Artıq iki gündür ki, Müsavat Partiyası fəallarının Almaniyada saxta mühacir alveri ittihamı ilə həbs olunmaları ətrafında aparılan müzakirələr siyasi gündəmdən düşmür. Qeyd edək ki, alman polisinin reydləri zamanı 60-a yaxın şəxsin saxlandığı deyilir.
Onların arasında Müsavatın Avropa qanadının rəhbərliyində təmsil olunan və daima partiyaya dəstək verən şəxslər var. Maraqlıdır ki, hadisənin ilk günü ərzində Müsavat rəhbərliyi heç bir açıqlama verməyib. Bizim də bu istiqamətdə etdiyimiz cəhdlər uğursuz alındı. Yalnız gecə saatlarında partiyanın başqanı Arif Hacılı öz “Facebook” səhifəsində məsələnin mahiyyətilə uzlaşmayan bir status paylaşdı. Müsavat rəhbərinin fikirlərini olduğu kimi təqdim edirik:
"Avropadan soydaşlarımız deport olunur. Onların öz məqsədi var. Ərazisində miqrantların sayını mümkün qədər azaltmaq hər Avropa ölkəsinin dövlət siyasətidir. Azərbaycanda nə baş verir? Bu olaydan hərə öz məqsədi üçün yararlanmağa çalışır. Real TV və başqa dövlət kanalları şadyanalıq edir. Biriləri bundan siyasi opponentlərə qarşı istifadə etməyə çalışır. Deport olunanlar arasında bir neçə ailə, xeyli çocuqlar var. Onları ən azı saxlanma, aşağılanma, sorğu-sual gözləyir. O qadınların, çocuqların üzüntüsünü, ürəklərinin sızıltısını, o üzüntüyə görə məhv olan ataların iztirabını düşünürsüzmü? Onlar Avropaya kefindən getməmişdilər. Bu yolla həyatlarını xilas etmək istəyirdilər. Bu da alınmadı. Nəyə sevinirsiniz? Nəyi bayram edirsiniz? Biz ki, belə amansız millət deyilik?! Bizə nə oldu?"
Şox maraqlıdır ki, Arif Hacılı bu statusu ilə sanki diqqəti gündəmdə olan mövzudan başqa istiqamətə yönəltməyə çalışıb. Təbiidir ki, uşaqlı azərbaycanlı ailələrin deport olunması bizim üçün də xoş deyil. Ancaq yaxşı olardı ki, Arif Hacılı Avropada müsavatçılardan ibarət böyük bir dəstənin cinayət başında yaxalanması və “bu işdə partiya rəhbərlərinin də əli var” iddialarına aydınlıq gətirsin. Müsavat Partiyası rəhbərliyinin bu ittihamları cavablandırmaq gücündə olmadığını konkret faktlara əsasən telejurnalist Mahir Məmmədli də öz statusunda yazıb: “Gəlmişik Müsavat Partiyasının başqanı Arif Hacılıdan müsahibə almağa. Özü qərargahda olmasa da, köməkçisi ilə xəbər göndərdi ki, müsahibə vermək istəmir. Biz isə israr elədik. Çünki söhbət çox ağır ittihamlardan, Arif Hacılının özünün yazdığı kimi, evlərini satıb saxta mühacirlik üçün külli miqdarda vəsait ödəyən insanların aldadılmasından, ailələri ilə Almaniyadan deportasiya edilməsindən gedir.
Arif Hacılı isə qərargaha gəlmək, ittihamlara cavab vermək əvəzinə bizə Facebook-dan söz göndərir. Bilirsiniz niyə? Çünki deyəcək sözü yoxdur. Partiya sədri bir jurnalistin sualından çəkinib öz qərarhagına gəlmir. Onun statusunun altındakı şərhlərdə bizi linçlə hədələyirlər. Arif Hacılı isə bu şərhə münasibət bildirmir. Arif Hacılı bilir ki, saxta mühacir əməliyyatının başlamasında jurnalistlərin rolu olub. Məhz biz saxta arayışları, saxta möhürləri nümayiş etdirmişdik”.
Qeyd edək ki, Müsavat rəhbərliyinin hadisəyə münasibət bildirməməsi tanınmış müsavatçıların da etirazına səbəb olub. ABŞ-da yaşayan tanınmış müsavatçı Ramiz Yunus oz “Facebook” səhifəsində Arif Hacılını istefaya çağıraraq bunları yazıb:“Gəlin hər şeyi öz adi ilə adlandıraq: Almaniyadakı mühacirlərə saxta sənədlərin verilməsi ilə bağlı yaşanan qalmaqal bir daha Müsavat Partiyasının imicinə zərbə vurdu və Alman federal polisi tərəfindən açilmiş cinayət işində adı hallanan Avropada bu partiyanın AKM adi altinda yaradilan mərkəzinin təşəbbüskarı şəxsən indiki başkan Arif Hacılıdir. Bütün sivil dünyada belə hallarda partiyanı zərbədən uzaqlaşdirmaq ücün onun rəhbəri istefa verir və məhz buna görə, hörmətli Arif bəy, istefa mədəniyyətini göstərməyinizi və bu biabırçı vəziyyətin öhdəsindən gəlmək üçün növbədənkənar partiya qurultayını çağırmağı məsləhət görürəm”.
Müsavat rəhbərliyindən Avropada baş verən həbslərlə bağlı mövqe öyrənə bilmədiyimiz üçün “belə vəziyyətdə partiya hansı reaksiyaları verməlidir” sualı ilə kənar bir ekspertə müraciət etdik. Hüquqşunas Mehman Muradlı “Bakı-Xəbər”ə bildirdi ki, burdan konkret nəticə çıxarmaq olar: “Deməyə sözləri yoxdur ki, yayınırlar. Nə deyəcəklər? Arif Hacılı deyə bilməz ki, Mehdi Xəlilbəylini tanımır. Bundan əlavə, Mehdi Xəlilbəyli və digərlərinin əməllərinə haqq qazandıra bilməz. Onlar barədə partiyadan çıxarılma qərarı çıxarsalar da vəziyyət yaxşı olmaz. İstintaqda Müsavat rəhbərliyi barədə “yağlı” ifadələr verə bilərlər. Bütün bunlar Müsavat rəhbərliyini çıxılmaz vəziyyətə salıb. Məhz bu səbəbdəndir ki, Arif Hacılının ilk açıqlaması bir qədər təsirli notlar üzərində quruldu və tamamilə başqa mövzunu əhatə etdi. Ancaq biz sıravi, lakin tanınmış müsavatçıların dünyanın müxtəlif ölkələrindən bu məsələyə kəskin reaksiya verdiklərini görürük. Hətta həmin mövqelərin əksəriyyətində Arif Hacılı istefaya çağırılır. Müsavat rəhbərliyinin başqa bir narahatlığı istintaqın bir qolunun da onlara qədər uzana biləcəyi ilə bağlıdır. Artıq ölkəyə qaytarılan vətəndaşlar var. Onların izahatlarından sonra bir çox mətləblərə aydınlıq gələcək. İstənilən halda, bu hadisə həm hüquqi, həm siyasi, həm də mənəvi baxımdan Müsavatın imicinə böyük zərbə vurdu. Yəqin ki, yaxın zamanlarda məhz bu hadisəyə görə partiyadan kütləvi istefaların olacağını da müşahidə edəcəyik”.
Məhəmmədəli QƏRİBLİ
