Dağlıq Qarabağdakı qondarma separatçı rejimin “ombudsmanı” - “hüquq müdafiəçisi” sayılan Artak Beqlaryan noyabrın 4-də Avstriyanın paytaxtı Vyanada səfərdə olub. Separatçı rejimin qanunsuz “ombudsmanı” Avropa Ombudsmanları İnstitutunun “Demokratiyanın və vətəndaş cəmiyyətinin gücləndirilməsində ombudsmanın rolu” mövzusunda keçirdiyi beynəlxalq konfransda iştirak edib.
Maraqlıdır ki, sözügedən tədbirə postsovet məkanındakı separatçı qurumlardan yalnız Qarabağ separatçıları dəvət edilib. Konfransda “Artsax” “ombudsmanı” xüsusilə tanınmamış “dövlət”lərin beynəlxalq təcrid problemini qaldırıb. Bunun guya demokratik təsisatların güclənməsinə mənfi təsir etdiyini vurğulayıb. Beqlaryan tanınmış beynəlxalq sənədlərdə təsbit olunmuş müddəaların əksinə olaraq, beynəlxalq ictimaiyyətin insan hüquqlarının universallığı prinsipinə qarşı olduğunu diqqətə çatdırıb.
Bu məsələ ilə əlaqədar olaraq Avropa Ombudsmanları İnstitutunun baş katibi Cozef Sigel təşkilatın insan haqlarının məhdud olmadığına inandığını qeyd edib. Eləcə də inklüzivliyin insan hüquqlarının qorunmasına və demokratiyanın möhkəmlənməsinə kömək edəcəyinə ümidvar olduğunu bildirib.
Göründüyü kimi, Avropanın digər qurumları kimi, Avropa Ombudsmanları İnstitutu da Qarabağ məsələsinə, separatçı rejimə münasibətdə çoxüzlü mövqe tutur. Əvvəla separatçı qurum təmsilçisinin belə bir tədbirdə iştirakına şərait yaradılması beynəlxalq hüquqa, ölkənin ərazi bütövlüyünə hörmətsizlikdir. Digər tərəfdən, Avropa Ombudsmanları İnstitutu demokratiyaya belə önəm verirsə, o zaman postsovet məkanındakı digər separatçı qurum təmsilçiləri tədbirə niyə dəvət edilmir? Deməli, bütün bunlar məqsədyönlü şəkildə həyata keçirilən erməni təəssübkeşliyi siyasətindən irəli gəlir.
“Separatçıların belə konfransda iştirakı həm demokratiya adına, həm də ombudsman təsisatına utancdır”
Məsələyə münasibət bildirən AMİP funksioneri Əli Orucovun sözlərinə görə, bu, Avropa təsisatlarının riyakarlığından irəli gəlir: “Məsələ ondadır ki, digər separatçı qurumlara münasibətdə kəskin mövqe tuturlar, erməni separatçılarına gəldikdə isə fərqli mövqe sərgiləyirlər. O baxımdan Avropa Ombudsmanları İnstitutunun sərgilədiyi mövqe tamamilə beynəlxalq hüquq normalarına ziddir. Qondarma separatçı qurum Rusiya-Qərb qarşıdumasının şiddətlənməsindən istifadə edərək manipulyasiyalarını və saxtakarlıqlarını intensivləşdirir. Qərb dairələri yanlış olaraq düşünürlər ki, Ermənistana və separatçı rejimə dəstək verməklə Moskvanın təsirini azaldaraq tərəflərinə çəkə biləcəklər. Halbuki, işğalçı rejimin mövcudluğu məhz Rusiyadan asılıdır. Separatçıların belə konfransda iştirakı həm demokratiya adına, həm də ombudsman təsisatına utancdır. 1 milyondan çox insanın elementar hüquqlarına hörmət qoymayan, terroru və zorakılığı dövlət siyasətinə çevirən Ermənistan və onun yaratdığı oyuncaq separatçı rejimin bu cür tədbirə dəvət edilməsi qanunsuzluqdur. Fikrimcə, Azərbaycan tədbirin təşkilatçılarına dərhal öz etirazını kəskin şəkildə bildirməli, izahat tələb etməlidir. Terrorçu rejim üçün insan hüquqlarından danışmaq yersizdir. Görünən odur ki, bəzi Avropa təsisatları bilərəkdən erməni separatçılarına qucaq açırlar. Digər separatçılara münasibətdə isə beynəlxalq hüquq normalarına uyğun davranırlar. Bu açıq-aşkar riyakarlıqdır”.
Vidadi ORDAHALLI
