Ermənistanın “faşist qəhrəmanlarına” qarşı Azərbaycan Prezidentinin başlatdığı mübarizə konkret nəticə verdi – Armavir demarşı...
Məlum olduğu kimi, Rusiyanın Armavir şəhərində Qaregin Njdenin xatirə lövhəsi qara boya ilə rənglənib. Armavir Şəhər Dumasının deputatı Aleksey Vinoqradov lövhəni şəxsən özü boyayıb.
Bu arada Ermənistanın Rusiyadakı Səfirliyi Armavir Şəhər Dumasının deputatı Aleksey Vinoqradovun erməni xadim Qaregin Njdenin xatirə lövhəsinin üzərini qara boya ilə boyaması ilə əlaqədar bəyanat yayıb. Bəyanatda səfirlik bunu vandalizm aktı kimi dəyərləndirib: “Səfirlik Armavirdə baş verən hadisə ilə bağlı dərin qəzəbini bildirir. Armavir Şəhər Dumasının (Krasnodar əyaləti) deputatı Vinoqradovun əməllərini Erməni Apostol Kilsəsi ərazisində vandalizm aktı kimi qiymətləndiririk”.
Səfirlik hesab edir ki, baş verənlər millətlərarası gərginliyə gətirib çıxara bilər.
Rusiya mətbuatı yazır ki, lövhə 2012-ci ildə erməni kilsəsi ərazisində quraşdırılıb. Bir müddət əvvəl əyalət hakimiyyəti və yerli hakimiyyət, habelə “Rusiya Erməniləri İttifaqı”nın yerli şöbəsinin nümayəndələri Njdenin xatirə lövhəsini sökməyə söz veriblər. Ancaq buna baxmayaraq, lövhə sökülməyib, Vinoqradov onu qaraya boyayaraq, “məsələni özü həll edib”. Hələ 2017-ci ildə Armavir sakinləri hakimiyyət orqanları, hüquq-mühafizə orqanlarına kollektiv bəyanat göndərərək, Qaregin Njde lövhəsini sökməyi tələb ediblər.
Qeyd edək ki, buna qədər Azərbaycan dəfələrlə Ermənistanı faşizm əlbirlərinin qəhrəmanlaşdırılmasında haqlı olaraq ittiham edib. Prezident İlham Əliyev Valdayda və Aşqabadda keçirilən tədbirlərdə Ermənistan hakimiyyəti tərəfindən faşistlərlə əlbir olanların xatirəsinin əbədiləşdirilməsinin yolverilməz olduğunu xüsusi olaraq vurğuladı. Görünən odur ki, ölkə başçısının qətiyyətli mövqe ortaya qoymasından sonra Azərbaycanın bu yöndə apardığı işlər artıq konkret nəticələr verir. Armavirdə yaşananlar məhz bunun nəticəsidir. Çox güman ki, bu proses davamlı olacaq.
- “Bunun nəticəsidir ki, artıq Rusiyada Njde ilə bağlı etirazlar artır”
Məsələyə münasibət bildirən politoloq Elşən Manafovun sözlərinə görə, Armavirdə baş verənlər onu göstərir ki, Prezident İlham Əliyevin Aşqabaddakı çıxışı bu yöndə ciddi nəticələr verir: “MDB dövlət başçılarının Aşqabadda keçirilən toplantısında Prezident İlham Əliyev Ermənistanda faşistlərə xidmət edənlərin abidəsinin əbədiləşdirilməsini kəskin tənqid etdi. Bəyan etdi ki, özünü demokratik hakimiyyət kimi qələmə verən Paşinyan iqtidarı özündən əvəlki dövrdə ölkədə ucaldılan abidəni sökməyib. Bununla ölkə başçısı Ermənistan hakimiyyətinin iç üzünü ortaya qoydu. Ona görə də Armavirdə yaşanan hadisəni Azərbaycan Prezidentinin məlum çıxışı kontekstində qiymətləndirmək lazımdır. Ölkə başçısı Ermənistanın indiki iqtidarını Njdeyə abidə qoyulması məsələsində sərgilədiyi mövqeyə görə ciddi tənqid etdi. Bildirdi ki, Ermənistan hakimiyyəti özünü demokratik hakimiyyət kimi qələmə versə də, Sarkisyan dönəmində faşistlərlə əməkdaşlıq etmiş erməni generalının şərəfinə ucaldılan abidəyə görə bu və ya digər dərəcədə məsuliyyət daşıyır. Prezidentin bu çıxışı MDB dövlətlərində çox ciddi ajiotaj doğurdu. Görünən odur ki, bu çıxış Armavir əhalisinə ciddi sirayət edib. Bunun nəticəsidir ki, artıq Rusiyada Njde ilə bağlı etirazlar artır. Yaşananlar Rusiya-Ermənistan münasibətlərində özünü göstərəcək. Hesab edirəm ki, Rusiyanın digər şəhərlərində də bənzər etirazların baş verməsi qaçılmazdır”.
Vidadi ORDAHALLI
