15/11/2019 06:05
728 x 90

Mnatsakanyan Londondan sonra ikinci zərbəni İsveç Universitetində aldı - Nazir Azərbaycanı işğalçı kimi təqdim edə bilmədi...

img

İsveç Beynəlxalq Əlaqələr İnstitutunda Şərq Tərəfdaşlığının 10 illiyinə həsr olunmuş “Ermənistan və Ukrayna nazirləri ilə söhbət” tədbirində öz mühazirəsindən sonra Ermənistan XİN başçısı sualları cavablandırıb.

Erməni KİV-nin verdiyi məlumata görə, XİN başçısı azərbaycanlı deputatın “Ermənistan ermənilərin törətdikləri hərbi cinayətləri, etnik təmizləmələri araşdırmaq üçün Azərbaycanla beynəlxalq məhkəməyə getməyə hazırdırmı?” suallını cavablandırıb. Araşdırmamızdan sonra məlum oldu ki, erməni nazirə bu sualı ünvanlayan millət vəkili Asim Mollazadə olub. Ancaq erməni nazir bu dəfə də öz təcrübəsizliyini göstərərək, özünü növbəti dəfə ifşa edib.

Qeyd edək ki, bu günlərdə Ermənistan XİN rəhbəri Londonda olarkən “BBC” radiosunun suallarını cavablandırarkən də özünü aciz vəziyyətə salmışdı. O, Dağlıq Qarabağla bağlı ünvanlanan suallara lazımi səviyyədə cavab verə bilməmişdi. Gəlin, Mnatsakanyanın İsveçdə özünü necə biabır etdiyinə diqqət edək.

Nazir deyib: “Siz Bakı haqqında eşitmisiniz? Sumqayıt, Marağa haqqında eşitmisiniz? Şaumyan rayonunun işğalı haqqında eşitmisiniz? Mardakert rayonunun bir hissəsinin işğalı haqqında eşitmisiniz? Martuni rayonunun bir hissəsinin işğalı haqqında eşitmisiniz? Davam etməmi istəyirsiniz? Söz məhz bunun haqqındadır. Ritorikanı azaltmağa hazırsınız? Narahatlıqlarımızı başa düşməyə hazırsınız? Belə dialoqa hazırsınız? Yoxsa sizin dediyiniz həqiqət olmalıdır, ondan başqa heç bir həqiqət yoxdur. Yalnız sizin istədiyiniz həll olmalıdır, yoxsa heç bir həll yoxdur. Belə heç bir zaman sülhə malik olmayacağıq. Xalqların sülhə hazırlanmasına dair qeyd etdiyim təminatın əsası budur. Siz yalnız sizi narahat edən məsələlər haqqında danışırsınız. Mələk kimi görünməyə çalışmaq lazım deyil. Mən təhlükəsizlik məsələsinin olduğunu, işğala imkan verməyən yeganə təhlükəsizlik təşkilatının olduğunu dedim. Bu sözlər bildiyiniz və tez-tez istifadə etdiyiniz sözlərdir”.

Göründüyü kimi, erməni nazir bu mövzuda ortaya ciddi bir arqument qoya bilmir və yalnız səs-küy salmaqla sualdan yayınmaq istəyir. A.Mollazadənin sonradan ona necə cavab verdiyini bilmirik. Çünki bununla bağlı informasiya əldə edə bilmədik. İstənilən halda, A.Mollazadə erməni nazirin sözünü kəsməli də olsaydı, onun sayıqlamalarına cavab verməli idi. Çünki Mnatsakanyanın səsləndirdiyi fikirlərin hamısı yalan üzərində qurulub.

Sözügedən tədbirdə iştirak edənlərdən biri də siyasi fəal Bəxtiyar Hacıyev olub. O, sosial şəbəkədəki hesabında bununla bağlı fikirlərini paylaşıb: "Ermənistanın xarici işlər naziri Zöhrab Mnatsakanyan İsveç Beynəlxalq Əlaqələr İnstitutunda Şərq Tərəfdaşlığı mövzusunda çıxış edirdi. Çıxışında Ramil Səfərov mövzusu, onun əfv edilməsi məsələsinə də toxunaraq, elə bir görüntü yaratmağa çalışırdı ki, sanki Ermənistan sülh carçısıdır və münaqişənin həll olunmamasının tək müqəssiri Azərbaycandır.

Mnatsakanyan bir az həşir salıb, hay-küylə Azərbaycan tərəfinin də müqəssir olduğunu bildirdi və sonda Azərbaycan tərəfinə xitabən “burada mələk kimi görünməyə çalışmaq lazım deyil” dedi. Sonra mən söz aldım, dedim ki, Ermənistanda hakimiyyət dəyişikliyi baş verəndə yaxından izləyirdik və bir çoxlarında müsbət gözləntilər vardı ki, Paşinyan hakimiyyəti Qarabağ mövzusunda konstruktiv, ağıllı davranacaq. Amma biz sizin Vaşinqtonda, Brüsseldə və digər Avropa paytaxtlarında çıxışlarınızla Ermənistandakı çıxışlarınızı dinləyəndə tam əks mənzərə görürük. Birtərəfli çıxış edirsiniz və buralarda sülhdən danışıb, Ermənistanda tam əks addımlar atırsınız”.

Siaysi fəal vurğulayıb ki, bu çıxışının ardınca erməni terrorçuların Ermənistanda qəhrəman kimi qəbul edilməsi barədə danışmağına moderator mane olub və suala keçməsini istəyib:

“Suala keçəndə dedim ki, bayaq dediniz mələk kimi təqdim edirsiniz özünüzü, amma siz də mələk deyilsiniz və özünüzü belə təqdim edirsiniz. Hamımıza məlumdur ki, Şərq Tərəfdaşlığının rifahı, təhlükəsizliyi, stabilliyi üçün Qarabağ münaqişəsinin həlli vacibdir. Necə ola bilər ki, Şərq Tərəfdaşlığının bir ölkəsinin baş naziri bütün ölkələr tərəfindən başqa bir Şərq Tərəfdaşlığı ölkəsinin ərazisi sayılan, işğal altındakı torpaqlara gedib, “Qarabağ Ermənistandır və nöqtə” deyir, Qarabağın Ermənistana birləşdirilməsinə çağırış edir və sülhdən danışır. Bu, sülhə necə töhfə verir?

Mnatsakanyan bir neçə başqa sualı alandan sonra sualıma anlaşılmaz, “Baş nazirimizin Qarabağdakı çıxışı elə onu göstərirdi ki, münaqişənin həlli Ermənistan, Azərbaycan və Dağlıq Qarabağ xalqlarından asılıdır” kimi absurd cavab verdi. Amma sonradan tədbir iştirakçılarının bir neçəsi yaxınlaşaraq, yerində sual verildiyini və cavabın absurd olduğunu bildirdilər”.

Azərbaycan Milli İstiqlal Partiyasının funksioneri Elşən Mustafayev qəzetimizə bildirdi ki, Mnatsakanyanın məlum çıxışı bir daha göstərdi ki, ermənilərin arqumentləri bitəndə haray-həşir salırlar: “Erməni nazir bilir ki, beynəlxalq müstəvidə yaranmış vəziyyətin araşdırılması onlara sərf etmir. Çünki ortada işğal faktoru var. Ancaq görün o nə arqument səsləndirir? Deyir ki, guya işğalı Azərbaycan edib. Maraqlıdır ki, bu xüsusda Azərbaycanın öz ərazilərinin adlarını çəkir. Keçmiş Martuni, Mardakert necə işğal oluna bilər? Azərbaycan özü öz ərazilərini işğal edib?  Bakı, Sumqayıt deyəndə guya buradakı ermənilərə edilən hərəkətlərdən söhbət açır. Bəllidir ki, Sumqayıtdakı hadisələri də rus KQB-si ermənilərin əli ilə törətmişdi. Marağaya gəldikdə isə, bu da Tərtər rayonunun inzibati vahidinə aid olan kənddir. Ermənilərin Azərbaycandan köçməsinə gəldikdə isə, bu prosesi də onlar başlayıb. 200 min soydaşımız Ermənistanda yaşadıqları öz ata-baba yurdlarından köçürüldü. Təbii ki, ermənilər bu vəziyyəti gördü və özləri Azərbaycanda yaşamaq istəmədilər. Buranı seçib yaşayan da oldu. Hazırda Azərbaycanda kifayət qədər erməni yaşayır. Ermənistan isə monoetnik ölkədir. Mnatsakanyanın bu çıxışı iştirak etdiyi toplantının  formatına birbaşa zərbədir. Çünki Şərq Tərəfdaşlığının uğurlu inkişafı üçün təhlükəsizlik, sülh, əminamanlıq olduqca vacib şərtdir. Ermənistan isə buna maneə törədir. Onların XİN rəhbəri isə vəziyyəti daha da gərginləşdirməyə çalışır. Fikir verirsinizsə, o, şantajı ilə, hay-kül salmaqla çalışır ki, Azərbaycandan ritorikanı azaltmağı tələb etsin. Bizi işğal amili ilə barışmağa dəvət edir. XİN rəhbəri bununla bir daha sübut etdi ki, onlardan hansısa konstruktivliyi gözləməyə dəyməz”.

Məhəmmədəli QƏRİBLİ

Son xəbərlər