Ölkədə heç bir sosial dayağı olmayan radikal müxalifət təmsilçiləri öz səviyyəsiz davranışları, hərəkətləri, verdikləri açıqlamalarla gülünc vəziyyətə düşməkdə davam edirlər. Xalqdan heç bir dəstək almayan, Azərbaycan dövlətinin müstəqilliyinə qarşı olanlara nökərçilik etməkdən yorulub usanmayan bu qüvvələr xalqı təhqir etməkdən də çəkinmirlər.
Milli Şuranın “primadonnası” hesab edilən Gültəkin Hacıbəylinin öz fəaliyyəti ilə xalqımıza, dövlətçiliyimizə qarşı etdiyi xəyanətlər bəs deyilmiş, o indi də radikal müxalifətə heç bir dəstək verməyən Azərbaycan xalqını təhqir edib. G.Hacıbəyli çıxışlarından birində xalqı “rejimin eksperiment dovşanı” adlandırmaqdan çəkinməyib.
Xalqı “dovşan” adlandıran anti-Azərbaycan qüvvələrinə nökərçilik edən G.Hacıbəyli görəsən özünü nə zənn edir?
Şakir Ağayev: “Gültəkin Hacıbəylinin xalqı “rejimin eksperiment dovşanı” adlandırması xalqa böyük təhqirdir”
“Novoe vremya” qəzetinin baş readktoru Şakir Ağayev “Bakı-Xəbər”ə açıqlamasında G.Hacıbəylinin xalqı “rejimin eksperiment dovşanı” adlandırmasına kəskin reaksiya bildirdi. O qeyd etdi ki, xalq öz seçimini edib və dövlətə, hakimiyyətə dəstək verir, radikal müxalifət isə xalqdan heç bir dəstək ala bilmir. Bu amilin də radikal müxalifət düşərgəsinin dayaqsız qalmasına səbəb olduğunu deyən Ş.Ağayevin sözlərinə görə, G.Hacıbəyli xalqı təhqir etməklə özünün və təmsil olunduğu radikal düşərgənin xalqa münasibətini ortaya qoyub. Siyasi şoularla gündəmə gəlməyə çalışan radikal düşərgənin təmsilçilərindən birinin xalqı təhqir etməsinin yolverilməz olduğunu deyən Ş.Ağayev hesab edir ki, G.Hacıbəylinin xalqı təhqir etməsi onun xalqa psixoloji təzyiq göstərmək, xalqı qıcıqlandırmaq məqsədindən irəli gəlir. “Gültəkin Hacıbəylinin xalqı “rejimin eksperiment dovşanı” adlandırması xalqa böyük təhqirdir. Ümumiyyətlə, nə Gültəkin Hacıbəylinin, nə də digərlərinin Azərbaycan xalqını təhqir, təhdid etməsi, xalqı ittiham etməsi yolverilməzdir və heç kəsin buna haqqı çatmır. Xalq kimin yanında olmağı, hansı tədbirdə iştirak etməyi, kimə dəstək verməyi həmişə özü seçir. Xalqı zor gücünə nəyəsə cəlb etmək mümkün deyil. Xalqın təhqir edilməsi qəbuledilən deyil. Ümumiyyətlə, xalqı təhqir etmək siyasətlə məşğul olmaq iddiasında olan adama heç vaxt yaraşmaz. Xalq nə üçün “eksperiment dovşanı” adlandırılmalıdır? Xalqın öz seçimidir və xalq da öz seçiminin ardınca gedir, o, radikal qüvvələri seçmir. Hesab edirəm ki, Gültəkin Hacıbəyli bu şəkildə xalqı təhqir etməklə xalqa psixoloji təzyiq göstərmək məqsədi güdür. Bu sözün psixoloji təzyiq vasitəsi kimi xalqa ünvanlanması bir siyasətçiyə yaraşmayan haldır. Onlar xalqı öz sıralarına cəlb edə bilmədikləri üçün, bu cür açıqlamalar verirlər. Gültəkin Hacıbəyli xalqa deyir ki, bizim yolumuzla getmirsənsə, dediklərimizi etmirsənsə, sən beləsən. Bu da yolverilməzdir” - deyə Ş.Ağayev vurğuladı.
Elçin Mirzəbəyli: “Qoy Gültəkin Hacıbəyli gedib, ən yaxşı halda, dovşan ferması yaradıb orada fəaliyyət göstərsin”
“Xalq cəbhəsi” qəzetinin baş redaktoru Elçin Mirzəbəyli də G.Hacıbəylinin xalqı bu şəkildə təhqir etməsini etirazla qarşıladı. “Ancaq dovşanın ağlına belə bir şey gələr. Çünki G.Hacıbəyli özü indiyə qədər saysız mahiyyətli eksperimentlərdə iştirak edib, “təcrübə dovşanı” funksiyasını yerinə yetirib. Bu aspektdən də özü kimi hamının da eksperiment predmeti olduğunu zənn edir, düşünür. Belə düşüncə sahibinin, ümumiyyətlə, Azərbaycan siyasətində nə işi var, nə yeri var? Qoy G.Hacıbəyli gedib, ən yaxşı halda, dovşan ferması yaradıb orada fəaliyyət göstərsin” - deyə E.Mirzəbəyli qeyd etdi.
İradə SARIYEVA
