Azərbaycan son illər bir çox mötəbər toplantının keçirildiyi məkana çevrilib. Dünya və regional əhəmiyyətli bu tədbirlər ictimai spektrin müxtəlif hissələrini – hərbi, humanitar, iqtisadi sahələrini əhatə edir. Noyabrın 14-15-də Bakıda baş tutan, 70 ölkədən 500 nümayəndənin, nüfuzlu beynəlxalq təşkilatların qatıldığı Dünya Dini Liderlərinin 2-ci Zirvə Görüşü öz əhəmiyyəti və miqyası baxımından rezonans doğuran beynəlxalq tədbir idi.
Dünya Dini Liderlərinin II Sammitinin Bakı Bəyannaməsi qəbul edilib. Bəyannamədə bir sıra məqamlar öz əksini tapıb. Bakı Bəyannaməsində diqqətçəkən məqamlardan biri də Azərbaycana növbəti dəfə verilən önəmlə bağlıdır. Dünya Dini Liderlərinin II Bakı Sammitində irəli sürülən, Azərbaycan tərəfinin 2020-ci ildə Bakıda “Media və sosial şəbəkələrdə nifrətə çağırışlara qarşı mübarizədə dini liderlərin və siyasi xadimlərin birgə fəaliyyəti” mövzusunda BMT, KAİCİİD və Bakı Beynəlxalq Dinlərarası və Sivilizasiyalararası Əməkdaşlıq Mərkəzinin həmtəşkilatçılığı ilə beynəlxalq konfransın keçirilməsi təşəbbüsü alqışlanıb.
Dini liderlərin yeni media pltaforması ilə bağlı çağırışı maraqlı məqamları özündə əks etdirir. Birgə Bəyannamədə media, rabitə və informasiya texnologiyaları vasitəsilə irqi, dini və etnik zəmində zorakılığa təhrik edən zərərli ideologiyaların və təbliğatların, nifrətə çağırışların qarşısının alınmasında əməkdaşlığın artırılmasına, gənclərin bu sahədə maarifləndirilməsini təşviq etməyə çağırış sosial mediada dini dözümsüzlüyü körükləyən qüvvələrə qarşı virtual mübarizəni ehtiva edir. Görünən odur ki, gələn il də dünyanın dini və siyasi xadimləri Azərbaycanda bir araya gələcəklər.
Ümumilikdə, belə bir konfransın növbəti il Bakıda keçirilməsinin əhəmiyyətini ekspertlər necə dəyərləndirirlər?
“Dünyadakı dini və siyasi xadimlər belə zərərli çağırışlara qarşı səylərini birləşdirsə, bunun müsbət effekti olacaq”
Məsələyə münasibət bildirən şərqşünas Seyid Camal Əzimbəylinin sözlərinə görə, 2020-ci ildə Bakıda “Media və sosial şəbəkələrdə nifrətə çağırışlara qarşı mübarizədə dini liderlərin və siyasi xadimlərin birgə fəaliyyəti” mövzusunda keçiriləcək konfrans çox önəmli hadisədir: “Bəyannamədə bunun öz əksini tapması çox önəmli hadisədir. Bu, Azərbaycana verilən önəmin göstəricisidir ki, növbəti dəfə Bakı mötəbər tədbirə evsahibliyi edəcək. Belə bir tədbir üçün Azərbaycanın seçilməsi təsadüfi deyil. Məsələ ondadır ki, Azərbaycan dünyada ən tolerant ölkədir. Müxtəlif mədəniyyətlərin qovuşuğunda yerləşən Azərbaycan bu zirvə görüşündə özünün tolerantlıq modeli ilə toplantıya toplaşmış dini və ictimai liderlərdə yaxşı təəssürat yarada bildi. Sammitin tribunasından dövlətimizin önəm verdiyi bu prioritetlər dünya dini liderlərinin qarşısında bir daha bəyan olundu. Mötəbər tədbirdə müxtəlif dinləri təmsil edən rəhbərlərin tolerantlığa çağıran çıxışlarının qarşısına Azərbaycanın vahid multikultural və dini çələnglə çıxması dövlətimizin apardığı uğurlu siyasi xəttin parlaq sübutu oldu. Azərbaycan toplantıda humanist dəyərlərlə söykənən nümunəsini, təcrübəsini dünya ilə bölüşməyə hazır olduğunu bir daha bəyan etdi. Bunun nəticəsidir ki, toplantıda iştirak edənlər gələn il Bakıda keçiriləcək toplantıya yekdilliklə tərəfdar oldular. O da məlumdur ki, son illər bu məsələ çox aktual əhəmiyyət kəsb edir. Elektron medianın və sosial şəbəkələrin cəmiyyətdə rolu artıb. Bundan sui-istifadə edənlər də az deyil. Hansı ki, sosial şəbəkələrdə zərərli çağırışlar edirlər, etnik-dini zəmində nifrəti körükləyirlər. Ona görə də dünyadakı dini və siyasi xadimlər belə zərərli çağırışlara qarşı səylərini birləşdirsə, bunun müsbət effekti olacaq. İnanıram ki, bununla bağlı gələn il Bakıda keçiriləcək tədbir möhtəşəm olacaq”.
Vidadi ORDAHALLI
