14/12/2019 11:56
728 x 90

BMT TŞ-nin 4 qətnaməsini mənasız kağız parçasına çevirmiş Paşinyanın Baş katiblə anlaşılmaz “selfi mehribanlığı”...

img

Fransada səfərdə olan Ermənistan Baş naziri Nikol Paşinyan həmsədr ölkə Prezidenti E.Makronun verdiyi ziyafətə qatılıb. Erməni saytlarının yaydığı məlumatdan işğalçı ölkə liderinin BMT Baş katibi Antonio Quterreşlə ayaqüstü görüşdüyü bəlli olub. Paşinyan BMT rəhbərinə yanaşaraq selfi də çəkdirib və onu “Facebook”da paylaşıb.

Məlumdur ki, BMT-nin Ermənistan Silahlı Qüvvələrinin Qarabağdan çıxarılması haqda 4 qətnaməsi var. Həmin qətnamələr Ermənistan tərəfindən icra olunmayıb. BMT Baş katibinin belə bir ölkənin başçısı ilə yaxından, mehribançılığı ifadə edən fonda şəkil çəkdirməsi maraqlı görünür. Qeyd edək ki, Paşinyanın Quterreşlə çəkdirdiyi selfi sosial şəbəkələrin Azərbaycana aid seqmentində ciddi narazılıqla qarşılanıb. BMT Baş katibinin atdığı bu addımı necə dəyərləndirmək olar?

  • Hatəm Cabbarlı: “Onun səmimi şəkil çəkdirdiyi adamın rəhbərlik etdiyi ölkə BMT-nin 4 qətnaməsini yerinə yetirmir”

Siyasi elmlər doktoru Hatəm Cabbarlı “Bakı-Xəbər”ə açıqlamasında bildirdi ki, BMT Baş katibinin atdığı bu addım onun təmsil olunduğu qurumun nüfuzuna böyük zərbə vurur: “Ermənistanın həm daxili, həm də xarici siyasətində yaşananları diqqətlə izlədikdə məlum olur ki, Nikol Paşinyan üçün heç də yaxşı perspektiv vəd olunmur. Buna görə də Paşinyan hər dəfə xarici səfərlərində tanınmış adamlara yaxınlaşır, ayaqüstü olsa da, onlarla söhbət etməyə çalışır. Ən yaxşı bacardığı işlərdən biri də selfi çəkdirməkdir. Biz bunu onun Fransaya son səfəri zamanı da izləyə bildik. Paşinyan öz səhifəsində yalnız BMT Baş katibi ilə çəkdiyi selfini paylaşmayıb. O, eyni zamanda, Fransa Prezidenti və beynəlxalq  “Frankafon” təşkilatının rəhbəri ilə də  çəkdiyi selfiləri paylaşıb. N.Paşinyan müasir texnologiyalardan yararlanmaq kimi göstərdiyi fəaliyyəti ucuz vasitələrlə həyata keçirir. Bu cür şəkillərin paylaşılması Ermənistanda son zamanlar yaşanan gərginliyi aşağı salmağa yönəlib. Paşinyan onun beynəlxalq dairələrdə necə səmimi qəbul edildiyi rəyini formalaşdırmağa çalışır. Əlbəttə, bu elə deyil. Quterreşlə də ayaqüstü görüşüb və fürsətdən istifadə edərək həmin şəkli çəkdirib. Ciddi siyasi xadimlər olan dövlət başçıları sosial şəbəkələrdən istifadə edirlərsə, onların adından yalnız rəsmi xəbərlər paylaşılır. Həmçinin, həmin ölkə başçılarının əlamətdar günlərdə xalqa ünvanladıqları təbriklər çatdırılır. Paşinyan isə virtual aləmdə də populizmlə məşğuldur, bu da onun qeyri-ciddiliyindən xəbər verir. Quterreş də təbii ki, bu incə detala diqqət etməli idi. Çünki onun səmimi şəkil çəkdirdiyi adamın rəhbərlik etdiyi ölkə BMT-nin 4 qətnaməsini yerinə yetirmir. Bu şəkildən Paşinyan dividend götürsə də, Quterreş isə qara piara məruz qalıb. Çünki görmüşük ki, BMT onun qətnamələrini icra etməyən ölkələrə sülhməramlı qoşunlarını yeridir. Onda isə Paşinyana bəslənən bu münasibət nədən xəbər verir? Bu ranqda olan adamlar kiminlə, hansı şəraitdə şəkil çəkdirmələrinə xüsusi diqqət etməlidirlər”.

Məhəmmədəli QƏRİBLİ

Son xəbərlər