15/12/2019 16:46
728 x 90

Naxçıvan Ali Məclisinin buraxılması – Azərbaycanda parlament islahatlarının yeni mərhələsi…

Məhərrəm Zülfüqarlı: “Milli Məclis Prezidentin apardığı islahatlarla ayaqlaşa bilmirsə, parlamentin yenilənməsi təklif olunursa, deməli, eyni məntiqlə Ali Məclisə də yanaşmaq olar”

img

Gözlənildiyi kimi, Milli Məclisin (MM) plenar iclasında parlamentin buraxılması və növbədənkənar seçkilərin təyin edilməsi haqqında Azərbaycan Prezidentinə müraciət edilməsi barədə qərar layihəsi oxunub. Sözügedən layihəni MM sədrinin müavini Bahar Muradova deputatların diqqətinə çatdırıb. Qərar layihəsi səsverməyə çıxarılıb və 99 lehinə səslə qəbul edilib. Səsvermədə 1 nəfər bitərəf qalıb, 1 nəfər qərar layihəsinin əleyhinə səs verib. Bir deputat isə səsvermədə iştirak etməyib.

Səsvermədən sonra spiker Oqtay Əsədov deyib ki, Milli Məclisin dekabrın 3-də keçiriləcək plenar iclası V çağırış üçün sonuncu iclası ola bilər. Daha sonra Milli Məclisin buraxılması və növbədənkənar seçkilərin təyin edilməsi haqqında Azərbaycan Prezidentinə müraciət edilməsi barədə parlamentin qərarının mətni açıqlanıb.

O da məlumdur ki, Naxçıvan Ali Məclisinə keçirilən seçkilər Azərbaycan parlament seçkiləri ilə eyni vaxtda keçirilir. Sonuncu dəfə Naxçıvan MR Ali Məclisinə seçkilər 2015-ci ilin noyabrında keçirilib. Ali Məclisin 45 deputatı var. Azərbaycanda parlamentin buraxılması fonunda, bənzər addımların Naxçıvan MR Ali Məclisi ilə bağlı atılması da gündəmə gəlir. Çünki Naxçıvan Azərbaycanın tərkib hissəsidir. O baxımdan ekspertlər buna necə yanaşırlar?

  • “YAP-ın Naxçıvan şöbəsi bununla bağlı Prezidentə müraciət etsə…”

Sözügedən məsələyə aydınlıq gətirən Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Seçki Qərargahının rəhbəri Məhərrəm Zülfüqarlının sözlərinə görə, bu barədə hakim partiyanın qərarı olmalıdır: “Naxçıvan MR Ali Məclisi bölgənin parlamenti hesab olunur. Ancaq Ali Məclisə növbədənkənar seçkilərin keçirilməsi ilə bağlı YAP-ın qərarı yoxdur. Yəni YAP-ın Naxçıvan şöbəsi bununla bağlı Prezidentə müraciət etsə, o zaman buna da baxıla bilər. YAP-ın deputatları yalnız MM-nin buraxılması ilə bağlı təşəbbüs qaldırıblar. O üzdən, YAP-ın Naxçıvan şöbəsindən bənzər təşəbbüs olarsa, Ali Məclisə yeni seçkilər keçirilə bilər. Belə bir təşəbbüs olmasa, Naxçıvan MR Ali Məclisi fəaliyyətini davam etdirəcək. Konstitusiyaya görə, Ali Məclis 5 illiyə seçilir. Milli Məclis Prezidentin apardığı islahatlarla ayaqlaşa bilmirsə, parlamentin yenilənməsi təklif olunursa, deməli, eyni məntiqlə Ali Məclisə də yanaşmaq olar. Ancaq, qeyd etdiyim kimi, bununla da bağlı YAP-ın qərarı və müraciəti olmalıdır. Belə bir qərar yoxdursa, Konstitusiyaya görə, Naxçıvan MR Ali Məclisi fəaliyyətini davam etdirməlidir. Bu o deməkdir ki, Ali Məclisə seçkilər payızda keçirilməlidir”.

Vidadi ORDAHALLI

Son xəbərlər