Ermənilər Azərbaycanda parlament seçkilərini pozmağa hazırlaşır...

Qoşunların təmas xəttində erməni əsgərin yaralanması Ermənistan XİN-i çox sərt bəyanat verməyə vadar edib. Azərbaycanla hədə tonunda danışılan həmin bəyanatda bildirilir ki, guya Azərbaycanın atəşkəsi pozması onları əlavə addımlar atmağa vadar edə bilər. Bu xüsusda bildirilir ki, xüsusilə də Azərbaycan daxilində gedən siyasi proseslər fonunda, təmas xəttində ehtiyatlı olmalıdır. Ermənilər hətta bir neçə misal da çəkərək, necə təxribat törədə biləcəklərinə işarə edirlər.

Məlumdur ki, qarşıda Azərbaycanı parlament seçkiləri kimi həlledici bir mərhələ gözləyir. Ermənilərin məhz bu məqamda belə bəyanat verməsi parlament seçkiləri zamanı hansısa təxribatlar törədə biləcəklərinə işarə sayıla bilərmi?

• “Bunun üçün müharibəyə başlamalıdırlar”

Politoloq Qabil Hüseynli “Bakı-Xəbər”ə açıqlamasında bildirdi ki, ermənilərin nəyə qadir olduqlarını biz yaxşı bilirik: “Azərbaycanda baş verən bütün həlledici mərhələlərdə onlar təxribata əl atırlar. Azərbaycanda təhlükəsizlik çox etibarlı olduğu üçün, onlar daxildə hansısa təxribatı törədə bilmirlər. Əllərində qalır iki vasitə. Bir informasiya terroru ilə bizi təhdid etmə, bir də təmas xəttindəki təxribatları ilə. Biz ölkəmizin evsahibliyi etdiyi mühüm tədbirlər və digər əlamətdar hadisələr zamanı ermənilərin cəbhədə daim necə təxribatlara əl atdıqlarını görmüşük. Atəşkəsi pozmaqla onlar diqqəti ora yönəltməyə çalışıblar. Erməni tərəfi bu tip təxribatlardan tərəflər arasında gedən sülh danışıqları zamanı da istifadə edir. Yəni cəbhədə atəşkəsi pozmaq ermənilərin əlində olan bir vasitədir. Ancaq bir faktı da deyim ki, onlar hər zaman layiqli cavablarını alıblar. Bunu yaxşı bildikləri üçün, indi də şantaja keçirlər. Azərbaycan belə mərhələləri çox keçib. Qarşıdan gələn parlament seçkiləri zamanı da onlar nəsə edə bilməzlər. Yalnız könül bulandıra bilərlər. Əllərində parlament seçkilərini pozmaq üçün elə bir vasitə yoxdur. Bunun üçün müharibəyə başlamalıdırlar. Bundan ən çox qorxan elə Ermənistanın özüdür. Çünki bütün vasitələrlə çalışır ki, mövcud status-kvonu saxlasın. Bilirlər ki, sülh danışıqları fayda verməyəcəyi təqdirdə Azərbaycan hərbi güclə torpaqları azad etmək haqqına sahibdir. İstənilən halda, biz bu məsələdə həssaslığı əldən verməməliyik”.

Məhəmmədəli QƏRİBLİ