Fikrət Yusifov: “Burada söhbət daha çox xalqla təmasda olan məmurlardan gedir”
“Hansısa yaramaz məmur şəxsi maraqlarını təmin etmək üçün hansısa bəd əməl törədərsə, mütləq cəzasını alacaq”. Bunu Prezident İlham Əliyev İlqar Abbasovu Şirvan şəhər, Mərdan Camalovu Zərdab, Əziz Əzizovu Bakının Suraxanı, Elşad Həsənovu Yasamal, Rafiq Quliyevi Xətai rayonlarının icra hakimiyyətlərinin başçıları vəzifələrinə təyin olunmaları ilə bağlı qəbul edərkən deyib.
Prezidentin sözlərinə görə, ölkənin ümumi inkişafı müsbətdir və gələcəkdə hər hansı bir ciddi problem görmür: “Çünki ölkəmiz siyasi cəhətdən çox möhkəmdir, sabitlik Azərbaycanın uğurlu inkişafının əsas amillərindən biridir. Sabitliyin təminatçısı Azərbaycan xalqıdır və bizim siyasətimizdir”.
Dövlət başçısı onu da qeyd edib ki, bu siyasətə ləkə vuran hər bir adam öz cəzasını alacaq: “Biz bu qədər səy göstəririk, bu qədər işlər görürük, əgər hansısa yaramaz məmur öz şəxsi maraqlarını təmin etmək üçün hansısa bəd əməl törədərsə, mütləq cəzasını alacaq və artıq tarix bunu göstərir”.
O da məlumdur ki, bəzi yaramaz məmurların fəaliyyəti üzündən müəyyən sosial narazılıqlar yaranır, bir sıra problemlər üst-üstə yığılır. Bu da son nəticədə xoşagəlməz fəsadların yaranmasına gətirib çıxarır. Ümumilikdə, ölkə başçısı yaramaz məmurlar deyərkən, hansı əməl sahibi olan məmurları nəzərdə tutur?
- “Hesab edirəm ki, bu sırada olan məmurların bir qisminin yaxın perspektivdə cəzalandırılması qaçılmazdır”
Sözügedən məsələyə aydınlıq gətirən iqtisad elmləri doktoru Fikrət Yusifovun sözlərinə görə, burada söhbət daha çox xalqla təmasda olan məmurlardan gedir: “Hansılar ki, vətəndaşların bu və ya digər problemlərini həll etməlidirlər. Ancaq onlar bu problemləri həll etmək əvəzinə, insanları incidir, süründürməçiliyə yol verirlər. Bundan başqa, gördükləri iş müqabilində insanlardan rüşvət alırlar. Bununla da yaramaz hərəkətlər edib insanları dövlətdən, hakimiyyətdən və Prezidentdən narazı salırlar. Prezident çıxışında məhz bu qəbildən olan məmurları nəzərdə tuturdu. Hesab edirəm çox təqdirəlayiqdir ki, ölkə başçısı bu çağırışları açıq şəkildə edir. Ölkədə belə yaramaz məmurlara qarşı açıq mübarizə kampaniyası başlayıb. Fikrimcə, bu çox önəmli məsələdir. Hesab edirəm ki, bu sırada olan məmurların bir qisminin yaxın perspektivdə cəzalandırılması qaçılmazdır. Nəticədə bu, digər məmurlara yaxşı bir dərs olacaq. Çünki insanları incitmək, hakimiyyətdən narazı salmaq olmaz. Bu insanlar dövlətin vətəndaşı olduqları üçün məmurlar layiqincə onlara xidmət etməlidirlər. Prezident dəfələrlə bəyan edib ki, məmur xalqın xidmətçisidir. Ancaq məmur gedib xalqı incidirsə, insanların cibinə girib rüşvət alırsa və vətəndaşları hakimiyyətdən narazı salırsa, o zaman belə məmurlar sərt cəzalandırılmalıdır. Çox yaxşı haldır ki, artıq belə bir kampaniya start götürdü. Prezidentin məsələni bu şəkildə qoyması olduqca önəmlidir”.
Vidadi ORDAHALLI
