Bakı Zirvəsinin iştirakçısı olmuş dünya din xadimləri öz ölkələrində Qarabağ həqiqətlərini yayan qüvvə kimi...

Bir neçə gün əvvəl Bakıda Dünya Dini Liderlərinin II Bakı Sammiti keçirildi. Dünyanın müxtəlif ölkələrini və dinlərini təmsil edən 500-dən artıq din xadimi paytaxtımızda olarkən Azərbaycan Respublikasının Prezidenti İlham Əliyevin sammitin açılış mərasimində etdiyi çıxışdan Azərbaycanın üzləşdiyi Dağlıq Qarabağ problemi, Ermənistanın torpaqlarımıza təcavüzü haqqında geniş məlumat aldılar. Dünya dini liderləri ölkəmizdə olarkən Dağlıq Qarabağ həqiqətləri haqqında kifayət qədər məlumata malik oldular və onlar Ermənistanın təcavüzkar bir dövlət olduğu barədə bilgilər əldə etdilər.

Bakı Sammitində iştirak edən dünya dini liderləri öz ölkələrinə qayıtdıqdan sonra Dağlıq Qarabağ həqiqətlərinin təbliği baxımından öz ölkələrində hansı işləri görə bilərlər?

Tarixçilər hesab edirlər ki, dünya dini liderləri Bakıda olarkən sammit çərçivəsində bir sıra həqiqətlərlə tanış oldular. Onların sözlərinə görə, müxtəlif dinlərə mənsub olan ölkələrin dini liderlərinin iştirakı ilə bu cür sammitlərin keçirilməsinin Dağlıq Qarabağ probleminin həm ədalətli həllinə dəstək, həm də bu münaqişə ilə bağlı əsl həqiqətlərin iştirakçı dini liderlərin ölkəsində yayılmasına böyük təkan olacaq.

“Bakıya gələn dünya dini liderləri burada Dağlıq Qarabağ həqiqətləri haqqında müfəssəl məlumat aldılar”

Azərbaycan Milli Elmlər Akademiyasının A.Bakıxanov adına Tarix İnstitutunun aparıcı elmi işçisi, tarix elmləri doktoru Vaqif Abışov “Bakı-Xəbər”ə bildirdi ki, həm Dünya Dini Liderlərinin II Bakı Sammiti, həm də ondan əvvəl keçirilən humanitar və digər yönlü tədbirlər Azərbaycanın ədalətli mövqeyinin, haqq davasının xarici ölkələrdə yayılmasına, təbliğ edilməsinə şərait yaradır. “Ölkəmizdə belə sammitlərin keçirilməsi və bura müxtəlif ölkələrdən nümayəndələr dəvət edilməsi vacibdir. Bu tədbirlərdə Azərbaycan torpaqlarının Ermənistan tərəfindən işğal edildiyinə dair məlumatlar həmin tədbir iştirakçılarına çatdırılır. Eyni zamanda, Azərbaycanın beynəlxalq aləmdə tanınması, ölkəmizin inkişafının təbliği baxımından bu tədbirlərin əhəmiyyəti çox böyükdür. Dünyanın dörd bir yanından gələn dini liderlərin iştirakı ilə keçirilən II Bakı Sammitinin də bu baxımdan faydası, əhəmiyyəti çoxdur. II Bakı Sammitində iştirak edən dini liderlərin Qarabağ həqiqətlərinin ölkələrində təbliğ edilməsində müstəsna rolu ola bilər. Dünyanın bir sıra ölkələrindən Bakıya gələn din xadimləri burada olarkən Azərbaycan Prezidentinin dilindən Dağlıq Qarabağın Azərbaycanın ayrılmaz tərkib hissəsi olduğunu, Ermənistanın təcavüzkar dövlət kimi Azərbaycan ərazilərini işğal etdiyini, hələ də işğal altında saxladığını bir daha eşitdilər. Hesab edirəm ki, Bakı Sammitində iştirak edən din xadimləri Bakıda eşitdikləri, əldə etdikləri bilgiləri öz ölkələrində geniş şəkildə yaymalı və həmin məlumatları müxtəlif tribunalardan səsləndirməlidirlər. Əslində, din xadimlərinin əsas vəziflərindən biri həqiqəti deməkdir. Azərbaycanın üzləşdiyi ədalətsizliklər haqqında bu gün beynəlxalq aləmdə daha çox təbliğat aparılmalıdır. Doğrudur, uzun illərdir bu istiqamətdə təbliğat aparılır, amma bu təbliğat bir az da genişləndirilməlidir. Bu təbliğatda din xadimlərinin rolu danılmazdır. Fikrimcə, Bakıya gələn dünya dini liderləri burada Dağlıq Qarabağ həqiqətləri haqqında müfəssəl məlumat aldılar və Ermənistanın təcavüzkar ölkə kimi Azərbaycana qarşı həyata keçirdiyi işğalçılıq siyasəti barədə bilgiyə malik oldular, onların vəzifəsi bu həqiqətləri öz ölkələrində yaymaqdır” - deyə V.Abışov qeyd etdi.

İradə SARIYEVA