14/12/2019 11:19
728 x 90

Azərbaycanlı şair-həkim Fəzail İsmayıl iranlı Abbas Lisaninin hüquqlarını müdafiə təşkilatı yaradacaq

Fəzail İsmayıl: “Azərbaycanda özünü türkçü kimi təqdim edən siyasi partiyalar da Abbas Lisaninin müdafiəsinə qoşulmalıdırlar, amma onlar qoşulmurlar”

img

“Məqsədim Abbas Lisaninin hüquqlarının müdafiəsi təşkilatı yaratmaqdır”

 

Hazırda İranda həbsxana həyatı yaşayan Güney Azərbaycandan olan fəal Abbas Lisaninin hüquqlarının müdafiəsinə qoşulanlar sırasında şair-həkim Fəzail İsmayıl da var. F.İsmayıl son dövrlər A.Lisaninin hüquqlarının müdafiəsi istiqamətində müxtəlif yazılar və fikirlərlə çıxış edir.

F.İsmayıl bununla bağlı “Bakı-Xəbər”ə verdiyi açıqlamada bildirdi ki, məqsədi Azərbaycanda Abbas Lisaninin hüquqlarının müdafiəsi təşkilatı yaratmaqdır. “Abbas Lisani Azərbaycanın bütövlüyü uğrunda mücadilə verir. Zaman-zaman o taylı-bu taylı Azərbaycanın şairləri vətənin bölünməsindən, dərdlərimizdən şeirlər yazıblar. Amma çox təəssüf ki, Azərbaycan xalqının qəhrəman oğlu Abbas Lisaninin bu günündə şairlər susur. Bu da məni narahat edir. İkinci bir mühüm məsələ odur ki, Abbas Lisaninin müdafiəsinə bütün Türk dünyası qoşulmalıdır. Biz türk mənəviyyatını daha da ucalara qaldırmalıyıq. Azərbaycanda özünü türkçü kimi təqdim edən siyasi partiyalar da Abbas Lisaninin müdafiəsinə qoşulmalıdırlar, amma onlar qoşulmurlar. Mənim məqsədim Abbas Lisaninin hüquqlarının müdafiəsi təşkilatı yaratmaqdır. Onun hüquqlarının daha geniş səviyyədə müdafiəsinə nail olmağa ehtiyac var. Bu gün Abbas Lisani Cənubi Azərbaycan türklərinin öz dillərində təhsil alması, bütün milli hüquqlardan yararlanması üçün mübarizə aparır və bu səbəbdən də zindandadır. Bir vaxtlar Mandelanın zənci xalqı uğrunda apardığı azadlıq mübarizəsini Abbas Lisani də Cənubi Azərbaycanda aparır” - deyə F.İsmayıl qeyd etdi.

A.Lisani haqqında saysız publisist və poetik yazının müəllifi olan F.İsmayıl bildirdi ki, A.Lisaninin hüquqlarını müdafiə təşkilatını yaratdıqdan sonra onu qeydiyyatdan keçirmək üçün Ədliyyə Nazirliyinə müraciət edəcək.

İradə SARIYEVA 

Son xəbərlər