Məhəmməd Əsədullazadə: “Lavrovun bu addımı inkişaf edən Rusiya-Türkiyə əlaqələrinə zərbədir”
Məlum olduğu kimi, Ermənistanda rəsmi səfərdə olmuş Rusiyanın xarici işlər naziri Sergey Lavrovun başçılıq etdiyi nümayəndə heyəti İrəvanda Sisernakabert memorial kompleksində qondarma "erməni soyqırımı" abidəsini ziyarət edib, əbədi məşəl önünə əklil qoyub.
Bu azmış kimi, Rusiya XİN başçısı və nümayəndə heyətinin üzvləri daha sonra xatirə xiyabanından keçib, küknar ağaclarını suvarıb. Hansı ki, Lavrov həm də 12 il əvvəl “soyqırım” abidəsi önündə əkdiyi ağacın dibinə su töküb.
Qeyd edək ki, S.Lavrov Ermənistana səfər zamanı bir sıra rəsmi şəxslərlə görüşlər keçirib.
Lavrovun Ermənistana və ermənilərə olan dərin rəğbəti bəllidir. Hansı ki, Lavrov bunu zaman-zaman müxtəlif formalarda büruzə verib. Ancaq Lavrov anlamalıydı ki, Rusiyanın maraqları daha öndə gəlir. Məsələ ondadır ki, son illər Rusiya ilə Türkiyə arasında çox ciddi yaxınlaşma müşahidə edilir. İstər siyasi-iqtisadi, istərsə də digər sahələrdə iki ölkə arasında münasibətlərdə ciddi inkişaf mövcuddur. Türkiyə NATO üzvü olmasına baxmayaraq, Rusiyadan bir sıra müasir silahlar alır, Suriya məsələsində tərəflər arasında anlaşma mövcuddur. Suriya ilə bağlı bir sıra məsələlərdə Rusiya ilə Türkiyə ortaq məxrəcə gəlib birgə hərəkət edirlər. Bir sözlə, Rusiya-Türkiyə münasibətlərinin sürətlə inkişaf etdiyi bir dövrdə Lavrovun qondarma “erməni soyqırımı” abidəsini ziyarət etməsinə nə ehtiyac var idi? Tutaq ki, Ermənistan tərəfi bunu səfər protokoluna daxil edib. O zaman Lavrov Rusiya-Türkiyə münasibətlərinin hazırkı səviyyəsini nəzərə alıb bundan imtina edə bilərdi. Ancaq o bunu etmədi.
- “...soyqırım abidəsi”ni səfər protokoluna salmağa imkan verməməli idi”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, Lavrovun bu addımı iki ölkə münasibətlərinin hazırkı səviyyəsinə zərbədir: “Rusiya xarici işlər naziri S.Lavrovun Ermənistana səfəri zamanı orada qondarma “erməni soyqırımı” abidəsinə əklil qoyması inkişaf edən Rusiya-Türkiyə əlaqələrinə zərbədir. Ümumiyyətlə, Lavrov daim Türkiyə və Azərbaycana qarşı Ermənistanın yanında yer alıb. O, ənənəvi Rusiya siyasətini həyata keçirməklə yanaşı, çox vaxt qırmızı xətti də keçir. Beynəlxalq siyasətdə buna yol vermək olmaz. Təcrübəli diplomat olan Lavrov qəsdən buna gedərək, bir növ, Azərbaycan və Türkiyəyə qarşı mənfi siyasəti ortaya qoymuş oldu. O, son illərdə sıxlaşan Türkiyə-Rusiya əlaqələrini nəzərə alıb qondarma “soyqırım abidəsi”ni səfər protokoluna salmağa imkan verməməli idi. Bunu etmirsə, demək, Moskvanın siyasətinə erməni lobbisinin təsiri var. Təəssüf ki, Lavrovun siyasəti regionda sülh və təhlükəsizliyə deyil, etnik münaqişənin qızışdırılması və işğala stimul yaratmaqla separatizmə dəstək verir. Təbii ki, bu təkcə Lavrov timsalında deyil. Bu, Kremlin imperialist siyasətinin bariz nümunəsidir. Dünyada şərtlər dəyişir, beynəlxalq siyasətdə yeni yanaşmalar ortaya çıxır. Lavrov isə əməkdaşlığa və birgə sülhə qarşı çıxır. Rusiyanın xarici siyasətində dəyişməyən bu tendensiya regionda sülhə xidmət etmir”.
Vidadi ORDAHALLI
