15/12/2019 17:16
728 x 90

Milli Şura radikalları seçki ilə bağlı köhnəlmiş söz-söhbətləri yenə “diriltməyə” başlayır...

img

Demokratik Qüvvələrin Milli Şurası təcili şəkildə, indiki Milli Məclis buraxılmadan ən vacib seçki islahatları həyata keçirilməsini və ölkədə, minimum da olsa, seçki mühiti yaradılmasını tələb edir. Bu barədə Milli Şuranın dekabrın 1-də yaydığı bəyanatda deyilir:

“Milli Şuranın 2015 və 2018-ci il seçkilərində iştirak etməməsinin səbəbi məhz ölkədə minimal seçki mühitinin olmaması idi. İndi hakimiyyət seçki mühitinin yaranması üçün təcili addımlar atmalıdır ki, müxalifətin də iştirak edəcəyi və cəmiyyəti doğrudan da islahatlar istiqamətində aparacaq bir seçki keçirmək mümkün olsun”.

Milli Şura seçki komissiyalarının yenidən formalaşmasını, namizədlərin qeydiyyatına yaradılan süni əngəllərin aradan qaldırılmasını, bərabər təbliğat imkanlarının, o cümlədən, İTV-də namizədlər üçün çıxış, partiyalar üçün debat imkanlarının bərpa edilməsini də vacib sayır. Faktiki olaraq, Milli Şura seçkiləri boykot edəcəyi ilə bağlı hakimiyyətə mesaj vermək istəyir. Özlərinin də qeyd etdikləri kimi, onlar bu taktikadan əvvəlki seçkilərdə də istifadə ediblər, amma heç bir nəticə əldə olunmayıb. Maraqlıdır ki, parlamentin buraxılmasını daha çox tələb edənlər elə radikal müxaliflər olub. İndi bu proses baş verir, onlar boykotdan danışırlar. Bunun səbəbi nə ilə bağlıdır?

  • Rəfail Becanov: “...bir cığallıq nümunəsidir”

Razi Nurullayevin rəhbərlik etdiyi AXCP-nin funksioneri Rəfail Becanov “Bakı-Xəbər”ə açıqlamasında bildirdi ki, bütün bunlar bəhanədir: “Siyasi mübarizə üçün partiyalar və ya bloklar təsis olunubsa, mütləq mənada, seçkilərdə iştirakda maraqlı olmalıdırlar. Bu, siyasi partiyanın başlıca məqsədi olmalıdır. Bu məqsəd yoxdursa, onda həmin qurumlar niyə arenada qalırlar? İndiki halda görünür ki, həmin təşkilatlar heç üzərlərinə götürdükləri funksiyanı ayırd edə bilmirlər. Biz hesab edirik ki, seçkilərdə birmənalı iştirak etmək lazımdır. Seçki Azərbaycan dövlətinin, xalqının taleyi ilə bağlı olan məsələdir. Kimin iddiası varsa, o, Azərbaycan xalqının taleyinin formalaşmasında iştirak edərək, mütləq mənada, gücünü seçkidə sınamalıdır. Milli Şuranın yaydığı bəyanatı mən lazımi sənəd saymıram. Bunun doğru adı bir cığallıq nümunəsidir. Biz həmin mövqenin əleyhinəyik. Onların daim belə çığallıqla seçkidən boyun qaçırmasının başlıca səbəbi seçkiyə hazır olmamalarıdır. Əslində, siyasi təşkilatlar seçkiyə daim hazır olmalıdırlar. Buna hazırlıq bir seçki başa çatdıqdan sonra digərinə qədər aparılmalıdır. Radikal müxalifət isə bəzən bunun səbəbini hakimiyyətin onları hazırlıqsız yaxalamasında görməklə izah edir. Bunların hamısı özlərinə bəraət qazanmaq üçün səslənən fikirlərdir. Əslində, sosial bazaları, lazımi səviyyədə sanballı namizədləri yoxdur ki, normal şəkildə seçkidə iştirak etsinlər. Boykot məsələsi çox absurddur. Bunu o təşkilat edə bilər ki, güclü sosial bazası olsun və bununla seçkilərin taleyinə, onun baş tutmasına təsir göstərə bilsin. Milli Şuranın belə bazası yoxdursa, seçkidən yayınmağın yolunu boykotda görməsi çox absurddur. Bu adla, sadəcə, manipulyasiya edirlər”.

Məhəmmədəli QƏRİBLİ

Son xəbərlər