Qarabağ problemini münaqişə tərəflərinin maraqlar balansına əsaslanaraq həll etmək mümkündür. Bunu bazar ertəsi İrəvanda mətbuat konfransı zamanı Rusiya xarici işlər naziri Sergey Lavrov bəyan edib.
Ermənistan Baş naziri Nikol Paşinyanın “Dağlıq Qarabağı danışıqlar masası arxasına qaytarmaq cəhdlərinə” dair sualla bağlı Lavrovun səsləndirdiyi fikirlər, bir növ, bu tezisə dəstək xarakteri daşıyıb. Bununla bağlı Lavrov qeyd edib ki, danışıq iştirakçılarının tərkibini tərəflər müəyyən edib razılaşdırmalıdırlar: “Bu məsələ ilə bağlı həm prezidentlər, həm Baş nazir, həm xarici işlər nazirləri fikir bildiriblər. Bir daha qeyd edim ki, danışıq iştirakçılarının tərkibini tərəflər müəyyən edib razılaşdırmalıdırlar. Dağlıq Qarabağ münaqişəsinin tənzimlənməsi üzrə danışıqlarla bağlı məsləhətləşmələrin ilk mərhələsində, döyüşlər dayandırıldığı zaman Dağlıq Qarabağ müvafiq razılaşmaların, atəşkəsdən sonra başlanan müvafiq danışıqların iştirakçısı olub. Hansısa bir mərhələdə Ermənistanın əvvəlki prezidentlərindən biri qərara gəlib ki, Dağlıq Qarabağın maraqlarını İrəvan təmsil edəcək”.
Lavrovun bu fikirləri, açıq-aşkar, Paşinyanın separatçı tərəfin danışıqlarda iştirak etməsi ilə bağlı istəklərinə dəstək verməsi anlamına gəlir. Halbuki, Paşinyan ilk vaxtlardan bəyan edir ki, əvvəllər separatçı qurum danışıqlarda tərəf olub. Guya Heydər Əliyevin prezidentliyi dövründə danışıqlara qatılıb, indi niyə olmasın. Hansı ki, Dağlıq Qarabağdakı separatçı qurum heç vaxt danışıqlarda tərəf olmayıb. Həmsədrlərin vasitəçiliyi ilə danışıqlar Azərbaycan və Ermənistan arasında aparılıb.
Maraqlıdır, bəs ekspertlər S.Lavrovun bu yanlış dəyərləndirməsinə necə yanaşırlar?
“Onun bu fikirləri reallıqdan tam uzaqdır”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Dağlıq Qarabağdakı separatçı qurum danışıqlarda heç vaxt tərəf olmayıb: “Lavrov təcrübəli diplomat olaraq bunu bilməmiş deyil. Ola bilsin ki, ilkin mərhələdə hansısa humanitar xarakterli danışıqlarda iştirak edib. Ancaq bu o anlama gəlmir ki, hansısa mərhələdə separatçı qurum tərəf olaraq danışıqlarda iştirak edib və yaxud da hansısa sənədə imza atıb. Ən azından, separatçıların buna hüquqi əsası yoxdur. Çünki separatçı tərəf heç vaxt danışıqlarda subyekt ola bilməz. Müharibə iki dövlət arasında (Azərbaycanla Ermənistan) gedib. BMT Təhlükəsizlik Şurasının qəbul etdiyi 4 qətnamə də Azərbaycana və Ermənistana aid olub. Qətnamələrdə açıq şəkildə yazılıb ki, erməni tərəfi işğal olunmuş ərazilərdən qoşunlarını geri çəkməlidir. Ona görə də düşünmürəm ki, bütün bunları S.Lavrov bilmir. O, bütün bunları hamıdan yaxşı bilir. Lavrovun bu açıqlaması ermənilərin xeyrinə diplomatik manevrdir. Lavrov, bir növ, bununla Paşinyan rejiminə müsbət jest edir. Əslində isə onun bu fikirləri reallıqdan tam uzaqdır. Rusiya münaqişənin həllində maraqlıdırsa, o zaman daha dəqiq və hüquqa uyğun ifadələr işlətməlidir”.
Vidadi ORDAHALLI
