Prezident İlham Əliyev dekabrın 2-də Rusiya Federasiyasının Xarici İşlər naziri Sergey Lavrovu qəbul edib.
İlham Əliyev Dağlıq Qarabağ münaqişəsinin nizamlanma prosesinə də toxunub və bu istiqamətdə hər hansı irəliləyişin olmadığını nəzərə çatdırıb: “Əlbəttə ki, səfər çərçivəsində biz Ermənistan ilə Azərbaycan arasında münaqişənin nizamlanması problemləri barədə danışacağıq. Təəssüf ki, bu istiqamətdə nəzərəçarpan nəticələr olmayıb. Hesab edirəm ki, bunun əsas səbəbi Ermənistan rəhbərliyinin səmərəsiz siyasəti, xüsusən, "Qarabağın Ermənistan olması” barədə bəyanatıdır. Şadam ki, həm sizin tərəfinizdən, həm də digər ölkələrdən olan həmsədrlər tərəfindən, yumşaq desək, bu qəribə bəyanata düzgün qiymət verilib. Biz Minsk Qrupunun həmsədrləri ilə əməkdaşlığı davam etdirəcəyik. Yaxın vaxtlarda Azərbaycanın və Ermənistanın xarici işlər nazirlərinin görüşü olacaq. Biz ümidvarıq ki, siz danışıqlar prosesində fəal iştirakınızı davam etdirəcəksiniz. Bir daha xoş gəlmisiniz. Bakıda vaxtınızın xoş keçməsini arzu edirəm”.
Göründüyü kimi, İlham Əliyev Lavrovla görüşdə əsas diqqəti Paşinyanın sülh danışıqları prosesi ilə ziddiyyət təşkil edən bəyanatına yönəldib. Prezidentin bu məsələyə işarə etməsinin hansı sətiraltı mənaları ola bilər?
Yeganə Hacıyeva: “Bununla bir daha sübut olundu ki, Paşinyan danışıqları pozmaq üçün provokasiya ilə məşğul olur”
Politoloq Yeganə Hacıyeva “Bakı-Xəbər”ə açıqlamasında bildirdi ki, Bakıda Azərbaycan Prezidenti İlham Əliyevin Rusiya Federasiyasının XİN rəhbəri Sergey Lavrovla görüşü ciddi hadisə sayıla bilər: “Səfər daha öncədən nəzərdə tutulsa da, detalları noyabrın 27-də, Moskvada Azərbaycan və Rusiya xarici işlər nazirlərinin müavinləri Xələf Xələfov və Yuri Rudenkonun məsləhətləşmələri zamanı dəqiqləşdirilib
Səfər öncəsi görüşdə ikitərəfli münasibətlərin prioritet mövzuları, regional və beynəlxalq gündəmdəki aktual məsələlər və həmçinin, ikitərəfli əlaqələrin daha sonrakı inkişafı müzakirə edilib.
Görüşdə ikitərəfli münasibətlərin müzakirəsi haqqında danışsaq, detallara varmadan qeyd edim ki, tərəflərin prioritet istiqamətləri və bu istiqamətlər üzərindən hər iki ölkənin xarici siyasət idarələrinin 2020-ci il üçün məsləhətləşmə planının imzalanması baş tutdu.
Müzakirə olunan regional mövzularda tərəflər Dağlıq Qarabağ münaqişəsinin tənzimlənməsi ilə bağlı fikir mübadiləsi apardılar”.
Politoloqun sözlərinə görə, səfərin əsas yükü məhz Rusiya XİN rəhbəri və Azərbaycan Prezidentinin Dağlıq Qarabağ konfliktinin nizamlanması üzrə müzakirələri üzərinə düşüb: “Ötən ili Rusiya-Azərbaycan münasibətləri üçün uğurlu il kimi dəyərləndirən Prezident İlham Əliyev ölkələrimizin beynəlxalq təşkilatlardakı fəaliyyətinin uzlaşması kimi məqamlara, ölkələrimizin siyasi mövqelərinin qarşılıqlı dəstəklənməsi məqamlarına diqqət çəkdi.
Azərbaycan nümayəndə heyətinin tam heyətdə Rusiyanın AŞPA-ya qayıtmasının lehinə səs verməsini xatırladan cənab Prezident, Azərbaycanı narahat edən məsələlərlə bağlı beynəlxalq strukturlarda Rusiya Federasiyasının dəstəyini hiss etdiyini vurğuladı.
Prezident Dağlıq Qarabağ konfliktinin nizamlanmasına toxunaraq, Ermənistan Baş nazirinin konfliktin nizamlanmasına zidd mesajlarının sülh prosesinə ziyanlı olmasını qeyd etdi. Rusiya XİN rəhbəri Lavrov isə cavabında Azərbaycan Prezidentinin tezisini tam dəstəklədi və Ermənistanın Baş naziri Paşınyanı yanlış və ziyanlı ritorikadan, BMT Nizamnaməsində və Helsinki Yekun Aktında təsbit olunmuş prinsiplərə zidd olan ritorikadan çəkinməyə çağırdı. Bununla bir daha sübut olundu ki, Paşinyan danışıqları pozmaq üçün provokasiya ilə məşğul olur.
Lavrov, həmçinin , Azərbaycanın Birinci vitse-prezidenti Mehriban Əliyevanın Rusiya Federasiyasına səfərini çox vacib nəticələri olan, ikitərəfli münasibətlərə xüsusi töhfə verəcək bir bir səfər olaraq dəyərləndirdi.
Rusiya XİN rəhbəri Lavrovun səfərinin Rusiya tərəfi üçün gözləntiləri haqqında danışsaq, bunu daha çox qlobal mövzulara aid hesab etmək lazımdır və hazırda Rusiya-Azərbaycan münasibətlərində, qlobal yanaşmada iki dövlət arasında əlaqələrdə narahatedici fikir ayrılığı mövcud deyil, ancaq şübhəsiz ki, müzakirə ediləsi məsələlər də yox deyil. Tərəflər ABŞ-ın Rusiya və İranla münasibətləri fonunda, Yaxın Şərq, Mərkəzi Asiya regionunda təhlükəsizlik, sabitlik, rifahın gücləndirilməsində mümkün aktivlər, xüsusilə Yaxın Şərqin siyasi və iqtisadi modernləşməsi istiqamətində Azərbaycanın söz sahibi olduğu İslam Əməkdaşlıq Təşkilatında iştirakı və s. mövzularda müzakirələr aparırlar”.
Məhəmmədəli QƏRİBLİ
