəkirlərə sərt mesajlar verdi.
Bəli, hansısa möhtəkirlər, işbazlar koronavirusdan öz şəxsi bizneslərini genişləndirmək üçün istifadə edirlər. Bu faktdır. Prezidentin iradından sonra bir müddət maska və spirt sarıdan elə də korluq olmasa da, yenidən apteklər əhali üçün bu problemi yaratmaqdadırlar. Hazırda apteklərdə ucuz maskalar yoxdur. Burada qiyməti 3 manat 90 qəpik, bir qədər də ondan baha olan maskalar satılır. Hansı aptekdən “maska varmı” deyə soruşduqda cavab verirlər ki, ucuz maskalar qurtarıb, yalnız 4 manatlıq maskalar var. Həmin 4 manatlıq maskaların isə qiyməti bəzi apteklərdə 3 manat 70 qəpik, bəzilərində 3 manat 90 qəpik, digərlərində isə 4 manatdır. Apteklər deyirlər ki, ucuz maskalar saat 15-də gəlir və gələn kimi də satılır.
Onu da vurğulayaq ki, apteklər əsasən vətəndaşa cəmi 5 ədəd maska, spirti də limitlə satırlar. Sözsüz ki, qiyməti 3 manatdan baha olan tibbi maskanı isə almaq çox vətəndaşın maliyyə imkanları xaricindədir. Apteklər iddia edirlər ki, aidiyyəti dərman şirkətləri, depolar onlara bu vasitələri xüsusi sayla verirlər, bu da vətəndaşların tələbatını ödəmir. Apteklər “tövsiyə” edirlər ki, vətəndaş bahalı maska alsın, onu ən azı bir-iki həftə istifadə edə bilsin.
40 qəpiyə olan spirtin bu gün qiyməti 60-70 qəpikdir. O da tapılsa.
Qeyd edək ki, bir çox ölkədə dərman biznesi ilə məşğul olan şirkətlər, eləcə də iri aptek şəbəkələri şəhərdə əhaliyə pulsuz maska və spirt paylayırlar. Bizdə isə nəinki paylayırlar, hətta satışdan belə yığışdırırlar.
Paytaxt apteklərindən tibbi maskalar və spirt yenə hara yoxa çıxıb? Doğrudanmı apteklərə aidiyyəti şirkətlərdən məhdud sayda maska və tibbi spirt verilir?
Məsələ ilə bağlı “Avromed” şirkətinin və TƏBİB-in mövqeyini öyrənməyə çalışdıq.
Rəvanə Əliyeva: “Apteklərin TƏBİB-ə aidiyyəti yoxdur”
Tibbi Ərazi Bölmələrini İdarəetmə Birliyinin (TƏBİB) mətbuat xidmətinin rəhbəri Rəvanə Əliyeva “Bakı-Xəbər”ə bildirdi ki, TƏBİB apteklərə nəzarət etmir və bu səbəbdən də yaranan problemə qurum tərəfindən hər hansı bir açıqlama verilə bilməz: “Apteklərin hər hansı dərman vasitələri, yaxud hansısa tibbi vasitələrlə təmin edilməsi TƏBİB-in səlahiyyətinə aid deyil. Qurum yalnız TƏBİB-in tabeliyində olan tibb müəssisələrinin təminatı ilə məşğuldur. Ümumiyyətlə, apteklərin TƏBİB-ə aidiyyəti yoxdur”.
“Avromed” şirkətinin əməkdaşı isə “Siz telefon nömrənizi saxlayın, əməkdaşlarımız sizin sorğunuza bir azdan cavab verəcək” desə də...
“Avromed” şirkətindən isə “Bakı-Xəbər”ə bildirdilər ki, sualımıza tezliklə cavab veriləcək: “Siz telefon nömrənizi saxlayın, əməkdaşlarımız sizin sorğunuza bir azdan cavab verəcək”.
Lakin gün ərzində şirkət bizimlə əlaqə saxlamadı, biz yenidən dəfələrlə şirkətə məxsus (055) 20843 29, 30, (012) 514 5577 telefon nömrələrinə zəng vursaq da, yalnız avtobələdçinin “sizi operatora bağlayırıq” cavabını eşitdik, operator isə cavab vermədi. Bu üzdən də apteklərdə ucuz tibbi maskanın və tibbi spirtin hansı səbəbdən qəhətə çıxmasının səbəblərini öyrənə bilmədik. Bəzi apteklər bildirirlər ki, tibbi maska problemi yaxın 1-2 gün ərzində öz həllini tapacaq.
Ekspertlər isə hesab edirlər ki, apteklərdə bu halın yaşanması yenə də möhtəkirlərin meydanda olduğuna dəlalət edir.
İradə SARIYEVA
