Azərbaycan Prezidenti İlham Əliyevin konkret faktlara əsaslanaraq, Ermənistanı faşizm ideologiyasını dəstəkləməkdə ittiham etməsi və bu məsələni beynəlxalq arenaya çatdırması düşmən ölkədə böyük narahatlıqla qarşılanıb. Erməni mediası xüsusilə də İlham Əliyevin Bakıda beynəlxalq yəhudi təşkilatlarının rəhbərlərini qəbul edərkən onlara Njde ilə bağlı məlumat verməsi faktına böyük yer ayırır.
Hiss olunur ki, ermənilər bu yöndə keçirdikləri narahatlıqları bizim adımıza yazmaq istəyirlər. Qeyd edirlər ki, guya Azərbaycan Dağlıq Qarabağla bağlı məğlubiyyəti unutdurmaq üçün belə mövzuları ortaya atır. Ermənilərin İlham Əliyevin Njde ilə bağlı məsələdə kəskin mövqeyindən dərin narahatlıqlar keçirməsinin kökündə hansı amillər durur?
“Njde məsələsində ermənilər artıq dalana dirəniblər”
Hərbi ekspert Daşdəmir Əliyev “Bakı-Xəbər”ə bildirdi ki, ermənilərin narahatlıqları tam əsaslıdır: “Onlar görürlər ki, İlham Əliyev olduqca vacib məqama toxunur və konkret faktlarla danışır. Bir ölkə dövlət siyasətində iki tərs mütənasib olan dəyəri qəbul edə bilməz. Ermənistan həm özünü faşizmlə mübarizə aparan respublikanın varisi kimi qələmə verir, həm də Hitlerin yaxın silahdaşı olan bir faşisti milli qəhrəman səviyyəsinə qaldırır. Bunlar bir-birilə kökdən zidd olan məsələlərdir. Erməni KİV-i Azərbaycanın bu istiqamətdəki təbliğatında başqa detallar axtarmağa çalışır. Fikri çaşdırmaq üçün guya bizim məqsədli şəkildə öz uğursuzluğumuzu ört-basdır etmək üçün bu mövzuya baş vurduğumuzu yazırlar. Biz ermənilərə hələ məğlub olmamışıq. Ermənilər bilsinlər ki, ölkəmizdə itirilən torpaqları geri qaytarmaq üçün əzm, ruh və maddi güc var. Yaxın zamanda biz bunu təmin edəcəyik. İlham Əliyev Njde məsələsinə hər zaman yerində toxunub. Aşqabaddakı görüşdə MDB başçıları məhz faşizm üzərində qələbəni müzakirə edirdilər. İlham Əliyev Njde və Ermənistanın deyilən mövzu ilə bağlı yürütdüyü ikibaşlı siyasətdən orada danışdı. Yəhudi təşkilatları rəhbərlərini qəbul edərkən də bu mövzuda danışması mövzuya tam uyğundur. Çünki dünyada faşizmdən ən çox zərər görən yəhudilər olublar. Onlar hər zaman bu amillə mübarizə aparırlar. Bu səbəbdən də İlham Əliyevin dünyada güclü olan yəhudi lobbisinə faşizm ənənələrinə sadiqlik nümaiş etdirən ölkənin ünvanını göstərməsi ermənilərdə dərin narahatlıq yaradır. Bilirlər ki, yəhudi təşkilatları bu halla mübarizə aparacaqlar. Təhlükəni real hiss etdikləri səbəbindən belə təbliğata start veriblər. Əslində, bu məsələdə əsas fəallığı Rusiya göstərməlidir. Çünki faşizm üzərində qələbənin avanqardı rolunu o oynayıb. İndi onun arxa bağçasında rus millətinə, dövlətinə təhqir sayıla biləcək proseslərin baş verməsi Moskvaya başucalığı gətirmir. Njde məsələsində ermənilər artıq dalana dirəniblər. Hiss edilir ki, vəziyyət gərgindir. Faşistin heykəlinin götürülməsi məsələsinin məhz İlham Əliyevin nəzərində olması, tez-tez bu mövzuya müraciət etməsi mütləq mənada effekt verəcək”.
Məhəmmədəli QƏRİBLİ
