12/12/2019 01:31
728 x 90

Almaniyada tutulmuş müsavatçılara dair cinayət araşdırması Müsavat Partiyasınadək uzana bilər - gizli biznes... - YENİLƏNDİ

img

Almaniyada miqrant alveri ilə məşğul olan azərbaycanlılardan ibarət dəstə üzvlərinin saxlanması ölkədə əsl şok effekti yaradıb. Almaniya Federal Daxili İşlər Nazirliyinin yaydığı məlumat görə, Federal Kriminal Polis ölkənin Nidersaksen, Şlezviq-Holşteyn, Bremen, Şimali Reyn Vestfaliya, Bradenburq və Reynland-Pfalts əyalətlərində 38-dən çox ev və iş yerində əməliyyat keçirib. Obyektlərdə aparılan yoxlamalar zamanı çoxlu sayda xarici ölkə vətəndaşına aid pasportlar, viza çap edən xüsusi aparatlar, nağd pul və silah tapılaraq götürülüb.

Şimali Reyn Vestfaliya əyalətinin Daxili İşlər Nazirliyindən verilən məlumatda isə deyilir ki, bu əyalətdə 180-ə yaxın polisin iştirakı ilə ev və iş yerlərinə təşkil edilən axtarışlar nəticəsində miqrant alveri ilə məşğul olan şəbəkənin bağlantıları müəyyən olunub. Kriminal polisin Düsseldorf, Köln, Frankfurt və Koblenz şəhərlərində keçirdikləri əməliyyatlar nəticəsində iki Azərbaycan vətəndaşı saxlanıb. Polis onların ilkin ifadələri əsasında azərbaycanlılardan ibarət dəstənin izinə düşüb.

Saxlanan Azərbaycan vətəndaşlarının evlərinə baxış zamanı çoxlu sayda Azərbaycan Respublikasına aid milli pasport, müxtəlif siyasi partiyalara aid üzvlük vəsiqələri, arayışlar, möhür və ştamplar aşkar olunaraq götürülüb. Artıq həbs olunanların adları da bəlli olub. Onlar Ədliyyə Nazirliyi Penitensiar Xidmətinin 9 və 14 saylı məntəqə tipli cəzaçəkmə müəssisələrinin sabiq rəisi Elçin Əkbərov, Müsavat Partiyası Avropa Koordinasiya Mərkəzinin (Müsavat AKM) sədri, Kəlbəcər rayonunun sabiq icra başçısı İlham Həsən, Müsavat Partiyasının üzvü, Müsavat AKM sədrinin müavini Mehdi Xəlilbəyli, Müsavat AKM-in üzvü Abdin Cavadov, sabiq deputat Sabir Rüstəmxanlının qardaşı, “Leqat” inteqrasiya mərkəzinin rəhbəri, sabiq polis rəisi Əlövsət Əliyev, Mehdi Xəlilbəylinin sürücüsü Rəşad Məmmədov, Müsavat Partiyasının üzvü Elşən Abdullayevdir. M.Xəlilbəyli və siyahıda adları keçən şəxslərin bir çoxu Müsavat Partiyasının ən fəal üzvləri sayılır.

Xatırladaq ki, cinayətkar dəstənin saxlanan üzvləri barəsində yerli federal məhkəmələr tərəfindən 6 ay müddətinə həbs-qətimkan tədbiri seçilib. Məlum olub ki, həbs edilənlər Almaniyada "miqrant alveri" ilə məşğul olmaqda, o cümlədən, 3-10 min avroarası ödəmə qarşılığında ən azı 20 nəfəri qaçaq yollarla Almaniyaya aparmaqda şübhəli bilinirlər.

Jurnalist Yafəz Əkrəmoğlu Almaniyanın hüquq-mühafizə orqanları tərəfindən Azərbaycanın müxalifət partiyasının keçmiş üzvlərinin saxlanmasına münasibət bildirərkən deyib ki, bu xәbәri alandan sonra araşdırmalara başlayıb və bir çox sәnәdli fakt toplayıb.

“Əvvəllər də bildirmişdim ki, Almaniya Federal Polisi Azәrbaycandan Almaniyaya mühacir daşıyan dəstəni ifşa edib vә bu işlә bağlı xeyli azәrbaycanlının evindә vә ofisindә axtarış edib, bir neçә nәfәr hәbs olunub”.

Hәmin faktları qısa şәkildә paylaşan jurnalist qeyd edib: "Evlәrdә vә ofislәrdә axtarış Koblenç Prokurorluğun sanksiyası әsasında hәyata keçirilib. Sanksiyada insan alveri ilә bağlı açılmış bir cinayәt işindә tәqsirlәndirilәn Azәrbaycan vәtәndaşlarının soyadları göstәrilir (ad göstәrilmir). Bunlar Xәlilbәyli, Hәsәn (soyaddır), Cavadov vә başqalarıdır. Cinayәt işinә әsaslanmış sanksiyadakı mәlumatların qısaldılmış forması belәdir: Azәrbaycan vәtәndaşı, tәqsirlәndirilәn şәxs, Xәlilbәyli әn azı 2015-ci ildәn bәri pul müqabilindә saxta sәnәdlәrlә Azәrbaycandan Almaniyaya qaçaq adamlar daşıyıb. Onların indiyә kimi mәlum olan sayı 60 nәfәrdir. Xәlilbәyli minlәrlә avro qarşılığında onlara saxta siyasi mühacir sәnәdlәri dә verib. Guya hәmin şәxslәr siyasi sәbәblәrdәn Azәrbaycanda tәqib olunurmuşlar.

O, gәtirdiyi adamlara özünü Almaniyada sözükeçәn biri kimi tәqdim edib. Xәlilbәyli qaçaq yolla gәtirdiyi adamlara mühacir işi ilә bağlı necә davranmaları ilә bağlı tәlimatlar verib. Bundan әlavә, o, qurbanlarının әlindәn hәqiqi sәnәdlәrini alıb, hәmin şәxslәrin guya Azәrbaycanda siyasi sәbәbdәn izlәnmәlәri ilә bağlı saxta sәnәdlәri tәqsirlәndirilәn şәxs Hәsәn (soyaddır - İlham Hәsәn ola bilәr) vә tәqsirlәndirilәn Cavadovun vasitәsilә әldә edib. İndiyә kimi әn az 50 bu cür iş görülüb vә bu yolla 300.000 avrodan çox pul әldә olunub. Tәqsirlәndirilәn şәxs Hәsәn әn az 7 dәfә dolu paketdә Xәlilbəyliyә saxta sәnәdlәr göndәrib. Çoxsaylı azәrbaycanlının ev vә ofislәrindә axtarışlara sәbәb istintaq dövrü toplanan bu cür mәlumatlar olub".

Daha bir azərbaycanlı mühacir Rəfail Priyev Fransada saxlanıb. Sosial şəbəkələrdə yayılan məlumata görə, bir neçə il əvvəl Azərbaycandan Almaniyaya gedərək bu ölkədən sığınacaq istəyən R.Priyevin barəsində Berlin Əyalət Məhkəməsinin qərarı ilə deportasiya qərarı çıxarılıb.

R.Priyev Almaniya Federal Daxili İşlər Nazirliyinin təqdimatı ilə Fransadakı qaçqın düşərgəsində saxlanıb.

Azərbaycan vətəndaşının yaxın günlərdə Almaniyaya deportasiya edilməsi gözlənir.

Müsavat Partiyası üzvlərinin qanunsuz miqrasiya işləri və "siyasi mühacir alveri"nə görə Almaniya Polisi tərəfindən həbs edilməsi sosial şəbəkədə müzakirələrə səbəb olub. Müsavat Partiyası başqanının müavini Səxavət Soltanlının yazdığı status “ReAl”çıları bərk hiddətləndirib. S.Soltanlı "Facebook"da belə yazıb: “Kim olmasından asılı olmayaraq, hansısa qanunsuz işdə adı keçən hər kəs cəzasını almalıdır. Qanunsuz əməllərdə iştirakı sübut olunan heç bir kəs bizimlə bir yerdə ola bilməz!”.

Bu statusa “ReAl” Partiyası üzvlərinin yazdığı rəylər qarşılıqlı mübahisəyə səbəb olub. Belə ki, “ReAl” partiyasının üzvü Dağlar Mustafayev onun paylaşımı barədə yazıb: "O zaman Müsavat rəhbərliyindən başlayın. Zamanında o da üzə çıxacaq. Necə ki, əvvəl inkar etdikləriniz bu gün üzə çıxır”.

S.Soltanlı isə yazıb ki, deyilənlər şər-böhtandır. “ReAl”çı D.Mustafayev onun fikirlərinə "Bu gün bu məsələni inkar edənlər ya sadəlövhdür, ya da işin içindədirlər. Bilə-bilə susurlar" - deyə cavab verib.

Ardınca Müsavat və “ReAl” üzvləri bir-birini "şərəfsiz" və digər sözlərlə təhqir ediblər.

Qeyd edək ki, Müsavat Partiyasının adının saxta miqrant işində hallanması ilk hadisə deyil. Artıq bir neçə ildir ölkənin daxilində aparılan müzakirələrdə bu mövzulara toxunulur. Hətta Müsavatın öz funksionerləri arasında gedən polemikalarda belə mühacir alveri ilə bağlı ittihamlar bir-birinin ünvanına səslənib. Təbii ki, belə bir əməliyyat Azərbaycanda keçirilsəydi, radikal dairələr bunu siyasi təqib kimi qələmə verəcəydi. Hazırda isə onların cinayətini məhz bəyənərək sığındıqları ölkənin polisi ifşa edir. Çox təəssüflər olsun ki, Müsavat Partiyası hələ də bu qalmaqalla bağlı açıqlama vermək istəmir. Bu yöndə bizim də cəhdlərimiz alınmadı. Aydındır ki, konkret faktlar qarşısında deməyə söz tapa bilmirlər. Almaniyada başlanan bu irimiqyası əməliyyatın  istintaqının bir ucu da Azərbaycandakı Müsavat Partiyasının rəhbərliyinə qədər uzana bilərmi?

Müsavat Partiyasının fəal üzvlərindən olan, tez-tez partiyanın saxta mühacir alverində əlinin olduğuna dair ittihamlar irəli sürən, sonra isə bu mövqeyinə görə Müsavatdan uzaqlaşdırılan hüquqşünas Taleh Xasməmmədov “Bakı-Xəbər”ə açıqlamasında bildirdi ki, məhz bu mövzuda Almaniya Polisi Azərbaycanın hüquq-mühafizə orqanları ilə birlikdə iş apara bilər: “Yəqin ki, şübhəli şəxslər barəsində Azərbaycan hökumətinə ətraflı məlumatlar veriləcək. Deməli, bir müddət əvvəl ictimaiyyətin diqqətinə çatdırmış olduğumuz "mühacir biznesi" və Almaniya Federal Miqrasiya İdarəsi ilə Almaniya Polisinin apardığı araşdırmalar son nəticədə öz təsdiqini tapdı. Həmin vaxt biz ehtimallar üzərində dayanaraq, qanundan irəli keçmək istəmirdik. Yəni birbaşa ittiham səsləndirmək təqsirsizlik prezumpsiyasının pozulması hesab oluna bilərdi. Amma indi şərait dəyişib. Məhz Almaniya Polisinin keçirdiyi əməliyyat və axtarış tədbirləri nəticəsində 60 nəfər şübhəli şəxs saxlanıb, bu şəbəkənin də bağlantısı Azərbaycanda fəaliyyət göstərən bir neçə siyası təşkilatla bağlıdır. Azərbaycan hakimiyyəti baş vermiş bu hadisənin hüquq-mühafizə orqanları səviyyəsində araşdırılmasını təmin etməlidir.

Çox böyük ehtimalla müxalif düşərgədə bu cür qara işlərlə məşğul olanların Azərbaycan hakimiyyətinin bəzi dairələrində də əlbirləri mövcuddur. Bütün bu faktların tam aşkarlanması üçün obyektiv araşdırma təmin olunmalıdır”.

Qeyd edək ki, baş verən bu biabırçı hadisəyə ən sərt reaksiya verən elə tanınmış müsavatçılardır. Maraqlıdır ki, onların hər biri işin bu yerə çatmasında Müsavatın rəhbərliyini qınayır. Keçmiş Divan üzvü Alya Yaqublu baş vermiş hadisəyə belə münasibət bildirdi: “Bizi bu adamlara görə düşmən elan elədilər. Onlara qarşı çıxdığımız üçün. Şəxsən mənə buna görə “sizin maraqlarınız hakimiyyətin maraqları ilə üst-üstə düşür” dedilər. Halbuki, böyük Rəsulzadə hələ 100 il qabaq xəbərdarlıq etmişdi, “şübhəsiz, həqiqət bir gün parlayacaqdır” demişdi. Tərifləyənlər və dəstəkləyənlər, utanıın. Susanlar, siz də”.

Partiyanın son qurultayında başqanlığa namizədliyi irəli sürülən Yadigar Sadıqlının isə məsələyə münasibəti daha kəskin olub. Onun öz sosial şəbəkə hesabında paylaşdığı fikirləri təqdim edirik: “Son iki ildə azsaylı həmfikirlərimlə birlikdə Müsavat Partiyası daxilində apardığım mübarizənin nə qədər ağır olduğunu təsəvvür edə bilməzsiniz. Hakimiyyətə qarşı 19 illik mübarizəmlə bağlı çəkdiyim əziyyət bu qədər ağır olmayıb. Bu iki ildə baş verənlər mənəvi cəhətdən daha ağır idi. İllərlə çiyin-çiyinə mübarizə apardığın insanların eyhamına, şərinə, böhtanına, təhqirinə dözmək çox ağır idi. Hökumətdən mən şəxsən bu qədər böhtan və təhqir eşitməmişəm. Halbuki, özümüz üçün heç nə istəmirdik. Bu gün baş verənləri, sadəcə, ehtimal edirdik və qarşısını almağa çalışırdıq. Bütün istədiyimiz Müsavat üçün idi, bütün təlaşımız Müsavatın adına, nüfuzuna görə idi. Hər nəyə əlimizi yelləyib sakit dura bilərdik. Amma məzarları Fransadan Sibirə qədər bütün Avrasiya materikinə səpələnən o əski müsavatçıların ruhu qarşısında duyduğumuz məsuliyyət imkan vermirdi. İçimi dağıdırdı o məsuliyyət. Çox təəssüf ki, bacarmadım”.

Məhəmmədəli QƏRİBLİ

Son xəbərlər