“Biz Lapis-Lazuli dəmir yolu ilə Bakı-Tbilisi-Qars dəmir yolunu birləşdirə bilmişik. Bu da böyük imkanlar yaradır”. Bunu Prezident İlham Əliyev “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanovu qəbul edərkən deyib.
Dövlət başçısı bildirib ki, bu gün Azərbaycan etibarlı tranzit ölkə kimi öz xidmətlərini göstərir. Ölkə başçısının sözlərinə görə, beynəlxalq təşkilatların hesabatında qeyd olunub ki, Azərbaycan çox etibarlı və önəmli tranzit ölkəyə çevrilib: “Biz hazırda Bakı-Tbilisi-Qars dəmir yolunun imkanlarından daha geniş miqyasda istifadə edirik, keçən il təqribən 300 min tona yaxın yük daşınmışdır. Önəmli məsələ ondan ibarətdir ki, biz artıq təkcə Asiya ölkələrindən gələn yüklərlə kifayətlənmirik, eyni zamanda, Avropa məkanında da fəal əməkdaşlıq edirik və bəzi Avropa ölkələrinin bu yoldan istifadə etməsi artıq reallığa çevrilib. Biz artıq Çindən konteyner qatarları qəbul etməyə başlamışıq. Çin-Qazaxıstan-Azərbaycan-Avropa dəhlizi fəaliyyət göstərir. Eyni zamanda, son müddət ərzində Əfqanıstan-Türkmənistan-Azərbaycan-Avropa istiqamətinə yüklər daşınır. Biz Lapis-Lazuli dəmir yolu ilə Bakı-Tbilisi-Qars dəmir yolunu birləşdirə bilmişik. Bu da böyük imkanlar yaradır. Mənim Orta Asiya respublikalarının prezidentləri ilə keçirdiyim görüşlər əsnasında dəmir yolu daşınmaları haqqında kifayət qədər geniş fikir mübadiləsi aparılmışdır. Hazırda Özbəkistan və Tacikistanla bizim dəhlizimizdən istifadə imkanlarını müzakirə edirik və əminəm ki, bu istiqamətdə də uğurlar əldə olunacaq”.
Görünən odur ki, Azərbaycanın beynəlxalq yükdaşımalarda rolu get-gedə daha da artır. Bu baxımdan Lapis-Lazuli dəmir yolu ilə Bakı-Tbilisi-Qars dəmir yolunun birləşdirilməsi Azərbaycanın dünyada tranzit, nəqliyyat mərkəzi olaraq mövqeyinin möhkəmlənməsində necə rol oynayacaq?
“Bunun bir sıra dividendləri olacaq”
Məsələyə münasibət bildirən nəqliyyat məsələləri üzrə ekspert Azər Allahverənovun sözlərinə görə, bu hər iki sahədə Azərbaycanın rolunun artmasına öz töhfəsini verəcək: “Lapis-Lazuli dəmir yolu ilə Bakı-Tbilisi-Qars dəmir yolunun birləşdirilməsi böyük imkanlar yaradır. Bütün bunlar onu göstərir ki, söhbət bütün Orta Asiya ölkələrini əhatə edən yükdaşıma dəhlizindən gedir. Artıq Orta Asiya ölkələri bilavasitə olaraq beynəlxalq yükdaşımaların fəal istifadəçisinə çevrilirlər. Aydın məsələdir ki, BTQ olmasaydı, Lapis-Lazuli dəmir yolu bu cür səmərəli şəbəkəyə qoşula bilməzdi. Ötən il BTQ ilə 300 min ton yük daşınıb. İldən-ilə bu yolla daşınan yüklərin həcmi artır. Söhbət tək Çindən başlayaraq Avropa ölkələrinə yüklərin daşınmasından getmir. Söhbət həm də əks istiqamətdə yüklərin daşınmasından gedir. Orta Asiya ölkələri Avropada istehsal edilən məhsulların fəal istehlakçısıdır. BTQ sayəsində Orta Asiya ölkələri həm idxaldan, həm də ixracdan yararlanacaqlar. Bu baxımdan, BTQ, ümumiyyətlə, Azərbaycanın beynəlxalq yükdaşımalarda rolunun nədən ibarət olmasını təsdiq edən bir sübutdur. Bunun bir sıra dividendləri olacaq. Çünki yükdaşımada həcm artırsa, bu, əlavə kapital axını deməkdır. Həcm artırsa, bu, Azərbaycan üçün beynəlxalq yükdaşımalar müstəvisində yeni imkanların açılması deməkdir. Həcm artırsa, bu həm də ölkənin siyasi nüfuzunun artmasına gətirib çıxarır. Yəni iqtisadi, texnoloji, nəqliyyat və siyasi müstəvidə bir çox ciddi uğurun əldə edilməsinə xidmət edən bir məsələdir. Digər tərəfdən, iqtisadi baxımdan bunun faydası çoxşaxəlidir. Bu təkcə tranzit gəlirlərin artması demək deyil. Bu iqtisadiyyatın, bölgələrin inkişafıdır, əlavə iş yerlərinin açılması deməkdir. Bütün bunların nəticəsidir ki, Davos Ümumdünya İqtisadi Forumunun son hesabatında dəmir yollarının səviyyəsinə və keyfiyyətinə görə Azərbaycan dünya miqyasında 34-cü yerdədir. Nəqliyyat infrastrukturunun səviyyəsinə görə isə 31-ci yerdədir”.
Vidadi ORDAHALLI
