Məlum olduğu kimi, Ümumdünya Səhiyyə Təşkilatı (ÜST) tərəfindən koronavirus infeksiyasının (COVİD-19) qlobal pandemiya elan olunduğunu nəzərə alaraq, Azərbaycan ərazisində virusun yayılmasının qarşısını almaq məqsədilə “ASAN Viza” elektron portalı vasitəsilə 45 gün müddətinə vizaların rəsmiləşdirilməsi dayandırılıb. Azərbaycana səfər etmək istəyən xarici ölkə vətəndaşlarının viza rəsmiləşdirilməsi üçün ölkəmizin müvafiq səfirlik və baş konsulluqlarına müraciət etmələri xahiş olunur. Bu barədə Nazirlər Kabinetinin yanında Operativ qərargahdan bildirilib.
Verilən məlumatda qeyd olunub ki, Azərbaycan Respublikasının səfirlik və baş konsulluqlarının konsulluq xidməti xüsusi rejimdə fəaliyyət göstərəcək: “ÜST-nin təqdim etdiyi siyahıya əsasən, xüsusilə COVİD-19 virusunun geniş yayıldığı ölkələrin vətəndaşlarından viza rəsmiləşdirilməsinə müraciət edərkən COVİD-19 testindən keçmələri barədə tibbi arayış da tələb olunacaq. Bu şərtlər son 14 gün ərzində həmin ölkələrdə olmuş digər əcnəbi vətəndaşlara da şamil olunacaq. Azərbaycan vətəndaşlarının yaxın iki ay müddətinə xüsusi zərurət olmadığı təqdirdə xarici ölkələrə səfərlərdən çəkinmələri ciddi şəkildə tövsiyə olunur”.
Onu da qeyd edək ki, Nazirlər Kabinetinin yanında Operativ qərargah koronovirusla mübarizə ilə bağlı bir sıra qərarlar qəbul edib. Azərbaycan və İran arasında sərhədin müvəqqəti bağlanması barədə fevralın 29-da qərar qəbul edib. Martın 12-də verilən qərarara görə, Azərbaycan və İran sərhədi daha iki həftə bağlı qalacaq. Qərar ÜST tərəfindən COVİD-19 koronavirus infeksiyasının qlobal pandemiya elan olunduğunu nəzərə alaraq verilib. Digər tərəfdən, koronavirus infeksiyasının aşkarlanması üçün karantin 14-29 gün müddətinə müəyyən edilib. Ölkədə koronavirusa yoluxma hallarının müəyyənləşdirilməsi ilə əlaqədar müvafiq xəstəxanalar ayrılıb və karantin zonaları yaradılıb. Çin, Almaniya və digər ölkələrlə aparılan danışıqlar nəticəsində lazımi avadanlıqların, preparatların, mütəxəssislərin Azərbaycana gətirilməsi üçün müvafiq razılaşma əldə olunub.
Bununla yanaşı, Operativ qərargah təhsil müəssisələrində tədrisin martın 27-dək dayandırılması ilə bağlı qərar verib. İctimai yerlərdə mütəmadi olaraq dezinfeksiya işləri aparılır və s.
Bütün bu görülən tədbirlərin əhəmiyyətini ekspertlər necə necə dəyərləndirirlər?
“Belə qərarlar koronavirusla bağlı potensial risqlərin önlənməsində önəmli rol oynayacaq”
Məsələyə münasibət bildirən ekspert Rəsul Cahangirlinin sözlərinə görə, Nazirlər Kabinetinin yanında Operativ qərargahın gördüyü bu kimi tədbirlər zəruri əhəmiyyət kəsb edir: “Nəzərə almaq lazımdır ki, koronavirus dünya miqyasında geniş problemə çvrilib. Bir sıra dövlətlər bunun fəsadlarını azaltmaq üçün müxtlif tədbirlər görürlər. Kütləvi tətbirlər, idman yarışları təxirə salınır. Azərbaycan elə bir coğrafi məkanda yerləşir ki, burada bir sıra qabaqlayıcı tədbirlərin görülməsi zəruri idi. Nəzərə almaq lazımdır ki, Azərbaycan coğrafi baxımdan Qərblə Şərqi birləşdirən körpüdür. Azərbaycan mühüm tranzit rola malikdir. O baxımdan ölkədə bir sıra məhdudlaşdırıcı xarakterli qərarların qəbul olunması müsbət əhəmiyyətə malikdir. Belə qərarlar koronavirusla bağlı potensial risqlərin önlənməsində önəmli rol oynayacaq. Ona görə də bu, bəzi yerli və xarici vətəndaşların rahatlığı üçün müəyyən çətinliklər yaratsa da, bunu etmək lazım idi”.
Vidadi ORDAHALLI
