Prezident müxalifətin bəzi məmurları xüsusi qərəzlə qaralama planlarından xəbərdar olduğunu nümayiş etdirdi...
Azərbaycan Prezidenti İlham Əliyev İlqar Abbasovu Şirvan şəhər, Mərdan Camalovu Zərdab, Əziz Əzizovu Bakının Suraxanı, Elşad Həsənovu Yasamal, Rafiq Quliyevi Xətai rayonlarının icra hakimiyyətlərinin başçıları vəzifələrinə təyin olunmaları ilə bağlı qəbul edib.
Cənab Prezident icra başçıları ilə görüşdə bir daha onlara ictimai nəzarətin vacibliyindən danışıb, lakin bu amildən də kimlərinsə, xüsusilə də radikal dairələrin sui-istifadə edəcəyinə imkan verilməyəcəyini bildirib: “Digər tərəfdən, icra başçıları peşəkar olmalıdırlar, bilikli olmalıdırlar və onlar işlədikləri rayonda, şəhərdə nüfuz qazanmalıdırlar. Bu onların sırf öz işindən asılıdır. Prezidentin etimadı artıq xalqa bir mesajdır ki, Prezident bu şəxslərə etimad göstərir. Ancaq bu etimad mütləq deyil, bu gün var, sabah olmaya bilər. Bu artıq sizin işinizdən asılıdır. Siz işi elə qurmalısınız ki, vətəndaşlar sizi dəstəkləsinlər, sizə dayaq olsunlar. Əgər siz hansısa bəd əmələ düçar olsanız, əlbəttə ki, biz dərhal bundan xəbər tutacağıq və cəzanızı alacaqsınız. Elə işləməlisiniz ki, xalq sizdən razı olsun. İlk növbədə, xalqa xidmət etmək və öz vəzifənizin öhdəsindən peşəkarcasına gəlmək sizin borcunuzdur. Digər tərəfdən, rəhbərlik edəcəyiniz şəhər və rayonlarda xoşagəlməz hallara qarşı çox ciddi mübarizə aparmalısınız. Korrupsiya, rüşvətxorluq Azərbaycanın gündəliyindən silinməlidir. Düzdür, elə ölkə yoxdur ki, bu problem orada olmasın. Amma əsas məsələ ondadır ki, rəhbərlik və hakimiyyət, o cümlədən, yerli icra orqanları bu məsələyə necə münasibət göstərirlər. Əgər gözlərini yumurlarsa, yaxud da ki, özləri bu çirkin işlərə qarışırlarsa, əlbəttə ki, layiqli cəzalarını da alacaqlar və almalıdırlar. Bir daha vətəndaşlara müraciət etmək istəyirəm, əgər görsəniz ki, rəhbər şəxslər əyri yola gedirlər, mütləq məlumat verin, mütləq xəbər göndərin və biz, əlbəttə ki, bütün siqnalları yoxlayıb düzgün qərar qəbul edəcəyik. O da həqiqətdir ki, bəzən hansısa şəxsi zəmində dövlət məmurlarına qarşı əsassız ittihamlar irəli sürülür. Xüsusilə özünü müxalifət adlandıran antimilli və tamamilə rəzil olmuş qorxaq dəstə bu işlərdə ön sıralardadır. Çünki onların əlindən heç nə gəlmir. Onların işi ancaq qarayaxma kampaniyaları aparmaq və bizim işimizə maneçilik törətməyə cəhd göstərməkdir. Ancaq tarix və həqiqət onu göstərir ki, ayağımıza dolaşmaq istəyən bu antimilli qorxaq dəstə bizim işimizə zərrə qədər ziyan vura bilməz. İndi onlar ancaq sosial şəbəkələrdən, bəzi internet resurslarından istifadə edərək dövlət məmurlarına qarşı qarayaxma kampaniyası aparırlar. Ona görə yerlərdən gələn hər bir siqnala obyektiv baxılacaq və sizin fəaliyyətinizə obyektiv qiymət veriləcək. Ona görə siz elə işləməlisiniz ki, vətəndaşlar sizdən razı olsunlar, rəhbərlik edəcəyiniz şəhər və rayonlarda işlər yaxşı getsin. Siz çalışmalısınız ki, rayonlara sərmayə qoyulsun, investorları inandırmaq üçün səylər göstərməlisiniz. Yəni gözləməməlisiniz ki, dövlət gəlib hansısa işi görəcək, onsuz da biz bunu görürük. Hazırda 4-cü regional inkişaf proqramının icrası davam edir. Əminəm ki, növbəti 4 il ərzində bu günə qədər öz həllini tapmamış məsələlər də öz həllini tapacaq. Ancaq siz hər bir rayonda mövcud olan problemlərə diqqət göstərməlisiniz, reaksiya verməlisiniz və çalışmalısınız ki, bu məsələlər öz həllini tapsın”.
Ölkə başçısının radikal müxalif dairələrin ictimai nəzarət adı ilə məmurları əsassız yerə hədəfə götürməsi ilə bağlı bildirdiyi iraddan hası nəticəni çıxarmaq olar?
- “Radikal dairələrin təsiri altında olan bəzi elektron KİV-in də bu istiqamətdə fəaliyyəti heç də ürəkaçan deyil”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Prezidentin bu məsələyə tam aydınlıq gətirməsi lap yerinə düşdü: “Biz mərkəzçi mövqedə dayanan partiyayıq. Yəni yeri gələndə hakimiyyəti də sərt tənqid edirik. Amma bu o demək deyil ki, yaxşı addımları təqdir etməməliyik. Azərbaycanda hansısa dairələr sanki özlərindən müxalifət standartları icad ediblər. Nədir bu? Sən daim hökuməti tənqid etməli, hətta yeri gələndə təhqir də etməlisən. Yox, nə vaxtsa, hakimiyyətin yaxşı bir addımını görüb təqdir edirsənsə, onda olursan bunların gözündə satılmış. Tamamilə yanlış yanaşmadır. Artıq necənci dəfədir ölkə başçısı icra başçılarına ictimai nəzarətin vacibliyindən danışır. Əslində, bu amil bizim ölkədə hər zaman olub. Elə sizin çalışdığınız media daim bu funksiyanı həyata keçirib. Biz sosial şəbəkələri daim izləyirik, hər dəfə ölkə başçısı belə çağırış edəndə bəzi dairələr bundan sui-istifadə etməyə başlayırlar. Məmurların üzərinə basqılar şiddətlənir. Ölkə başçısı belə niyyətdə olanların ünvanını dəqiq göstərdi. Bildirdi ki, məmurlarla bağlı daxil olan bütün informasiyalar ətraflı araşdırılacaq. Gəlin unutmayaq ki, məmur da vətəndaşdır, onun da hüquqları var. Bəli, bir sıra sahələrdə biz də məmurların yarıtmaz fəaliyyəti ilə rastlaşırıq. Amma bu heç də o anlama gəlməməlidir ki, onlardan olunan şikayətlər əsası olmayan dedi-qodu xarakterli olmalıdır. Məmurların neqativ fəaliyyətindən şikayət olunmasının mən də tərəfdarıyam. Həmin şikayətlər konkret faktlara və dəlillərə söykənməlidir. Belə olduqda, ictimai nəzarətin də bir effekti olar. Radikal dairələrin təsiri altında olan bəzi elektron KİV-in də bu istiqamətdə fəaliyyəti heç də ürəkaçan deyil. Təəssüf ki, onlar da ictimai nəzarəti öz ideoloqlarının bildiyi səviyyədə aparırlar”.
Məhəmmədəli QƏRİBLİ
