12/12/2019 02:08
728 x 90

Müsavat özündən əvvəl “gözü çıxmış” Milli Şuradakı qardaşlarının rüsvayçı piket uğursuzluğundan niyə nəticə çıxarmadı...

img

Bakının mərkəzində icazəsiz mitinq və piketlər keçirmək istəyən radikal dairələrin növbəti fiaskosuna şahidlik etdik. Milli Şura və AXCP-nin Əli Kərimli qanadının ard-arda bir neçə belə uğursuz cəhdindən nəticə çıxarmaq əvəzinə, Müsavat da analoji addım atmağa cəhd göstərdi.

Hadisə yerindən təqdim olunan reportajlardan da göründü ki, aksiyaya cəmi 10-15 nəfər adam qatılıb. Yaşanan biabırçılıq Bakı Şəhər Baş Polis İdarəsinin Müsavat Partiyasının Bakı Şəhər İcra Hakimiyyəti qarşısında icazəsiz aksiya keçirməyə cəhd etməsi ilə bağlı yaydığı açıqlamada da qeyd edilib: “Müsavat Partiyasının üzvləri paytaxtın mərkəzi ərazilərindən birində mitinq keçirmək barədə Bakı Şəhər İcra Hakimiyyətinə müraciət ediblər. Müraciətə uyğun olaraq, “Sərbəst toplaşmaq azadlığı haqqında” Qanunun müvafiq tələblərinə əsasən, ictimai asayişin pozulmasının qarşısının alınması və şəhərin mərkəzi hissəsində keçirilməsi onun yerinin dəyişdirilməsi formasında məhdudlaşdırılaraq paytaxtın Qaradağ rayonunun Lökbatan qəsəbəsindəki “Neftçi” idman klubunun təlim bazası təklif olunub.

Bu barədə müraciətin müəlliflərinə rəsmi məlumat verilmiş və onlar müəyyən edilməmiş yerlərdə keçiriləcək hər hansı aksiyanın qarşısının alınacağı, baş verə biləcək ictimai qayda pozuntularına görə məsuliyyət daşıyacaqları barədə Bakı Şəhər Baş Polis İdarəsi tərəfindən rəsmi xəbərdar ediliblər.

Buna baxmayaraq, noyabrın 12-də, saat 15 radələrində ümumi sayı təxminən 15 nəfərdən ibarət şəxs Bakı Şəhər İcra Hakimiyyətinin qarşısında qanunsuz aksiya keçirməyə cəhd göstərib. Görülmüş tədbirlərlə hüquqazidd hərəkətlərin qarşısı alınıb”.

Müsavat Partiyasının icazəsiz aksiyasına çox az sayda tərəfdar gəlməsinin səbəbi nə ilə bağlıdır?

  • Səxavət Soltanlı: “Aksiyamızın məqsədi nə idisə, ona nail olduq”

Müsavat Partiyasının funksioneri Səxavət Soltanlı hesab edir ki, bunun obyektiv səbəbləri olub: “Say heç də rəsmi qurumların ifadə etdiyi kimi deyil. Müsavat Partiyasının BŞİH-nin qarşısında keçirdiyi aksiya zamanı saxlanan 20-dən çox aksiya iştirakçısı Səbael Rayon Polis İdarəsinə, xeyli sayda da aksiya iştirakçısı başqa polis bölmələrinə aparıldı.

Aksiya başlamamışdan əvvəl də Müsavat başqanı Arif Hacılı başda olmaqla xeyli sayda müsavatçı polisə aparılaraq orada saxlanıb və ya yaşadıqları mənzillər polis nəzarətinə götürülmüşdü.

Aksiyadan 1 gün əvvəl isə başqan müavini Razim Əmiraslanli saxlanıb. Sərbəst toplaşma azadlığının təmin edilməsini tələb etdiyimiz  aksiyada “sərbəst toplaşma azadlığı” ilə bərabər “ifadə azadlığı” şuarları səsləndi.

Aksiyamızın məqsədi nə idisə, ona nail olduq, hakimiyyətin, yerli və beynəlxalq ictimaiyyətin diqqətini bir daha toplaşma azadlığının olmamasına yönəltdik”.

  • Samir Adıgözəlli: “Bir yas yeri olanda 50 dəfə bundan çox adam toplaşırsa, həmin partiyalar özlərini bu şəkildə nüfuzdan salmamalıdırlar”

İctimai-Siyasi Proseslər Beynəlxalq Əlaqələr Mərkəzinin (İSBAM) rəhbəri Samir Adıgözəlli isə hesab edir ki, belə aksiyalarla radikal müxalifət özünü daha da rüsvay edir: “Bunlar anlamırlar ki, sosial bazası olmayan qurum hansısa uğurlu aksiya keçirmək iqtidarında deyil. Məqsədləri bəllidir, bir balaca səs-küy salsınlar. Yəni biz də varıq deməklə, xaricdəki ağalarından qrant qopara bilsinlər. Müsavatın son aksiyasın cəmi 15 adam gəldi. Bir yas yeri olanda 50 dəfə bundan çox adam toplaşırsa, həmin partiyalar özlərini bu şəkildə nüfuzdan salmamalıdırlar. Ya təşkilatlanmalı, ya da siyasi arenanı üzüsulu ikən tərk etməlidirlər”.

Məhəmmədəli QƏRİBLİ

Son xəbərlər