09/12/2019 19:27
728 x 90

Cinayətkar dəstənin cəzalandırılması vacibdir, lakin uşaqların deportasiyası Almaniyanın humanist prinsiplərinə uyğundurmu...(?)

Vüqar Rəhimzadə: “Bu işdə günahı olmayan uşaqların, qocaların necə gəldi deportasiya edilməsi humanizm prinsipləri ilə uzlaşmır”

img

Məlum olduğu kimi, Almaniya federal kriminal polisi mühacir alveri ilə məşğul olan azərbaycanlılardan ibarət dəstəyə qarşı əməliyyat keçirib. Ölkənin Nidersaksen, Şlezviq-Holşteyn, Bremen, Şimali Reyn Vestfaliya, Bradenburq və Reynland-Pfalts əyalətlərində 38-dən çox ev və iş yerlərinə basqın edilib.

Nəticədə mütəşəkkil cinayətkar dəstənin üzvlərindən 7-si saxlanılıb. Təbii ki, mühacir alveri ilə məşğul olub insanları aldadanlar, qanunu pozub bir sıra cinayət əməllərinə yol verənlər öz layiqli cəzasını almalıdır. Bütün mümkün qanuni vasitələrdən istifadə edilməli və məsələ ətraflı araşdırılmalıdır. Çünki ortada ciddi qanunsuz fəaliyyətin olması faktı mövcuddur.  

O da məlumdur ki, son iki gündə Almaniyadan 11 Azərbaycan vətəndaşı deportasiya edilib. Onlar Almaniyanın Şimali Reyn Vestfaliya əyalətinin Geseke şəhərində yaşayan Ülviyyə və Əfran Mütəllimovlar, Aaxen şəhərindən Toğrul Məmmədov, Hamm şəhərindən Azər Əliyev həyat yoldaşı və iki uşağı ilə, Bavariya əyalətindən isə İmran Davudov, Ülviyyə Davudova və onların övladları - 11 yaşlı Fatimə və 9 yaşlı Binnət Davudovalardır. Azərbaycan vətəndaşları Bayroyt və Düsseldorf hava limanlarından transfer uçuş vasitəsilə Azərbaycana deportasiya ediliblər. Onlar sığınacaq istəklərinin geri çevrilməsi ilə bağlı Almaniya Miqrasiya və Qaçqınlarla iş üzrə Federal İdarəsinin (BAMF) qərarından məhkəməyə dəfələrlə şikayət etsələr də, deportasiyadan xilas ola bilməyiblər.

Digər məlumata görə, bu ilin yanvarından yaz aylarına qədər 500-ə yaxın azərbaycanlı Almaniyadan deportasiya olunub. Halbuki, onlar arasında 8-9 il bu ölkədə yaşayanlar da var. Əvvəllər qanunsuz gələnlər 10-12 il Almaniyada yaşayırdılar. Sonra humanitar əsaslarla oturum alırdılar. Məlumata görə, indi vəziyyət dəyişib. Belə ki, köhnə dosyelərə baxılır və neçə il yaşamasından asılı olmayaraq, bəzi miqrantlar ölkədən deportasiya olunur.

Bütün bunlarla yanaşı, aparılan deportasiya zamanı uşaqların ölkədən çıxarılması Almaniya kimi bir ölkənin humanist prinsiplərinə nə dərəcədə uyğundur?

  • “Özü də Almaniya kimi inkişaf etmiş bir ölkədə bunların baş verməsi həmin dövlət barədə yaxşı təəssürat yaratmır”

Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, azyaşlı uşaqlara yönəlik bu cür addımlar Almaniyanın humanizm prinsiplərinə uyğun deyil: “Hər bir ölkənin öz qanunları var. Almaniyanın da özünün qanunları olduğuna görə, təbii ki, orada yaşayanlar buna hörmət etməlidilər. Ümumiyyətlə, istənilən ölkəyə mühacirət edənlər oradakı qanunlara uyğun hərəkət etməlidir. Bu arada, Almaniyada mühacir alveri ilə məşğul olan azərbaycanlılardan ibarət dəstənin ifşa edilməsi, onların məsuliyyətə cəlb edilməsi müsbət haldır. Məlum olur ki, bu şəxslər insanların etibarından sui-istifadə edərək bir sıra qanunsuz əməllərə yol veriblər. Təbii ki, bunda günahı olanlar qanuna uyğun şəkildə cəzalandırılmalıdır. Ancaq bu işdə günahı olmayan uşaqların, qocaların necə gəldi deportasiya edilməsi humanizm prinsipləri ilə uzlaşmır. Özü də Almaniya kimi inkişaf etmiş bir ölkədə bunların baş verməsi həmin dövlət barədə yaxşı təəssürat yaratmır. Almaniya iqtisadi baxımdan Avropa İttifaqının lokomatividir. Əhalinin sayına görə isə Aİ-də birinci yerdədir. Uşaqlarla bağlı məsələdə Almaniya gərək humanist prinsiplərdən çıxış etsin. Çünki uşaqlar günahsızdır. O səbəbdən uşaqlara yönəlik bu cür yanaşma humanizm prinsiplərinə uyğun deyil”.

Vidadi ORDAHALLI

Son xəbərlər