14/12/2019 11:57
728 x 90

Azərbaycanın dünyada məsuliyyətli dövlət imici – ölkəmiz buna nələrin hesabına nail olub...

Fuad İbrahimov: “Bir sıra faktora görə məsuliyyətli ölkə kimi özünü təsdiq edə bilib”

img

“Azərbaycan dünya miqyasında özünü çox məsuliyyətli ölkə kimi artıq təsdiqləyib”. Bunu Prezident İlham Əliyev İlqar Abbasovu Şirvan şəhər, Mərdan Camalovu Zərdab, Əziz Əzizovu Bakının Suraxanı, Elşad Həsənovu Yasamal, Rafiq Quliyevi Xətai rayonlarının icra hakimiyyətlərinin başçıları vəzifələrinə təyin olunmaları ilə bağlı qəbul edərkən deyib.

Prezident bildirib ki, Azərbaycanda yoxsulluq təxminən 50 faizdən 5 faizə düşüb. Xarici dövlət borcu ən aşağı səviyyədədir. Digər infrastruktur layihələri, o cümlədən, sosial infrastrukturla bağlı layihələr uğurla icra edilib.

Ölkə başçısı onu da vurğulayıb ki, texnoloji inkişaf istiqamətində də böyük uğurlar əldə edilib: “Azərbaycan indi kosmik klubun üzvüdür, üç peykimiz var. Deyə bilərəm ki, bu yaxınlarda çox gərgin yarış nəticəsində Azərbaycan 2022-ci ildə Dünya Astronavtika Konqresinə evsahibliyi edəcək. Məlumat üçün bildirmək istəyirəm ki, bizim rəqiblərimiz Rio-de-Janeyro, Dehli və Sinqapur şəhərləri idi. Yəni bu şəhərlərin nə qədər inkişaf etmiş şəhərlər olması haqqında əlavə sözlərə ehtiyac yoxdur. Azərbaycan bu yarışda da qalib gəldi. Nəyin hesabına? Ona görə ki, dünya miqyasında bizim siyasətimizə çox böyük dəstək var, rəğbət var. Bizim sözümüzlə əməlimiz birdir. Azərbaycan dünya miqyasında özünü çox məsuliyyətli ölkə kimi artıq təsdiqləyib”.

Azərbaycanın dünya miqyasında məsuliyyətli ölkə kimi özünü təsdiqləməsi çox ciddi uğurdur. Bu o deməkdir ki, dünya ölkələri arasında Azərbaycana böyük ehtimad var. Bütövlükdə, ölkəmiz nəyin hesabına dünyada məsuliyyətli dövlət imici qazanmasına nail olub?

  • “Azərbaycan müstəqillik əldə etdikdən sonra 3 irimiqyaslı meqalayihə ilə bağlı iddia ortaya qoydu və bunu həyata keçirdi”

Məsələyə münasibət bildirən iqtisadçı-ekspert Fuad İbrahimovun sözlərinə görə, Azərbaycan bir sıra faktora görə məsuliyyətli ölkə kimi özünü təsdiq edə bilib: “Birincisi, həyata keçirdiyi investisiya layihələrinə görə. İkincisi, hansısa regional layihələrin icra olunmasında iddialı çıxış edib və eyni zamanda, onu sona çatdırmağı bacarıb. Yəni ortaya qoyduğu iddia havada qalmayıb, praktiki olaraq reallaşdırıb. Bütün bu göstəricilər Azərbaycan barədə dünyada məsuliyyətli dövlət imicinin formalaşmasında başlıca rol oynayıb. Azərbaycan müstəqillik əldə etdikdən sonra 3 irimiqyaslı meqalayihə ilə bağlı iddia ortaya qoydu və bunu həyata keçirdi. Bakı-Tiflis-Ceyhan neft, Bakı-Tiflis-Ərzurum qaz kəmərləri çəkildi. Digər tərəfdən, Bakı-Tiflis-Qars dəmir yolu tikilərək istismara verildi. Digər nəqliyyat və enerji layihələri ilə də bağlı ölkədə sürətli iş gedir. Bundan başqa, Azərbaycan neçə ildir bir sıra beynəlxalq səviyyəli tədbirlərə, yarışlara çox uğurla evsahibliyi edir. Ümumən, bütün sahələrdə üzərinə düşən öhdəlikləri çox yüksək səviyyədə yerinə yetirir. Azərbaycan hakimiyyətinin ortaya qoyduğu siyasi iradə ölkəmizin imicinə müsbət təsir göstərir. Başqa bir tərəfdən, 4 il əvvəl baş verən devalvasiyanın ağır nəticələrinin aradan qaldırılması, sosial layihələrin həyata keçirilməsi bunda müsbət rol oynayıb. Bütün bunların kompleks şəkildə həyata keçirilməsi, əlbəttə ki, Azərbaycanın dünya miqyasında məsuliyyətli ölkə kimi özünü təsdiqləməsinə gətirib çıxarıb”.

Vidadi ORDAHALLI

Son xəbərlər