Erməni KİV-i qondarma qurumun “rəsmilərinə” istinadən separatçı qurumun qərar tutduğu Dağlıq Qarabağ ərazisi ilə Ermənistan arasında yaxın zamanlarda rouminq tarifi üzrə danışıqların ləğv ediləcəyini qeyd edir. Bu barədə məlumatı separatçı qurumun “xarici işlər naziri” Masis Mailyan öz “Facebook” səhifəsində yazıb.
O bidirib ki, telekommunikasiya sahəsində monopoliyaya 2020-ci ildən son qoyulacaq: “Bizdə ikinci mobil operator fəaliyyətə başlayacaq. Bunun üçün həm investorlar, həm də təcrübəli mütəxəssislər var”.
M.Mailyan ən əsası isə bildirib ki, yeni operatorun gəlişilə Ermənistanla qondarma qurumun qərar tutduğu Azərbaycan əraziləri arasında rouminqsiz mobil danışıqları həyata keçiriləcək.
Qondarma qurumun hazırda məskən tapdığı Azərbaycan ərazsizində hansısa xarici ölkə ilə belə danışıqları təmin etmək üçün mütləq mənada ölkəmizin razılığı olmalıdır. Hansısa operator buna gedərsə, təbii ki, beynəlxalq müstəvidə qalmaqalla qarşılaşa bilər. Eyni zamnda, bu həmin operator üçün böyük məhkəmə cərimələri ilə nəticələnə bilər. Hansısa beynəlxalq mobil operator belə risqlərin fonunda deyilən addımları ata bilərmi?
Osman Gündüz: “Yadınızdadırsa, bizim dövlətin kəskin etirazları fonunda həmin operatorlar öz səhifələrində yazdılar ki, Qarabağ Azərbaycanın ayrılmaz hissəsidir”
İnformasiya texnologiyaları üzrə ekspert Osman Gündüz “Bakı-Xəbər”ə açıqlamasında bildirdi ki, belə bir mesajın verilməsi ilə tanış deyil: “İstənilən halda, bu xoşagələn məsələ deyil. Çünki ermənilər belə cəhdləri dəfələrlə ediblər, hər dəfə də Azərbaycanın haqlı etirazı ilə qarşılaşıblar. Çünki burada söhbət bizim ərazimizdə qurulan mobil xidmətdən gedir. Bunu edənlər isə, mütləq mənada, bizim razılığımızı almalıdırlar. Bu qaydalara əməl etməyən mobil operator ciddi problemlərlə üzləşə bilər. Hətta Azərbaycan tərəfi bu cür fəaliyyəti gözünün önünə alan operatoru ciddi məbləğdə cərimələdə bilər. Təbii ki, ermənilərin marağındadır ki, separatçı qurumu informasiya blokadasından çıxarmaq üçün, onları hansısa mobil operator vasitəsilə qlobal dünyaya calasınlar. Bundan əvvəl də müxtəlif mobil operatorlarla belə cəhdləri ediblər. Hər dəfə də bizim etirazımız nəticəsində istəkləri baş tutmayıb. Son zamanlara kimi onlar bu məsələni dillərinə gətirmirdilər. Yenidən mövzunu aktuallaşdırıblarsa, biz məsələni diqqətdə saxlamalıyıq. Belə istəkdə olan Rusiyanın bir-iki mobil operatoru da vardı. Yadınızdadırsa, bizim dövlətin kəskin etirazları fonunda həmin operatorlar öz səhifələrində yazdılar ki, Qarabağ Azərbaycanın ayrılmaz hissəsidir.Diqqətli olmalıyıq. Ola bilər ki, hansısa mobil operatoru yenidən öz tələlərinə sala biliblər. Qətiyyən yol vermək olmaz ki, hansısa operator orada rouminq fəaliyyəti qursun. Xüsusən də Ermənistanla rouminqsiz danışıq aparmaq beynəlxalq qanunlara meydan oxumaq anlamına gələr”.
Məhəmmədəli QƏRİBLİ
