“Əlbəttə ki, belə bəyanatlar Dağlıq Qarabağ münaqişəsinin nizamlanması üzrə aparılan işlərə kömək etmir”. Bunu Rusiyanın xarici işlər naziri Sergey Lavrov Ermənistanın müdafiə naziri David Tonoyanın “Dağlıq Qarabağ məsələsi həll olunub” bəyanatına münasibət bildirərkən deyib.
Lavrovun sözlərinə görə, belə bəyanatlar nizamlanmaya kömək etmir: “Mövqeləri yaxınlaşdırmaq, güzəştə getmək üçün həmsədrlərin davamlı səyləri lazımdır”.
Yeri gəlmişkən onu da qeyd edək ki, bundan əvvəl Lavrov Ermənistan Baş naziri Nikol Paşinyanın “Qarabağ Ermənistandır” fikri ilə razılaşmadığını bəyan etdi. Bildirdi ki, belə açıqlamalar münaqişənin həllinə kömək etmir: “Tərəflər olduqca ciddi bəyanatlar verir. O cümlədən, Dağlıq Qarabağın Ermənistanın olması bəyanatı səslənib. Necə ki, Albaniyanın Baş naziri Kosovonun Albaniyanın olduğunu bəyan edib. Əlbəttə ki, bu bəyanatlar münaqişələrin həllinə kömək etmir, siyasi prosesi tormozdan ayırmağa kömək etmir”.
Bütün bunlar onu göstərir ki, Rusiya Ermənistanın indiki hakimiyyətinin apardığı siyasəti, Dağlıq Qarabağ münaqişəsinin tənzimlənməsi ilə əlaqədar sərgilədiyi yanaşmanı qəbul etmir. Bir ay ərzində iki bənzər açıqlamanın səslənməsi Ermənistana diplomatik baxımdan zərbədir.
Maraqlıdır, bəs ekspertlər bunu necə dəyərləndirirlər?
“Lavrovun Tonoyanın səsləndirdiyi fikirlərə tənqidi prizmadan yanaşmasına çox da arxayın olmamalıyıq”
Məsələyə münasibət bildirən keçmiş diplomat, politoloq Fikrət Sadıqov Lavrovun bu açıqlamasına bir neçə prizmadan yanaşdı: “Rusiya xarici işlər naziri Sergey Lavrovun bir ay ərzində iki bənzər açıqlama səsləndirməsi təsadüfi deyil. Hesab edirəm ki, bu cür açıqlamalar Ermənistan-Rusiya münasibətlərində mövcud olan problemlərdən qaynaqlanır. Məsələ ondadır ki, rəsmi İrəvan Rusiyaya qarşı özünü kifayət qədər sərt aparır. İki dövlət arasında müəyyən problemlərin olması danılmaz həqiqətdir. Həm siyasi, həm də iqtisadi məsələlərlə bağlı tərəflər arasında müəyyən fikir ayrılıqları var. Fikrimcə, bütün bunlar Lavrovun belə açıqlamalarla çıxış etməsində bu və ya digər dərəcədə rol oynayıb. Görünən odur ki, Kreml Paşinyan hakimiyyətinin yeritdiyi siyasi kursdan narazıdır. Bütün bunlara rəğmən, Lavrovun Tonoyanın səsləndirdiyi fikirlərə tənqidi prizmadan yanaşmasına çox da arxayın olmamalıyıq. Nəzərə almaq lazımdır ki, Tonoyanın bəyanatına Lavrovun reaksiyası ümumi ifadələrdən ibarət oldu. Düzdür, o bunu deyərkən Tonoyanın bəyanatını nəzərdə tuturdu. Ancaq o daha sonra ümumi şəkildə dedi ki, belə bəyanatların səslənməsi məqsədəuyğun deyil. Yəni münaqişənin həllinə xidmət etmir. Bax, bu reallığı da biz nəzərə almalıyıq”.
Vidadi ORDAHALLI
