Azərbaycanın və Rusiyanın Xarici işlər nazirləri Elmar Məmmədyarov və Sergey Lavrovun görüşündə Dağlıq Qarabağ münaqişəsinin nizamlanması, iki ölkə arasında əməkdaşlıq, eləcə də beynəlxalq və regional məsələlər barədə müzakirələr aparılıb.
Elmar Məmmədyarov görüşdən sonra bildirib ki, Dağlıq Qarabağ münaqişəsinin həlli üzrə danışıqlar dalana dirənib: “Hazırda Dağlıq Qarabağ münaqişəsinin həllinə dair danışıqlarda durğunluq vəziyyəti yaranıb”.
Məmmədyarov qeyd edib ki, münaqişə mərhələli şəkildə həll olunmalıdır. “İlk növbədə, əlbəttə ki, ordu kazarmalara qayıtmalıdır, çoldə olmamalıdır. Daha sonra qaçqınların qaytarılması, iqtisadi imkanların və yolların təcrid olunmasının aradan qaldırılması barədə düşünmək olar”.
“Danışıqlar olduqca məzmunlu keçdi. Azərbaycanla Rusiya arasında gələn il üçün siyasi məsləhətləşmələrə dair protokol imzaladıq”, - deyə Məmmədyarov bildirib.
Lavrov deyib ki, biz həmsədr qismində Dağlıq Qarabağ münaqişəsinin həllinə kömək göstərəcəyik. O bildirib ki, ötən gün Azərbaycan Prezidenti İlham Əliyevlə səmərəli görüş keçilirib.
Nazir xatırladıb ki, ötən həftə Azərbaycanın Birinci vitse-prezidenti Mehriban Əliyevanın Rusiyaya səfəri baş tutub:“Səfərin yekununda vacib razılaşmalar əldə olunub”.
S.Lavrov bildirib ki, Dağlıq Qarabağ münaqişəsi postsovet məkanında uzanmış münaqişələrdən biridir:“Biz anlayırıq ki, kompromis olmalıdır. Biz həmsədrlər olaraq məsələnin həllinə kömək göstərəcəyik. Ümid edirik ki, nəticələr olacaq”.
Lavrov əlavə edib ki, Dağlıq Qarabağ icmaları arasında əlaqələrin tərəfdarıdır.
O bildirib ki, Rusiya bu təşəbbüsün müəlliflərindən biri olub: “Hesab edirəm ki, bu çox vacibdir. İstənilən qərar bu torpaqda yaşayan insanlar tərəfindən qəbul olunmalıdır. Mən icmalar arasında əlaqələrin və onların bərpa olunmasının tərəfdarıyam. Yekunda Qarabağın bütün əhalisi necə yaşamaq lazım olduğuna özü qərar verməlidir”.
Elmar Məmmədyarov deyib ki, Azərbaycan və Ermənistan Xarici işlər nazirlərinin dekabrın 4-də Bratislavada Dağlıq Qarabağla bağlı predmet danışıqlara başlayacağı gözlənir. Nazir qeyd edib ki, Ermənistanın XİN rəhbəri təhlükəsizlik barədə məsələni qaldırmaq niyyətindədir: “Bizim və Ermənistanın anlayışında təhlükəsizlik nədir? İlk növbədə silahlı qüvvələr kazarmalara qayıtmalıdır. Bəli, təhlükəsizlik vacibdir. Amma həm də Azərbaycan və onun Qarabağdakı əhalisi üçün. Biz həmsədrlərə vəziyyətin dəyərləndirilməsi və təhlükəsizlik məsələsinin həll olunması üçün məruzənin hazırlanması ilə bağlı müraciət etmişik. Bunun üçün ciddi predmet danışıqlar lazımdır. Erməni həmkarımla Bratislavada görüşdən gözləntilər ondan ibarətdir ki, biz irəli getməliyik”.
Lavrov deyib ki, hərbi-texniki əməkdaşlıq Moskva ilə Bakı arasında strateji tərəfdaşlığın ən vacib sahələrindəndir. Nazir qeyd edib ki, hərbi-texniki əməkdaşlıq beynəlxalq qanunvericiliyə uyğun inkişaf edir.
Öz növbəsində, E.Məmmədyarov bildirib ki, bu sahədə əməkdaşlıq hər zaman gündəlikdə olub. “Müəyyən fikirlər var. Razılaşma olan kimi KİV-ə məlumat verəcəyik”.
