Bir çox KİV-də noyabrın 17-də Rusiya tərəfinin təşəbbüsü ilə Azərbaycana 5-6 nəfərlik erməni jurnalist qrupunun gələcəyi haqda xəbər yayılıb. Eyni zamanda, noyabrın 18-19-da Azərbaycan jurnalistlərinin bir qrupunun Ermənistana səfərinin planlaşdırıldığı bildirilir.
Xatırladaq ki, bundan əvvəl Rusiya Xarici işlər naziri Sergey Lavrov Moskvada ATƏT-in Baş katibi Tomas Hermingerlə keçirdiyi brifinqdə Qarabağ münaqişəsi tərəflərinin “vəziyyəti bir az yumşaltmaq və etimad atmosferinin yaradılmasını dəstəkləmək üçün” jurnalistlərin qarşılıqlı səfərləri barədə razılıq əldə etdiklərini açıqlamışdı. Ehtimallar var ki, jurnalistlərin qarşılıqlı səfəri həmin layihənin tərkib elementinə aiddir.
“Yeni Nəsil” Jurnalistlər Birliyinin rəhbəri Arif Əliyev bildirib ki, bu səfərin təşkili və seçimində əlaqə və iştirakı yoxdur. Arif Əliyev deyib ki, “Mənə müxbir yaxınlaşıb soruşdu, mən də dedim bu barədə eşitmişəm, amma bizim bu səfərlə, təşkilatçılıqda heç bir iştirakımız yoxdur”.
Bu səfərlərdə özünün iştirak edib-etməyəcəyinə gəlincə, Arif Əliyev vurğulayıb ki, bu, Rusiya hökumətinin təşəbbüsüdür: “Rusiyanın Xarici işlər naziri Sergey Lavrov Azərbaycan və Ermənistan jurnalistlərinin qarşılıqlı səfərini təşkil etməyin vacibliyini vurğulamışdı, söyləmişdi ki, bununla bağlı konkret iş gedir. Bu barədə əvvəllər də soruşublar, cavabım “yox” olub, ehtiyac və imkan olsa, bu sahədə öz işimizi qura bilərik. Jurnalistika sahəsində əlaqələrin yaradılmasını perspektivli hesab etmirəm, bu proses gedərsə, bir neçə istiqamətdə paralel olaraq getməlidir”.
Qeyd edək ki, yayılan bu xəbər Azərbaycan jurnalistləri arasında birmənalı qarşılanmayıb. Tanınmış jurnalist Azər Rəşidoğlu jurnalistlərin qarşılıqlı səfərləri ilə bağlı fikirlərini paylaşıb. Biz jurnalistin sosial şəbəkədə bu mövzu ilə bağlı paylaşdığı mövqeyini olduğu kimi təqdim edirik: “Erməni jurnalistlərin Bakıya, bizim jurnalistlərin İrəvana və işğalda olan Qarabağa səfərlərinə müsbət yanaşmıram. Bu layihə başlayan gündən ilk təklif alanlardan olmuşam və o vaxt verdiyim cavab dəyişməz qalır - İrəvana və işğal altında olan Qarabağa yalnız tankla gedə bilərəm. Heç bir sülhməramlı səfər və layihəni qəbul etmirəm. Torpaqlarımızı azad etmirlərsə, savaş tərəfdarıyam. Torpaq uğrunda qan tökmək bir şərəfdir, özüm və doğmalarım fəda olsun bu torpağa. "Günahsız erməni" imici yaradanlar sonunda Mübarizləri qatil çıxardacaqlar. Torpaq uğrunda ölməkdən və öldürməkdən böyük şərəf yoxdur”.
Məlumdur ki, Ermənistan, başda Paşinyan olmaqla, danışıqlar prosesinə açıq dirəniş göstərir. Onların son davranışlarında konstruktivlikdən əsər-əlamət yoxdursa, jurnalistlərin qarşılıqlı səfərlərinin Dağlıq Qarabağla bağlı sülh prosesinə nə kimi təsiri ola bilər?
“B bütün bunlar sülhün möhkəmlənməsi layihəsi çərçivəsində olunursa, biz bunun əlamətlərini qəti müşahidə etmirik”
Media eksperti Azər Həsrət qəzetimizə açıqlamasında bildirdi ki, belə səfərlərin sülh prosesinə hansısa müsbət təsirinin ola biləcəyini iddia etmək mümkün deyil: “Əvvəla, bu səfərlə bağlı məndə dəqiq bilgi yoxdur. Mən də bunu mətbuatdan oxumuşam. Kim gələcək, kim gedəcək, bunu burdan və ya ordan kim təşkil edir? Bu barədə dəqiq məlumat verilmir. Məlumat doğru olsa belə, indiki məqamda bunun baş tutmasını məqbul saymıram. Əgər bütün bunlar sülhün möhkəmlənməsi layihəsi çərçivəsində olunursa, biz bunun əlamətlərini qəti müşahidə etmirik. Belə səfərlərlə bağlı əvvəlcədən hazırlıq aparılmalıdır ki, ictimai rəy buna hazır olsun. Nə Azərbaycan ictimai rəyi, nə də jurnalistikası hər hansı bir hazırlıq mərhələsini keçib. Yəni izah olunmayıb ki, bunlar necə gəlir, necə gedir, nəticə nəyə hesablanır. Gedib kimlə orda görüşəcəklər və ya onlar gəlib burda nə edəcək? Bunlar aydınlaşmayıb. Kimsə bunu gerçəkləşdirirsə, məsələ olduqca çiydir. Bu da xeyirdən çox ziyan gətirə bilər. Mən düşünürəm ki, belə alayarımçıq iş görməyə ehtiyac yox idi. Azərbaycan cəmiyyətində bir müddət əvvəl bunun müzakirəsi aparıldı. Onda biz də öz fikirlərimizi dedik ki, intensiv deyil, məhdud çərçivədə bu cür görüşlərin, gediş-gəlişlərin olmasının əleyhinə deyilik, amma istənilən halda məsələnin tam olaraq şəffaf təqdimatı lazımdır. Həm də bunun üçün uyğun şərait olmalıdır. İndiki halda mən bu şəraiti görmürəm. Çünki Ermənistan rəhbərliyi özünü sülhə yaxın olan tərəf kimi aparmır. Rusiyanın patronajlığı altında keçirilən layihədən isə ümumiyyətlə fayda gözləmirəm. Çünki həmin ölkə işğal faktının arxasında duran dövlətdir”.
Məhəmmədəli QƏRİBLİ
