Prezidentin yeni icra başçıları qarşısında qoyduğu hədsiz çətin, lakin mümkün vəzifə...

Məlum olduğu kimi, noyabrın 12-də Prezident İlham Əliyev Şirvan şəhər, Zərdab, Bakının Suraxanı, Yasamal, Xətai rayonlarına yeni təyin olunan icra hakimiyyəti başçılarını qəbul edib.

Ölkə başçısı qəbul zamanı bir sıra məsələlərə toxunub, o cümlədən, qeyd edib ki, rüşvətxorluq, korrupsiyanın kökü Azərbaycan gündəmindən silinməlidir. “...Digər tərəfdən, icra başçıları peşəkar olmalıdırlar, bilikli olmalıdırlar və onlar işlədikləri rayonda, şəhərdə nüfuz qazanmalıdırlar. Bu onların sırf öz işindən asılıdır. Prezidentin etimadı artıq xalqa bir mesajdır ki, Prezident bu şəxslərə etimad göstərir. Ancaq bu etimad mütləq deyil, bu gün var, sabah olmaya bilər. Bu artıq sizin işinizdən asılıdır. Siz işi elə qurmalısınız ki, vətəndaşlar sizi dəstəkləsinlər, sizə dayaq olsunlar. Əgər siz hansısa bəd əmələ düçar olsanız, əlbəttə ki, biz dərhal bundan xəbər tutacağıq və cəzanızı alacaqsınız. Elə işləməlisiniz ki, xalq sizdən razı olsun. İlk növbədə, xalqa xidmət etmək və öz vəzifənizin öhdəsindən peşəkarcasına gəlmək sizin borcunuzdur. Digər tərəfdən, rəhbərlik edəcəyiniz şəhər və rayonlarda xoşagəlməz hallara qarşı çox ciddi mübarizə aparmalısınız. Korrupsiya, rüşvətxorluq Azərbaycanın gündəliyindən silinməlidir. Düzdür, elə ölkə yoxdur ki, bu problem orada olmasın. Amma əsas məsələ ondadır ki, rəhbərlik və hakimiyyət, o cümlədən, yerli icra orqanları bu məsələyə necə münasibət göstərirlər...” - deyə Prezident İlham Əliyev bildirib.

İcra başçıları rayon miqyasında rüşvətxorluğun, korrupsiyanın qarşısını kəsə bilərmi?

• “Bunun özü yerli və mərkəzi icra hakimiyyəti başçılarına bir mesajdır ki...”

 “Səs” qəzetinin və eyniadlı informasiya agentliyinin baş redaktoru Bəhruz Quliyev “Bakı-Xəbər”ə bildirdi ki, artıq dövlət səviyyəsində rüşvətxorluq və korrupsiya hallarına qarşı kəskin, amansız mübarizə aparılır. B.Quliyev hesab edir ki, icra başçıları rəhbərlik etdikləri rayonlarda rüşvətxorluq və korrupsiyanın qarşısının alınması üçün çox iş görə bilər. “Hesab edirəm ki, vətəndaş vətəndaş kimi, icra başçısı da icra başçısı kimi, öz növbəsində, bu hala qarşı mübarizə aparmalıdır. Vətəndaş öz hüquqlarından istifadə edərək rüşvət verməməlidir, ümumiyyətlə, bu halı yaxın qoymamalıdır. O özü rüşvət verməməlidir, hər hansı bir məsələ ilə bağlı öz hüquqlarını tələb etməlidir. Bütün məsələlər hüquq normaları çərçivəsində baş verərsə, heç bir rüşvətə ehtiyac qalmaz. Digər tərəfdən də yerli icra başçıları da cənab Prezidentin tapşırıqlarını yerinə yetirərkən, vətəndaşın, sahibkarın hər hansı bir işini həll edərkən onlardan rüşvət tələb etməsə, öz vəzifəsini yerinə yetirmiş olar. Düşünürəm ki, hər kəs öz borcunu yerinə yetirsə, onda bizim dövlətimiz daha da güclənər, qüdrətlənər. İcra başçıları istəsələr, rəhbərlik etdikləri rayonların ərazisində rüşvəti nisbətən yığışdırmağa nail olarlar. Ümumiyyətlə, rüşvətxorluqla mübarizə çox çətin prosesdir və dünya bu problemlə mübarizə aparır, elə dövlət yoxdur ki, orada bu kimi hallar mövcud olmasın. Azərbaycanda rüşvətxorluğa və korrupsiyaya qarşı amansız mübarizə başlayıb. Artıq yerlərə də cənab Prezident mesaj verib. Cənab Prezident tapşırıqlarında birbaşa deyir ki, rüşvətin, korrupsiyanın qarşısı alınmalıdır, buna qarşı Azərbaycanda amansız mübarizə aparılmalıdır. Ölkə başçısından gələn bu mesaj hər kəs üçün bir tezis olmalı, hər kəs öz əməli işi ilə buna riayət etməlidir. Belə hesab edirəm ki, yerlərdə, rayonlarda icra başçılarından çox şey asılıdır, onlar istəsələr, ölkədə rüşvətin qarşısının alınması prosesinə dəstək verə bilərlər” - deyə B.Quliyev qeyd etdi.  

B.Quliyevin sözlərinə görə, bütün dünya korrupsiya və rüşvətxorluqla kəskin mübarizə aparır. Onun bildirdiyinə görə, bu təkcə Azərbaycanın deyil, bütün dövlətlərin, cəmiyyətlərin problemidir. “Ümumilikdə, bu problem var. Ən əsası odur ki, Azərbaycanda korrupsiyaya və rüşvətə qarşı mübarizə sərt şəkildə aparılır. Bunu cənab Prezidentin özü də dəfələrlə qeyd edib. Bunun özü yerli və mərkəzi icra hakimiyyəti başçılarına bir mesajdır ki, fəaliyyətlərində rüşvətxorluq, korrupsiya hallarına son qoysunlar. Azərbaycanda həyata keçirilən siyasətin əsas istiqamətlərindən biri vətəndaş və məmur arasındakı münasibətlərin şəffaflaşdırılmasıdır, idarəetmənin optimallaşmasıdır. “ASAN xidmət” və sair yeni təsisatların yaradılması  korrupsiyanın, rüşvətxorluğun və bürokratiyanın aradan qaldırılması üçün dövlətin atdığı addımdır. Bu özü göstərir ki, Azərbaycan dövləti rüşvət və korrupsiyanın aradan qaldırılması üçün iş aparır” - deyə B.Quliyev vurğuladı.

İradə SARIYEVA