Azərbaycan Xalq Hərəkatının mitinq cəhdi “bir payız axşamı” kimi puç olub getdi…

Noyabrın 30-da Azərbaycan Xalq Hərəkatı Lökbatan qəsəbəsində yerləşən “Neftçi” bazasına məxsus olan stadionda mitinq keçirib. Tədbir Bakı Şəhər İcra Hakimiyyəti ilə razılaşdırılıb.

Mitinq "Qarabağa azadlıq" şüarı ilə keçirilib, eyni məzmunda plakatlar qaldırılıb. Ancaq sözügedən mitinq çox uğursuz alınıb. Vur-tut 450 nəfərədək adam aksiyaya qatılıb.

Mitinqin iştirakçıları müxalifət partiyalarını da mitinqə gəlmədiklərinə görə tənqid edərək “18 kilometrlik yolu gələ bilməyən 300 kilometri necə gedib Qarabağı azad edəcək?” fikrini səsləndiriblər. Hansı ki, neçı ay idi təbliğat aparırdılar. Guya güclü mitinqin baş tutacağını bəyan edirdilər. Cəmi saatyarım davam edən aksiyada iştirak edənlərin tam əksəriyyəti Lökbatana niyə yollandıqlarını, konkret olaraq hansı qurumun, təşkilatıın mitinqinə qatıldıqlarının fərqində deyildilər.

Mitinqə gələnlərin çoxu "Qarabağ mitinqinə gəlmişik" söyləyirdilər. Təşkilatçının kimliyini soruşanda isə "Mirmahmud ağa çağırıb" deyirdilər. Fəqət, Londona sığınan və "AzəriFreedom TV" adlı “YouTube” kanalı vasitəsilə hər gün minimum 4 saat kamera qarşısında oturub Azərbaycanı, azərbaycanlıları və ümumiyyətlə, ölkə vətəndaşlarını inqilaba, vətəndaş müharibəsinə, qanlı qırğınlara çağıran Qurban Məmmədov bu aksiyanı az qala milyonların qatıldığı mitinq kimi təqdim etdi. Həmin axşam o, saaatlarla mitinqdən danışdı və ən əsası, aylardan bəri hər gün təkrarladığı "Bir payız axşamı" ifadəsinin yeni fonemasını böyük şüar qismində tamaşaçılarına səsləndirdi. Q.Məmmədovun dediklərindən belə bəlli oldu ki, sən demə, Azərbaycan sosial partlayış və siyasi çalxantı astasındadır, hakimiyyət dəyişikliyi qaçılmazdır, milyonlarla insan AXH tərəfdarıdır, siqnal gözləyirlər və s. Ancaq sözügedən mitinqin olduqca miskin atmosferdə keçirilməsi bütün bu deyilənlərin sabun köpüyündən başqa bir şey olmadığını ortaya qoydu.

• “Təəssüf edirəm ki, KXCP sədri Mirmahmud Mirəlioğlu siyasi şarlatan Qurban Məmmədovun bu kimi kirli layihələrində yer alır”

Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, AXH-nin mitinqinin fiasko ilə başa çatacağı gözlənilən idi: “Xaricdə oturub avantüra ilə məşğul olan Q.Məmmədovun heç vaxt xalqın adından danışmağa ixtiyarı yoxdur. Beş-üç nəfər diletant tərəfindən yaradılan Xalq Hərəkatı adında qondarma qurumdan heç xalqın xəbəri yoxdur. Bu ad altında özlərini siyasi müxalifətə urcah etmək istəyirlər. Təəssüf edirəm ki, KXCP sədri Mirmahmud Mirəlioğlu siyasi şarlatan Q.Məmmədovun bu kimi kirli layihələrində yer alır. Xalq Hərəkatı özü nədir ki, Azərbaycan xalqının ən ümdə problemi olan Qarabağ adından istifadə edib etiraz aksiyası keçirir? Onların məqsədi xarici düşmənlərə Qarabağ barədə xalqın düşüncəsini göstərməkdir. Xalq heç vaxt Q.Məmmədovu tanımayıb və tanımır və belə bir qurumun Qarabağ adından istifadə etməsi xəyanətkarlıqdır. Göründüyü kimi, bu mitinqə çox az sayda adam qatıldı. Onlar da bəzilərinin ailə üzvləri olub. Xalq bu şarlatanların tədbirinə heç vaxt kütləvi şəkildə qatılmaz. Mirmahmud da bunları bilə-bilə bu avantüristlərin yanındadır. Bir müddət sonra Q.Məmmədovla Mirmahmudun bütün qırmızı cizgiləri aşan, bir-birinə qarşı təhqirlərinin şahidi olacağıq. Q.Məmmədov və Mirmahmud bu addan istifadə edib xalqa xəyanət edirlər. Bunların siyasi gələcəyi yoxdur”.

Vidadi ORDAHALLI