ABŞ Prezidenti Donald Tramp Nümayəndələr Palatasının spikeri Nensi Pelosiyə ünvanladığı məktubda onu və digər demokrat konqresmenləri impiçment proseduru zamanı ölkənin konstitusiyasını pozmaqda ittiham edib: "Bu impiçment misli görünməmiş və konstitusiyaya zidd şəkildə səlahiyyətlərdən sui-istifadə hallarını əks etdirir”.
Ağ Ev rəhbəri Nümayəndələr Palatasının fəaliyyətini "Amerika demokratiyasına açıq müharibə elanı" adlandırıb və bildirib ki, ölkənin 250 illik tarixində belə hadisə olmayıb.
Səlahiyyətindən sui-istifadə etməkdə günahlandırılan ABŞ Prezidenti Donald Trampın impiçment proseduru üzrə səsvermə keçiriləcək. Müvafiq bəyanat Nümayəndələr Palatasının spikeri Nensi Pelosinin saytında dərc edilib. Nümayəndələr Palatası Trampa qarşı irəli sürülən ittiham aktını təsdiqlədiyi təqdirdə, növbəti mərhələ kimi bu məsələyə Senatda baxılacaq. Xatırladaq ki, ABŞ-ın Nümayəndələr Palatasının spikeri olan Nensi Pelosi sentyabrın 25-də Prezident Donald Trampa qarşı impiçment prosedurunun başladığını elan edib. Bunun əsas səbəbi kimi bu ilin iyulun 25-də amerikan liderinin ukraynalı həmkarı Vladimir Zelenski ilə telefon danışığı zamanı təzyiq göstərməsi göstərilir. ABŞ-da həftələrlə davam edən istintaqdan sonra, nəhayət, impiçment səsverməsi günü gəlib yetişdi. Keçiriləcək səsvermədə sürpriz olmasa, Tramp Amerika tarixində impiçment edilən üçüncü prezident olacaq. 435 üzvü olan Konqresin Nümayəndələr Palatasının Demokrat Partiyasından üzvləri Respublikaçılar Partiyası üzvlərindən 36 nəfər çoxdur.
Daha əvvəl sabiq ABŞ prezidentləri Endrü Conson və Bill Klinton impiçment edilmiş, Senatdakı məhkəmə çərçivəsində hər iki prezidentin vəzifədə qalmasına qərar verilmişdi. Sabiq ABŞ prezidenti Riçard Nikson isə impiçment səsverməsi olmadan vəzifəsindən istefa vermişdi. Nümayəndələr Palatasında impiçmentinə səs veriləcək Trampın Senatdakı məhkəməsində senatorlar münsiflər heyəti üzvü kimi iştirak edəcəklər. Məhkəmənin 2020-ci ilin yanvarında baş tutması və 15 gün davam etməsi gözlənir. Nümayəndələr Palatasından fərqli olaraq, Senatda Respublikaçılar Partiyasının üzvləri daha çoxdur. Senatda 45 demokrat, 2 müstəqil və 53 respublikaçı senator var. Prezidentin vəzifə səlahiyyətlərinə son verilməsi üçün 67 senatorun səsi lazımdır.
Trampa yönədilən digər ittiham isə Konqresin fəaliyyətinə mane olmaqdır. Demokratlar buna əsas olaraq impiçmentə çağırılan vəzifəli şəxslərə Trampın icazə verməməsini, tələb olunan sənədləri paylaşmamasını göstərirlər. Trampa qarşı açılan impiçment prosesinin istintaqını aparan Nümayəndələr Palatasının kəşfiyyat komissiyası dekabrın əvvəlində dərc etdiyi son hesabatda ABŞ liderinin vəzifəsindən sui-istifadə etməsinə dair əlində güclü sübutların olduğunu açıqlayıb.
Mövzu ilə bağlı fikirlərini “Bakı-Xəbər”lə bölüşən politoloq Əhəd Məmmədli hesab edir ki, Tramp Prezident seçildiyi vaxtdan onun Senat və Konqreslə qarşıdurması başlayıb: “ABŞ daxilindəki siyasi elitalar arasında bir qarşıdurma yaşanır. Həmin ölkə ictimaiyyətində belə şübhələr var ki, o, Rusiyanın dəstəyilə hakimiyyətə gəlib.Yadınızdadırsa, Trampın seçilməsində Rusiyadan olan xakerlərin adı hallanırdı. Elə həmin vaxtdan da belə təəssürat yarandı ki, Tramp Rusiyanın adamıdır. İlk impiçment cəhdləri də məhz bundan sonra başladı. Sonra müxtəlif mövzularda ona impiçment elan etmək cəhdlər edilib. Maraqlıdır ki, Trampa qarşı belə təşəbbüslə Konqresin yalnız demokrat üzləri deyil, həmçinin, respublikaçılar da çıxış edir. Yəni Trampın öz partiyadaşları. ABŞ-da prezident seçkiləri yaxınlaşır. Mən inanmıram ki, belə vəziyyətdə Tramp impiçment olunsun. Hətta mən növbəti seçkidə də Trampın yenidən seçiləcəyini gözləyirəm. Çünki onun prezidentliyi dönəmində ABŞ iqtisadiyyatında böyük irəliləyiş əldə olunub. ABŞ-da isə bu önəmli faktordur. ABŞ prezident ölkəsi olsa da, orada hər detalı ölkə başçısı həll etmir. Ona görə də baş verən bu çalxalanmaları ABŞ siyasətinin normal mənzərəsi kimi qəbul edə bilərik. Sonda ABŞ-da ümumi sistem nə istəyirsə, o da olacaq. Həmin qərara Prezident də tabe olacaq, Konqres də”.
Məhəmmədəli QƏRİBLİ
