12/12/2019 01:31
728 x 90

Almaniyada ifşa əməliyyatı Müsavat Partiyasında sıravilərin kütləvi istefalarına səbəb ola bilər...

Məhərrəm Zülfüqarlı: “Hesab edirəm ki, məlum hadisələrdən sonra sıravi müsavatçıların kütləvi şəkildə partiyadan getməsi qaçılmazdır”

img

Xəbər verildiyi kimi, Almaniyanın hüquq-mühafizə orqanları Azərbaycanda müxalifət partiyalarının keçmiş fəallarından ibarət cinayətkar şəbəkə üzvlərinin işini araşdırmaqda davam edir.

Qeyd edək ki, Almaniya polisinin apardığı araşdırma nəticəsində müxalifət partiyalarının 7 fəalı, xüsusən də Müsavat Partiyasından olan üzvlərin miqrant alveri məqsədi ilə vahid cinayət qrupu yaratdıqları məlum olub. Hazırda onlar Azərbaycandan miqrantların qanunsuz yollarla ölkəyə gəlməsini təşkil etməkdə ittiham olunurlar. Cinayətkarlar göstərdikləri xidmətə görə 3-10 min avro arası pul alıblar. Nəticədə Bavariyada yerli rəhbərlik siyasi təqiblərə görə sığınacaq almış çox sayda miqrantı Azərbaycana deportasiya etmək qərarına gəlib. Onların hamısı məhz Müsavat Partiyasının vəsiqələri əsasında sığınacaq alıblar.

Mühacir alverində Müsavat Partiyasının adının hallanması ölkə ictimayətində böyük rezonansa səbəb olub. Xüsusən də sıravi müsavatçılar arasında bu, böyük ruh düşkünlüyünə səbəb olub. Hansı ki, onların arasında saf niyyətlə bu partiyaya qoşulanlar var və illərini bu təşkilata həsr ediblər. Demokratiyadan, azadlıqdan dəm vuran partiyanın mühacir alveri ilə bu və ya digər dərəcədə məşğul olması, bunun faktlarla sübut olunması, heç şübhəsiz, Müsavat Partiyasına təsirsiz ötüşməyəcək. O baxımdan maraqlıdır, bütün bunlar sıravi müsavatçıların kütləvi şəkildə partiyadan getməsinə necə təsir göstərəcək?

  • “Xüsusən də əqidəli insanlar orada qalmayacaq...”

Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bütün bunlardan sonra sıravi müsavatçıların partiyadan getməsi qaçılmazdır: “Əvvəla, mühacir alveri çoxdan başlayıb. Hətta siyasətə aid olmayan, heç partiyaya dəxli olmayan insanlar bilərəkdən mitinqdə qarşıdurma yaratmaqla, şəkillərini çəkdirməklə mühacir statusu əldə edib. Belə insanlar saxta sənədlər düzəldib müxtəlif  ölkələrə gediblər. Əsasən də Almaniyaya. Bütün bu saxtakarlıqları hamı bilirdi. Sadəcə olaraq Avropa buna göz yumurdu. Ancaq son illərdə Avropada miqrantların sayı kəskin artdığına görə qanunsuz mühacir statusu alanları ölkədən çıxarırlar. Hansı ki, əvvəl müxtəlif ölkələrdən gələn miqrantları həvəslə qəbul edirdilər. İndi onlarda böhran yarandığına görə bu məsələyə ciddi yanaşmağa başlayırlar. Bütün bunlara rəğmən, Müsavat Partiyasının adının miqrant alverində hallanması xoşagələn hal deyil. Xüsusən də milli partiya üçün bu xoşagələn hal sayıla bilməz. Ona görə də, partiya mənsubiyyətindən asılı olmayaraq kimlər bu işlə məşğul olubsa mütləq cəzalandırılmalıdır. Hətta partiyadan xaric edilməlidir. Partiya rəhbərliyi bunda iştirak edibsə, onlar da cəzalandırılmalıdır  ki, gələcəkdə Azərbaycan adına ləkə gətirən belə hallar olmasın. Hesab edirəm ki, məlum hadisələrdən sonra sıravi müsavatçıların kütləvi şəkildə partiyadan getməsi qaçılmazdır. Bu, sözügedən təşkilatda ruh düşkünlüyü yaradacaq. Xüsusən də əqidəli insanlar orada qalmayacaq”.

Vidadi ORDAHALLI

Son xəbərlər