Almaniyanın 6 əyalətində 38-dən çox ev və iş yerlərinə olan polis müdaxiləsi zamanı Almaniyada qanunsuz miqrasiya işləri ("miqrant alveri") ilə məşğul olmaqda şübhəli bilinən cinayətkar dəstənin saxlanan üzvləri barəsində yerli federal məhkəmələr tərəfindən 6 ay müddətinə həbs-qətimkan tədbiri seçilib.
Barələrində həbs-qətimkan tədbiri seçilən şəxslər aşağıdakılardır:
1. Elçin Əkbərov - Ədliyyə Nazirliyi Penitensiar Xidmətinin 9 və 14 saylı məntəqə tipli cəzaçəkmə müəssisələrinin sabiq rəisi, 2. İlham Həsən - Müsavat Partiyası Avropa Koordinasiya Mərkəzinin (Müsavat AKM) sədri, 3. Mehdi Xəlilbəyli - Müsavat Partiyasının üzvü, Müsavat AKM sədrinin müavini, 4. Abdin Cavadov - Müsavat AKM-in üzvü, 5. Əlövsət Əliyev - “Leqat” inteqrasiya mərkəzinin rəhbəri, sabiq polis rəisi, 6. Rəşad Məmmədov, 7. Elşən Abdullayev - Müsavat Partiyasının üzvü.
İlk baxışdan adi gələn bu adlar arasında, əslində, məşhurluğu ilə seçilənlər də az deyil. “Bakı-Xəbər” olaraq siyahıda olanlarla bağlı araşdırmalar apardıq.
Siyahda adı keçən məşhur şəxslərdən biri Mehdi Xəlilbəylidir. Söhbət Müsavat Partiyasının fəallarından olmuş Mehdi Xəlilbəylidən gedir. Əslən Şərur rayonunun Siyaqut kəndindən olan Mehdi Xəlilbəyli 2003-cü ilin 15-16 oktyabrında Müsavat Partiyası qərargahı önündə baş verən hadisəyə görə Azərbaycanın hüquq-mühafizə orqanları tərəfindən axtarışa verilib. Onun telejurnalist Sahil Kərimlinin döyülməsi faktına görə axtarışa verildiyi bildirilir. Elə həmin vaxtdan Mehdi Xəlilbəyli ölkəni gizli yollarla tərk edərək, Almaniyada yaşayır. Orada yaşadığı müddət ərzində də fəal Müsavatçı kimi özünü aparıb, partiyanın Avropada təşkil etdiyi tədbirlərin sponsoru və təşkilatçısı olub.
Digər maraqlı persona isə Ədliyyə Nazirliyi Penitensiar Xidmətinin 9 və 14 saylı məntəqə tipli cəzaçəkmə müəssisələrinin sabiq rəisi olmuş Elçin Əkbərovdur. Apardığımız araşdırma zamanı müəyyən etdik ki, E.Əkbərovun Almaniyada yerləşməsinə də elə M.Xəlilbəyli kömək edib. M.Xəlilbəyli ilə hazırda siyasi sığınacaq alan E.Əkbərovun arasında yaxın dostluq münasibəti olub. Onların hər ikisi həm də həmyerlidirlər, əslən Şərur rayonundandırlar.
Maraqlıdır ki, E.Əkbərovun Azərbaycanda işləri pis getməyib. Onun mənsub olduğu ailənin hazırkı hakimiyyətlə heç bir kəsişən marağı da olmayıb. Əslən Şərur rayonunun Yuxarı Daşarx kəndindən olan Elçinin anası Nigar xanım fəal YAP-çılardan sayılır. Onun Mahir Əkbərov adlı qardaşı isə polis orqanlarında çalışıb. M.Əkbərovun həyat yoldaşı dələduzluqda təqsirli bilinib həbs ediləndən sonra onun özünü də polis orqanlarından xaric ediblər. Bizə məlumat verən mənbənin sözlərinə görə, paytaxtda böyük biznes obyektləri olan E.Əkbərovun mühacirətə getməsinin kökündə qətiyyən siyasi maraqlar durmur: “Hakimiyyət tərəfindən sıxışdırılan adamın belə var-dövləti olar? Axtarışda olan zaman M.Xəlilbəylinin ölkədən çıxarılmasında o vaxt Elçinin böyük rolu olub. Onların münasibətləri sonra da davam edirdi. Əsasən də bahalı avtomobillərin Almaniyadan ölkəyə gətirilib satılması sahəsində müştərək biznesləri olub. Elçin Əkbərovun guya general Mədət Quliyevlə ziddiyyətinin olması səbəbindən ölkəni tərk etməsi inandırıcı görünmür. Elçinin Almaniyada məskunlaşmasına da məhz Mehdi kömək edib”.
Mənbə bildirir ki, E.Əkbərovun hakimiyyət daxilində böyük himayədarları da olub. Hətta o səviyyədə ki, sabiq rəis 90-cı illərdə həmin dövrün məşhur “Laləndə” restoranında münaqişə zəmnində öz tabel silahı ilə iki nəfəri güllələyərək ağır yaralasa da, sabiq rəis nəinki məsuliyyətə cəlb edilməyib, hətta həmin hadisədən sonra onun karyerasında yüksəliş baş verib.
Siyahıda adı qeyd olunan müsavatçı Abdullayev Elşən Adil oğlu bloger Orduxan Teymurxanın dostudur. Onlar Azərbaycan hökuməti əleyhinə keçirilən aksiyalarda daim bərabər iştirak ediblər. Hər iki şəxs aşkar surətdə kütləvi iğtişaşlara, hakimiyyət nümayəndələrinin qanuni tələbinə tabe olmamağa çağırışlar ediblər.
“Legat” İnteqrasiya Mərkəzinin rəhbəri Əlövsət Əliyev Xalq yazıçısı Sabir Rüstəmxanlının qardaşıdır. AXC hakimiyyəti dönəmində Lerik və Lənkəranda polis rəsi olub. Sonra isə DİN Pasport Qeydiyat İdarəsində rəhbər postda çalışıb. Ölkəni bir neçə il əvvəl tərk edib.
Müsavat Partiyası Avropa Koordinasiya Mərkəzinin sədri kimi həbs edilən İlham Həsən isə AXC hakimiyyəti dönəmində Kəlbəcərin icra başçısı olub. Kəlbəcərin işğalından sonra Elçibəy tərəfindən səriştəsiz fəaliyyətinə görə vəzifəsindən azad olunub. 1998-ci ildən xaricdə yaşayır. Müsavatın indiki və əvvəlki rəhbərləri ilə sıx münasibətlərə malikdir.
Rəşad Məmmədov kimi adı qeyd edilən şəxsin isə M.Xəlilbəylinin sürücüsü və yaxın qohumu olduğu bildirilir. Ölkədə heç bir təqibə məruz qalmayıb. Saxta əsaslarla Almaniyaya sığınıb.
Məhəmmədəli QƏRİBLİ
