Minik avtomobillərindən oğurluq halları sürücülərin ən çox üzləşdiyi problemlərdəndir. Araşdırmalara görə, belə cinayət əməlləri daha çox yay aylarında baş verir. Avtomobildən oğurluq hallarının statistikası göstərir ki, bəzi hallarda bunu edən şəxslər heç bir çətinliklə üzləşməyiblər. Avtomobilin qapı və ya pəncərəsinin açıq olması bu cür hallara zəmin yaradır. Buna görə də ekspertlər sürücülərin də diqqətli olmasını vacib sayırlar.
Nəqliyyat vasitələrinin talana məruz qalması ilə bağlı Bakı şəhər BPİ Mətbuat Xidməti maraqlı bir məlumat yayıb. Məlumatda qeyd olunur ki, nəqliyyat vasitələri əsasən sahibinin viktim davranışı (zərərçəkmiş şəxsin cinayətin törədilməsi üçün yaratdığı şərait) zəminində talana məruz qalır: “Bu həm də əmlak sahibinin öz mülkiyyətinə olan münasibətindən asılıdır. Nəqliyyat vasitələrinin sahiblərinin avtomobilləri əsasən mühafizə olunmayan, işıqlandırılmayan, yaxud “Təhlükəsiz Şəhər” kameralarının əhatə dairəsindən kənar, gediş-gəlişin az olduğu küçələrdə saxlamaları müşahidə olunur. Bütün bunları nəzərə alaraq, nəqliyyat vasitələri park olunarkən sürücülər elementar qaydalara əməl etməli, viktimoloji şəraiti nəzərə almalı, avtomobillərin salonunda qiymətli əşyaların saxlanmamasına fikir verməlidirlər".
Doğrudan da bu gün elə sürücülər var ki, onlar öz avtomobillərini park edərkən elementar qaydalara riayət etmirlər. Maşının ya pəncərəsini açıq qoyur, ya da salonda qiymətli əşya, çanta qoyub gedirlər. Bu kimi hallar göstərir ki, nəqliyyat vasitələrinin talan edilməsində vətəndaşların da günahı var. Belə ki, vətəndaşlar öz məsuliyyətlərini dərk edib, avtomobillərində qiymətli əşya, ümumiyyətlə, diqqətçəkən nəsə qoymasalar, oğru həmin nəqliyyat vasitəsinə yaxın durmaz.
“Ələ keçirilərək asan satıla və ya istifadə oluna biləcək dəyərli bir şey görsə, oğurluq etməyə çalışacaq”
Hüquqşünas, nəqliyyat vasitələri üzrə ekspert Ərşad Hüseynov bildirdi ki, avtomobildə potensial oğrunun diqqətini çəkən heç nə saxlanmamalıdır: “Oğurluğa meylli adam bunu etməzdən əvvəl avtomobilə mütləq baxır. Ələ keçirilərək asan satıla və ya istifadə oluna biləcək dəyərli bir şey görsə, oğurluq etməyə çalışacaq. Ona görə də avtomobildə çanta, diplomat, portfel və qiymətli görünə bilən və ya içərisində pul və ya qiymətli nəsə olması ehtimal edilən qutular, bağlamalar saxlamayın. Ən təhlükəlisi qadınların və ya kişilərin əl çantasıdır”.
Həmsöhbətimiz onu da əlavə etdi ki, avtomobili oğrulardan qorumağın ikinci yolu nəqliyyat vasitəsini hər zaman imkan daxilində həmişə adam olan, yaxşı görünən, kameralarla nəzarət edilən, gecə vaxtı isə işıqlanan yerlərdə saxlamaqdır: “Təcrübə göstərir ki, kimsəsiz və nəzarətsiz yerdəki avtomobildə heç nə olmasa da, bəzən oğrular ona müdaxilə edib, sadəcə, axtarış edirlər. Nəzərə almaq lazımdır ki, avtomobildən oğurluq məqsədilə müdaxilə sadəcə konkret pulun, sənədin və ya başqa əşyann itməsi ilə nəticələnməyəcək. Bunu edən oğru həm də avtomobilə ziyan vuracaq (adətən şüşələri sındırırlar, qapını zorla açaraq yararsız edirlər və s.). Bəzən avtomobilə dəyən zərər oğurlanan əşyaların dəyərindən 10 qat artıq olur”.
Günel CƏLİLOVA
