Dünyanın diqqət mərkəzində olan paytaxtımızda tez-tez beynəlxalq səviyyəli tədbirlər, sammitlər, toplantılar keçirilir. Şərqlə Qərbin qovuşağında yerləşən ölkəmizdə keçirilən bu toplantılardan dünya ictimaiyyətinə çox vacib mesajlar verilir.
Məlum olduğu kimi, noyabrın 14-də Bakıda Dünya dini liderlərinin II Sammitində dünyanın 500-dən çox dini lideri iştirak edib. Onlar Azərbaycandakı multikulural, tolerant mühitlə tanış olublar, eyni zamanda da Prezident İlham Əliyevin sammitin açılış mərasimindəki çıxışı zamanı Dağlıq Qarabağ problemi haqqında dəqiq məlumat alıblar. Dini liderlər aydın şəkildə gördülər ki, Azərbaycan təcavüzkar ölkə deyil, inkişaf edən, mədəni, tolerant bir ölkədir. Sammitdə iştirak edən dünyanın 500-dən artıq dini lideri erməni hərbçiləri qədər aqressiv mövqe tutan erməni katolikosu qarşısında hər hansı bir dini demarş edə bilərlərmi? Dağlıq Qarabağ məsələsi ilə bağlı katolikosa təzyiq göstərə, ona çağırışlar edə, təcüvüzlə bağlı başqa mövqe tutmasına təsir edə bilərlərmi?
“Dini liderlər bilirlər ki, Azərbaycan torpaqlarının Ermənistan tərəfindən işğal altında saxlanmasına erməni katolikosu açıq dəstək verir”
Azərbaycan Milli Elmlər Akademiyasının Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, dünya dini liderlərinin erməni katolikosuna bu məsələdə təsir göstərməsi, onun mövqeyinin dəyişməsinə nail olması tam mümkündür. “Əvvəla deyim ki, dünya dini liderlərinin II Bakı Sammiti bizim tarixşünaslığımız, tariximiz üçün çox böyük əhəmiyyət daşıyır. Dünyanın xristian, eyni zamanda da müsəlman dini liderlərinin bu sammitdə iştirakı ölkəmizə göstərilən böyük diqqət və hörmətdir. Bu, dövlətçilik ənənələrimiz üçün də çox təsirli, qiymətli bir hadisədir. İkinicisi, bu sammitdə 500-dən artıq nüfuzlu dini liderin iştirakı, onların burada əsl həqiqətləri dinləməsi dövlətimizin, xalqımızın ən böyük problemi olan Dağlıq Qarabağ münaqişəsinin ədalətli həllinə birmənalı olaraq müsbət təsir göstərə bilər. Sammitdə elə dini liderlər iştirak edir ki, onlar xristian dünyasında böyük nüfuza malikdirlər və erməni katolikosuna da təsir etmək, onu öz mövqeyini dəyişməyə məcbur etmək gücünə sahibdilər. Erməni katolikosunun açıq şəkildə Ermənistanın Dağlıq Qarabağa təcavüzünü dəstəkləməsi, işğalçılarla həmrəylik göstərməsi dünyanın dini liderlərini də narahat etməlidir. Hesab edirəm ki, onlar katolikosa güclü təsir edə bilərlər. Dünyanın elə dövlətləri var ki, bütün siyasi məsələlərdə dini mərkəzlərlə daha çox məsləhətləşirlər, bu mərkəzləri daha çox eşidirlər. Hətta Moskvanın və Bütün Rusiyanın dini lideri Kirilin, eləcə də digər nüfuzlu din xadimlərinin bu sammitə qatılması onu göstərir ki, onlar Azərbaycana çox diqqətlə yanaşırlar və Azərbaycan torpaqlarının Ermənistan tərəfindən işğal edildiyini bilirlər, bu problemin həlli üçün çalışacaqlar. Dünya dini liderləri erməni-qriqorian kilsəsinin neqativ fəaliyyəti haqqında məlumatlıdırlar. Dini liderlər bilirlər ki, Azərbaycan torpaqlarının Ermənistan tərəfindən işğal altında saxlanmasına erməni katolikosu açıq dəstək verir. Onlar yaxşı bilirlər ki, erməni qriqorian kiləsi siyasətə, korrupsiyaya bulaşıb. Dünya dini liderləri xristianlığa ləkə olan erməni xristianlığının iç üzünü yaxşı tanıyırlar. Hesab edirəm ki, dünyanın dini liderləri istəsələr, erməni katolikosuna təsir edə, onun Dağlıq Qarabağ probleminə münasibətinin, mövqeyinin kökündən dəyişməsinə nail ola bilərlər. Bunun da nəticəsində Dağlıq Qarabağ probleminin həlli istiqamətində yeni addımlar atılmış olar”.
Q.Hacıyevin qeyd etdiyinə görə, erməni katolikosunun bu sammitə qatılmaması onu göstərir ki, o, açıq şəkildə olmasa da, dolayı yolla Ermənistanın Azərbaycan torpaqlarını təcavüzə məruz qoyduğunu etiraf edir. Q.Hacıyevin fikrincə, II Qaragen bu sammitə qatılardısa, onu burada dünyanın dini liderləri Azərbaycan torpaqlarının işğalda saxlanmasına dəstək verən bir şəxs kimi ittiham edərdilər.
İradə SARIYEVA
