Artıq neçə gündür diqqətlər Bratislavada ATƏT XİN başçılarının zirvə görüşü çərçivəsində Azərbaycanın xarici işlər naziri Elmar Məmmədyarovla erməni həmkarı Zöhrab Mnatsakanyan arasında keçiriləcək görüşə yönəlib. Görüşdə ATƏT-in Minsk Qrupunun həmsədrləri də iştirak edəcəklər.
Bu arada Bakıda ikigünlük səfərdə olan Rusiyanın baş diplomatı Sergey Lavrov da iki ölkə XİN rəhbərinin Bratislava görüşündən söz açıb: “Biz bundan sonra da ortaq mövqelərimizin dəstəklənməsinə, Azərbaycan və Rusiya üçün xüsusi maraq doğuran mühüm məsələlərin həllinə kömək edəcəyik. Bu, Dağlıq Qarabağ münaqişəsinin nizamlanmasına aiddir”.
Bratislava görüşü Qarabağ mövzusu üzrə bu il üçün sonuncu olacaq. Əfsuslar olsun ki, 2019-cu il itirilmiş fürsətlər ili oldu. Konfliktin dinc həll prosesini irəli apara biləcək heç bir ciddi təşəbbüslə, yeniliklə yadda qalmadı. Bakının israr etdiyi substantiv danışıqlar üçün zəmin yaranmadı. Beləcə, torpaqlarımızın işğalı daha bir il uzandı. Vəziyyətin bu cür davam etməsi, nizamlanma prosesinin dalana girməsi, şübhəsiz ki, Ermənistanın danışıqlarda qeyri-konstruktiv mövqeyi ilə bağlıdır. Ancaq Azərbaycan, əlbəttə ki, öz torpaqlarının işğalı ilə heç vaxt barışmayacaq və sülh danışıqlarının səmərə verməməsi fonunda, ilk fürsətdəcə özünün ərazi bütövlüyünü hərbi yolla bərpa edəcək. Təsadüfi deyil ki, bir sıra ekspertlər Bratislava danışıqlarını ermənilər üçün son şans hesab edirlər. Yəni bu dəfə də nəticə olmasa, o zaman hərbi əməliyyatların başlaması qaçılmaz olacaq.
Maraqlıdır, bəs ekspertlər bu baxımdan Bratislava danışıqlarını necə dəyərləndirirlər?
“Fürsət yaranan kimi, torpaqlarımızı işğaldan azad edəcəyik”
Məsələyə münasibət bildirən ehtiyatda olan polkovnik-leytenant, hərbi ekspert İbrahim Rüstəmlinin fikrincə, proseslərin gedişində hər şey mümkündür: “Əvvəla Azərbaycan dövlətinin Qarabağ məsələsi ilə bağlı prinsipial mövqeyini dəstəkləyirəm və bunu çox böyük uğurlu addım kimi qiymətləndirirəm. Biz bu məsələdə heç vaxt ruhdan düşməməli və daim aktiv fazada mübarizə aparmalıyıq. Çünki bu mübarizənin də bir nəticəsi olacaq inşallah. Ona görə ki, heç bir cəhd cavabsız qalmır. Bəziləri iddia edirlər ki, guya Azərbaycan dövlətinin Qarabağ danışıqları ilə bağlı sərgilədiyi mövqe uğursuzdur. Mən bu cür fikirlərlə razı deyiləm. Qarabağ danışıqları ilə bağlı Azərbaycanın atdığı addımlar uğura doğrudur. Müəyyən hədəflərə, məqsədlərə çatmaq üçün bu addımlar atılır. Hər bir cəhdimiz məqsədə doğru bizi bir addım yaxınlaşdırır. Ona görə də bu mənada çox optimistəm. Düşünürəm ki, biz bu istiqamətdə cəhdlərimizi daha yeni və fərqli məzmunlarda təqdim etməliyik. Bütün bunlar da, heç şübhəsiz, nəticəsiz qalmayacaq. Qarabağ məsələsi ilə bağlı Azərbaycanın mövqeyi aydındır. Dolayısı ilə Paşinyan hakimiyyətinin də mövqeyi aydındır. Ancaq bu məsələdə Azərbaycanı daha öncül mövqedə saxlayan bir sıra məqamlar var. Məsələ ondadır ki, Dağlıq Qarabağdakı separatçı rejimin “müstəqilliyini” Ermənistan da daxil olmaqla heç bir dövlət tanımayıb. Lokal müstəvidə ermənilər buna cəhdlər edir, amma ciddi nəticəyə nail ola bilmirlər. Beynəlxalq qurumların bu məsələdə verdiyi qərarlar bizim xeyrimizədir. Deməyim odur ki, Azərbaycan sonsuza qədər torpaqların işğal altında qalması ilə barışmayacaq. Fürsət yaranan kimi, torpaqlarımızı işğaldan azad edəcəyik”.
Vidadi ORDAHALLI
