14/12/2019 12:34
728 x 90

Dağlıq Qarabağ dini münaqişə deyil – dünya din xadimləri münaqişə ilə bağlı Bakıda yeni “ideoloji silah” əldə etdilər...

Seyid Camal Əzimbəyli: “Bu cür yanaşma Azərbaycanın mövqelərinin daha da güclənməsinə xidmət edir”

img

“Münaqişələri din amilinə bağlamaq cəhdlərini də çox ciddi şəkildə pisləməliyik. Bu nümunələrdən biri uzun illər davam edən Ermənistan-Azərbaycan Dağlıq Qarabağ münaqişəsidir”.

Bunu Prezident İlham Əliyev Dünya Liderlərinin II Bakı Sammitinin açılışı zamanı bildirib.

Ölkə başçısı deyib ki, Dağlıq Qarabağ əzəli və tarixi Azərbaycan torpağıdır:“Azərbaycan xalqı əsrlər boyu bu torpaqda yaşayıb yaratmışdır və qədim xəritələrdə, eyni zamanda çar Rusiyasının XX əsrin əvvəllərində çap edilmiş xəritələrində Dağlıq Qarabağa aid olan ərazidə bütün toponimlər Azərbaycan mənşəlidir. Qarabağ xanlığı Azərbaycan xanlığı olmuşdur. Sadəcə olaraq, XIX əsrin əvvəllərində ermənilər Dağlıq Qarabağa köçürülmüşlər və XX əsrdə orada milli tərkib böyük dərəcədə deformasiyaya uğramışdır”.

Ermənilər və onların havadarları zaman-zaman Dağlıq Qarabağ münaqişəsinə dini don geydirməyə çalışıblar. Guya bunun kökündə dini faktorlar dayanır. Bu səbəbdən xristian ermənilər sıxışdırılır və s. Ancaq Prezident İlham Əliyev çıxışında bir daha bəyan etdi ki, bu belə deyil. Münaqişənin dinlə yaxından və uzaqdan heç bir əlaqəsi yoxdur. Münaqişənin səbəbi etnik separatizmdir. Hansı ki, Ermənistan Qarabağda etnik separatizmi alovlandıraraq Azərbaycanın 20 faiz ərazisini işğal edib. O baxımdan ölkə başçısının çıxışında Dağlıq Qarabağ münaqişəsinin dini münaqişə olmaması ilə bağlı səsləndirdiyi fikirlər Azərbaycanın beynəlxalq mövqelərinin möhkəmlənməsində necə rol oynayacaq?

  • “Bu baxımdan, ölkə başçısının tədbirdə Qarabağla bağlı verdiyi mesaj çox önəmlidir”

Məsələyə münasibət bildirən şərqşünas Seyid Camal Əzimbəylinin sözlərinə görə, bu cür yanaşma Azərbaycanın mövqelərinin daha da güclənməsinə xidmət edir:“Ermənilər hər zaman çalışıblar ki, münaqişəni dini müstəviyə keçirsinlər. Ancaq həqiqət ondan ibarətdir ki, torpaqlarımız işğal edilib. Münaqişənin kökündə erməni separatizmi dayanır. Bu baxımdan, ölkə başçısının tədbirdə Qarabağla bağlı verdiyi mesaj çox önəmlidir. Bu bütün dünyada Azərbaycanı istəməyənlərə tutarlı mesaj oldu. Qarabağ həqiqətləri ilə bağlı beynəlxalq arenada Azərbaycan dövlətinin apardığı siyasətə bu Sammit böyük bir stimul olacaq. Fikrimcə, bu, Azərbaycan dövlətinin, xalqının bir uğurudur. Dövlətin mühafizə olunması, qorunması bir iman məsələsidir. Biz dövlətsizliyin acı nəticələrini Suriyada, İraqda, Yəməndə gördük və Allah qorusun, ən təhlükəlisi dövlətsizlikdir. Ardıcıl belə tədbirlərin, xüsusi olaraq dünyanın dini liderlərinin Bakıda Qarabağla bağlı ölkə başçısının dilindən səslənən o mesajı dinləməsi və öz ölkələrində Qarabağla bağlı həqiqətlərin çatdırılmasında müstəsna xidmətləri ola bilər. Bizim üçün hər şeydən irəlidə gələn bir dəyər var: Azərbaycanın milli maraqları. Sözdə deyil, əməldə, fəaliyyətdə olan hər bir şəxs Azərbaycan dövlətinin və Azərbaycanın milli mühafizəsini istəyən şəxslərdir. Allah-Təala dövlətimizin, xalqımızın düşmənlərinə heç bir zaman fürsət verməsin”.

Vidadi ORDAHALLI 

Son xəbərlər