15/11/2019 06:15
728 x 90

Vaxtından əvvəl Milli Məclis seçkilərini zəruri edən iki faktor(?) – sosial-iqtisadi islahatlar və icra kadrlarının sürətli dəyişdirilməsi...

Xəzər Teyyublu: “Bunun üçün vaxtın irəli çəkilməsi yox, parlamentə gedən yolu bir qədər asanlaşdırmaq lazımdır”

img

İlham Əliyev hakimiyyətə gəldiyi dövrdən başlayaraq daim islahatların aparılmasında maraqlı olub. Biz bu addımları İlham Əliyevin rəhbərliyi altında hakimiyyətin yürütdüyü siyasi kursun təzahürlərində izləmişik. Bu ildən isə sosial və struktur islahatlara daha ciddi start verildi.

Arxada qoyduğumuz aylar ərzində iki böyük sosial paket təqdim olundu ki, ondan da milyonlarla vətəndaş yararlandı. Bir neçə gün ərzində yaşananlar isə ölkənin daha dinamik şəkildə struktur və kadr islahatlarına qədəm qoyduğu mənzərəsini canlandırır. İlham Əliyev dövlətçilikdə mühüm xidmətləri olan və yaşları ilə bağlı onları tutduqları vəzifələrdən azad etməsi xahişilə ona müraciət edən məmurları qəbul edərkən bu təcrübəni dəstəklədiyini dedi. Eyni zamanda, digər məmurlara müraciət etdi ki, bundan örnək götürsünlər. Sonra biz ard-arda bir neçə belə istefanın şahidi olduq. Onların yerinə isə kifayət qədər gənc yaşda olan kadrlar təyin olundular.

Aparılan islahatların fonunda biz şahidi oluruq ki, əhali bununla bağlı gedən müzakirələrdə harda dəyişikliklərin zəruri olduğuna dair ünvanlar göstərir. Bu xüsusda Milli Məclisin də yenilənməyə ehtiyacı olan bir qurum kimi adı çəkilir. Fikirlər onunla əsaslandırılır ki, Milli Məclisdə də kifayət qədər yaşlı olan deputatlar var, onların yeniləri ilə əvəz olunması islahatlar prosesinə daha böyük töhfə verə bilər. Bunun üçün də növbədənkənar parlament seçkilərinin keçirilməsinin zəruriliyi qeyd olunur. Hesab olunur ki, parlamentin köhnə tərkibdə qalmasının islahat prosesinə mənfi təsiri ola bilər.

  • “Bunu etsələr, hakimiyyətin qanunverici qolu da yaxşı islahata məruz qala bilər”

Klassik Xalq Cəbhəsi Partiyasının funksioneri Xəzər Teyyublu “Bakı-Xəbər”ə açıqlamasında bildirdi ki, gedən prosesləri yaxından izləyirlər: “Bilirsiniz, biz müxalif partiyayıq. Buna görə də görülən işlərə münasibətimiz bir qədər fərqlidir. Struktur yeniliklər və ya kadrların əvəzlənməsi kompleks islahat sayıla bilməz. Ancaq hesab edirik ki, bu da zəruridir. Çünki gənclik yeni düşüncə, yeni nəfəs, tərəqqi deməkdir. Bu, hakimiyyətin səlahiyyətinə aid olan məsələlərdir.  Təbii ki, öz kadrlarını yerləşdirirlər. Onların hansı effekt verəcəyini isə yaxın zamanlarda görəcəyik. İnsanlar kadr dəyişikliyinin nəticəsi olaraq iqtisadi vəziyyətlərində irəliləyişin olmasını istəyirlər. Ölkə başçısı da yeni kadrların qarşısına bu tələbi qoyur. İqtisadiyyatın artımı, yeni iş yerlərinin açılması tələbi elə bunları şərtləndirə bilər. Buna da bir qədər vaxt lazımdır.  Aparılan struktur islahatları normaldır. Hesab edirəm ki, hətta bir çox artıq qurumları vahid yerə yığıb, dövlət xərclərinə qənaət etmək olar.

Parlament isə daha funksional olmalıdır. 20-25 il orada oturan adamlar artıq yorulublar. Bu qədər də deputat olmaq olar? Bu, seçkili orqandır, həmin adamlar istefa verib yerini başqasına verə bilməz. Söhbət növbəti seçkidə parlamentin nə vaxt və necə yeniləcəyindən gedirsə, bunu araşdırmaq olar. Razıyam ki, parlamentdə dəyişiklik olmadan atılan bu addımların effekti az olar. Burada dəyişiklik yalnız yaşla bağlı olmamalıdır. Biz istərdik ki, parlamentdə daha fərqli siyasi spektr təmsil olunsun. Müxalifət adı ilə ora düşənlər həqiqi müxaliflik etsinlər. Parlament seçkilərinin keçirilməsi ilə bağlı tələsmək lazım deyil. Onsuz da qanuni vaxtına da az qalıb. Ölkə bələdiyyə seçkiləri ərəfəsindədir. Hesab edirəm ki, hakimiyyət belə israfçılığa getməz. Çünki növbədənkənar parlament seçkilərinin keçirilməsi xeyli xərc apara bilər. Vaxtında keçirilməsi daha yaxşı olar. Düşünürəm ki, hakimiyyət də bu versiyanın üzərində dayanacaq. Seçki mühiti yaxşılaşsa, biz normal parlamentə sahib olarıq. Bunun üçün vaxtın irəli çəkilməsi yox, parlamentə gedən yolu bir qədər asanlaşdırmaq lazımdır. Bunu etsələr, hakimiyyətin qanunverici qolu da yaxşı islahata məruz qala bilər”.

Məhəmmədəli QƏRİBLİ

Son xəbərlər