12/12/2019 01:38
728 x 90

Prezident Əliyev hitlerçi cəlladları qəhrəmanlaşdıran Ermənistana qarşı mübarizəyə dünyanın güclü yəhudi təşkilatlarını da qoşdu...

Məhəmməd Əsədullazadə: “Ölkə başçısinin yəhudiləri erməni-faşizm tandeminə qarşı mübarizəyə dəvət etməsi müəyyən bir prosesə gətirəcək”

img

“Sözügedən təşkilatların bu yöndə aktivliyini artıracağı gözlənir”

“Biz ümid edirik dünyadakı yəhudi icmaları bizim səsimizə səs verəcək və Ermənistan hökumətini bu abidəni sökməyə məcbur edəcəklər”. Bu fikirləri Prezident İlham Əliyev Simon Vizental Mərkəzinin həmtəsisçisi və sədr müavini, yəhudi din xadimi Rabbi Abraham Kuperi və ABŞ-ın Xristian Liderlər Konqresinin rəhbəri, yevangelist din xadimi Conni Muru qəbul edərkən bildirib. Prezidentin fikrincə, MDB məkanında faşistləri tərənnüm edən yeganə ölkə Ermənistandır. Ölkə başçısı qeyd edib ki, Ermənistanın yeni hökumətini həmin abidəni sökməyə çağırıb, çünki onu əvvəlki hökumət ucaltmışdı: “Yeni hökumət özünü demokratik hökumət kimi göstərir. Beləliklə, bunu göstərin, abidəni sökün. Mənim ittihamlarım ona qarşı deyildi, onun qondarma inqilab nəticəsində devirdiyi sələflərinə qarşı idi və o dedi: Soljenitsın da həbsdə olub və bir çox başqa sovet dissidentləri Vladimir həbsxanasında olublar. Beləliklə o, faktiki olaraq deyirdi ki, faşist qatil Soljenitsınla eynidir. Bundan daha səfeh bəyanatı təsəvvürə gətirmək mümkün deyil. Bu səbəbdən, əlbəttə ki, biz hər şeyi olduğu kimi deməliyik. Biz bilirik ki, Amerikada, Rusiyada, Fransada, Minsk Qrupunun həmsədr ölkələrinin hamısında erməni lobbisi var. Lakin bir həqiqət var. Qələbənin 75-ci ildönümü ərəfəsində biz Yerevanın mərkəzində bu abidənin olmasına necə dözə bilərik? İndi onlar - mən mətbuatdan eşitmişəm - Bolqarıstanda abidə tikməyə çalışırlar. Onlar birini Rusiyanın Armavir şəhərində ucaldıblar. Çox cəsur bir insan gəlib onun üstünə qara boya töküb və indi erməni diasporu ona hücum edir. Onlar faşisti müdafiə edirlər. Ona görə də, əlbəttə ki, biz ümid edirik dünyadakı yəhudi icmaları bizim səsimizə səs verəcək və Ermənistan hökumətini bu abidəni sökməyə məcbur edəcəklər”.

Məlum məsələdir ki, yəhudi icmasının dünyada imkanları böyükdür. Yəhudi təşkilatlarının bu yöndə fəaliyyətlərini artırması müsbət effekt verə bilər. Bu baxımdan Prezidentin hitlerçi cəlladları qəhrəmanlaşdıran Ermənistana qarşı mübarizəyə dünyanın güclü yəhudi təşkilatlarını da qoşmasını ekspertlər necə dəyərləndirir? Sözügedən məsələni baki-xeber.com-a şərh edən politoloq Məhəmməd Əsədullazadə ölkə başçısının bununla bağlı fəaliyyətinə müsbət prizmadan yanaşdı: “Əvvəla, Bakıda keçirilən dini liderlərin 2-ci Sammiti ölkəmizin siyasi-dini mövqeyinin əhəmiyyətli şəkildə güclənməsinə xidmət edir. Burada verilən mesajlar həqiqətən də dünyanın bugünkü problemləri fonunda aktual əhəmiyyət kəsb edirdi. Təəssüf ki, bu gün ksenofobiya, antisemitizm, hətta faşizm yenidən dirçəlir və qlobal bir böhrana qədəm qoyur. Dünya üçün təhlükəli olan bir ideologiyanın yenidən, hətta dövlət səviyyəsində təbliği yeni çalarlar alır. Belə olan təqdirdə sülh və təhlükəsizlik, xalqların qarşılıqlı əməkdaşlığı sual altına düşür. Məhz Ermənistan bu gün faşizm ideyalarını təbliğat siyasətinə çevirib. Faşist Qaregin Njdeyə abidə qoyulması, bunun təbliğ edilməsi regionumuz üçün də təhlükə vəd edir. Hesab edirəm ki, Prezident İlham Əliyevin yəhudi din xadiminə bu xüsusda danışması dünya yəhudilərinin ermənilərin bu “sevgisinə” qarşı mübarizə aparmasına gətirə bilər. Bəli, bu gün faşizm Ermənistanda məhz Azərbaycana qarşı yönəlib. Bunu dünya miqyasına çıxarmaq, işğalçı ölkənin bu kimi təbliğatının qarşısını vaxtında almaq bəşəriyyəti yeni bəladan qorumaq deməkdir. Prezident İlham Əliyevin yəhudiləri erməni-faşizm tandeminə qarşı mübarizəyə dəvət etməsi müəyyən bir prosesə gətirəcək. Yəni yəhudi təşkilatlarının bu yöndə aktivliyini artıracağı gözlənir”.

Vidadi ORDAHALLI

Son xəbərlər