Azər Həsrət: “Həmin qərarın təsirini biz müxalif dairələrə gələn bəyənmə sayında görürük”
Azərbaycan Respublikası Prezidentinin ictimai-siyasi məsələlər üzrə köməkçisi, professor Əli Həsənov sosial mediada yeni məqalə ilə çıxış edib. Ə.Həsənov həmin məqaləsində radikal müxalif dairələrin fəaliyyətini saxta əsaslarla qurduğuna dair konkret faktları açıqlayıb.
Bildirib ki, qlobal şəbəkələrin saxta profillərlə apardıqları mübarizədən ən böyük zərərlə çıxanlardan biri də bizim radikal müxalifət olub: “İkincisi, bəlli olur ki, Əli Kərimli və radikal antimilli ətrafı sosial şəbəkələrdə izləyicilərinin yarıdan çoxunu itiriblər. Onların “Facebook” səhifəsində bəyənmələrin, paylaşımların statistikasında azalma templəri güclənib. Xatırladaq ki, “Facebook” sosial şəbəkəsi administrasiyası bəyan edib ki, bu il 5,4 milyard saxta hesabı bağlayıb. Bu, sosial mediada manipulyasiya və dezinformasiyaya qarşı savaşın davam etdiyini göstərir. "Saxta, manipulyasiya məqsədilə yaradılan hesabları aşkarlayaraq bloklamaq qabiliyyətimizi gücləndirmişik", - internet şirkəti hesabatında bildirir. Diqqətli oxucu bu iki hadisə arasında paralel apararaq asanlıqla Əli Kərimli, Cəmil Həsənli və radikal antimilli ətraflarının izləyici və bəyənmə itkilərinin “Facebook” şəbəkəsinin öz araşdırmasının, dezinformasiyaya qarşı effektiv mübarizəsinin nəticəsi olduğunu anlaya bilir”.
Açıqlanan bu məlumat radikal müxalifətin apardığı təbliğatın sabun köpüyü olduğuna və qlobal şəbəkələrin bir düyməsindən asılılığına dair növbəti sübut sayıla bilərmi?
- “Saxtakarlığa yerin verilməməsi onların fəaliyyətini tam heçə endirəcək”
Media məsələləri üzrə ekspert Azər Həsrət “Bakı-Xəbər”ə açıqlamasında bildirdi ki, bu məsələ elə Əli müəllimin özü və bizlər tərəfindən də zaman-zaman gündəmə gətirilib: “Dediyiniz son məqaləni mən də oxudum. Kifayət qədər tutarlı təhlildir. Əsaslandırmalar, arqumentlər çox dəqiqdir, konkret faktlara söykənir. Həmin radikal dairələrə belə tutarlı cavabların verilməsi lazımdır. Yazıdakı bütün fikirləri təqdir edirəm. Bizdəki radikal dairələr saxta profillərdən istifadəni artıq öz fəaliyyət normalarına çeviriblər. Çünki düşünürlər ki, stakanda fırtınanı məhz bu üsulla qoparmaq olar. Bir müddət sosial medianın imkanları onlara sərbəst fəaliyyət üçün şərait yaradırdı. Onlar da bundan geninə-boluna istifadə etdilər. Vicdanlarını qarşılarına qoyub, hesabat vermədiklərinə görə bir adam sosial mediada bəzən 20 profillə çıxış edirdi. Radikal dairələr küçəyə adam çıxara bilmirlər. Çünki say göz qabağında olur. Yalnız bu üsulla saylarının çox olması, arxalarında böyük elektoratın durması təəssüratını yaradırlar. Son mtinq və piket cəhdlərində biz gördük ki, həmin dairələrin arxasında heç də sosial şəbəkələrdə ifadə olunan say yoxdur. Artıq elə vəziyyət yaranıb ki, saxta profillərlə yalnız naşı adamları aldatmaq mümkündür. Təcrübəli adamlar saxta profillə yazılan məlumatlara, onların vasitəsilə olunan çağırışlara inanmırlar. Artıq özləri də dərk edirlər ki, saxta profilləri meydana çıxarıb, onların vasitəsilə mitinq etmək mümkün deyil. Hörmətli Əli müəllim də bu mexanizmin saxtalığına bir daha diqqət yönəldib. Belə saxta taktika ilə mübarizə aparan adamların siyasətdə olması doğru deyil. Cəmiyyət onları rədd etməlidir. Bəli, qlobal miqyasda saxta profillərlə aparılan mübarizə nəticəsində çoxlu sayda profil bağlanıb. Həmin qərarın təsirini biz müxalif dairələrə gələn bəyənmə sayında görürük. Radikal məzmunlu çıxışları bəyənmə və təkrar paylaşımındakı sayın əhəmiyyətli azalması elə bundan doğan nəticə sayıla bilər. Qabaq fəaliyyətləri yalnız qəzetlərdə görünən müxalifət indi də sosial şəbəkələrə transfer olub. Saxtakarlığa yerin verilməməsi onların fəaliyyətini tam heçə endirəcək”.
Məhəmmədəli QƏRİBLİ
