Dünyanın əksər ölkəsində yayılan koronavirus, öz növbəsində, ölkəmizdə də təşviş yaradır. Virus şübhəsi ilə bir neçə şəxsin xəstəxanaya yerləşdirilməsindən sonra isə narahatlıq bir qədər də artıb. Heç şübhəsiz ki, bundan dolayı da böyük kütləvi təbirlərin bəziləri təxirə salınıb, insanlar da belə yerlərə getməkdən çəkinirlər.
Bununla yanaşı, Nazirlər Kabineti yanında Operativ qərargah koronavirus təhlükəsi ucbatından toy, şənlik və digər kütləvi məclislərin ertələnməsini tövsiyə edib. Ancaq restoran və şadlıq evləri bu tövsiyəyə əməl etmirlər. Belə ki, bu gün də şadlıq evlərində toy və digər məclislər keçirilməkdə davam edir. Şadlıq evlərinin sahibləri səbəb kimi bildirirlər ki, xəstəlik əhali arasında panika yaradır: “Camaat bir-birindən dolanır. Toy bazar iqtisadiyyatını tənzimləyir. Bazarda kartof, qızıl satandan tutmuş, “Binə”, “Sədərək” ticarət mərkəzinə, taksiyə, işıq, qaz, vergi idarəsinədək hamı toydan dolanır. Toyların təxirə salınması ölkəni panikaya sala bilər, hamı ziyan çəkər”.
“Pluton” şadlıq sarayı - Nəcəf Abbasov: “Aprel üçün toy sifarişləri qəbul edilib”
“Pluton” şadlıq sarayının inzibatçısı Nəcəf Abbasov artıq aprelə toy sifarişləri qəbul edildiyini bildirir. Onun söylədiyinə görə, rəsmi qərar yoxdur deyə, toylar davam edir.
“Gilavar” şadlıq sarayı – Sahib: “Biz qabları, süfrələri də dezinfeksiya etdiririk, o dərmanlar təsirini bir ay saxlayır, ora viruslu adam girsə belə, qorxusu yoxdur”
“Gilavar” şadlıq sarayının inzibatçısı Sahib adlı şəxs bildirdi ki, hər şey qaydasındadır. Virusla bağlı aparılan profilaktik tədbirlərin görüntüləri sosial mediada yerləşdirilib. Hətta bununla bağlı rəsmi qurumlardan akt da alınıb: “Biz qabları, süfrələri də dezinfeksiya etdiririk, o dərmanlar təsirini bir ay saxlayır, ora viruslu adam girsə belə, qorxusu yoxdur”.
Adil Qeybulla: “Restoran, şadlıq evi kimi yerlərdə tədbirlər təxirə salınmalıdır”
Həkim, professor Adil Qeybullanın sözlərinə görə, bütün hallarda, məhdudiyyətlər lazımdır: “Karantin dövründə belə məhdudiyyətlər daha yaxşı olar. Xüsusən restoranlar, şadlıq evləri, yəni qapalı yerlərdə xəstə insanın infeksiyanı başqalarına yaymaq şansı artmış olur. O baxımdan, müvəqqəti olaraq toyların, ad günlərinin və başqa məclislərin ertələnməsi yaxşı olardı”.
Həmsöhbətimiz onu da əlavə etdi ki, karantin zamanı bəzi addımların məcburi, bəzilərinin tövsiyə xarakteri daşıması normaldır: “Məsələn, əhaliyə əllərini tez-tez yumaq tövsiyə olunur. Buna məcbur etmək mümkün deyil. Ancaq restoran, şadlıq evi kimi yerlərdə tədbirlər təxirə salınmalıdır. Müvəqqəti olaraq 5-10 və daha artıq insanın bir yerdə toplanıb tədbir keçirməsi yasaqlanmalıdır. Bu, ekstremal vəziyyətdir. İnfeksiya aradan qalxanadək etmək olar. Çətini bir-iki aydır”. Günel CƏLİLOVA
