Ermənistanın Baş naziri Nikol Paşinyan Rusiyanın nüfuzlu “Kommersant” qəzetinə müsahibə verib. Paşinyan geniş müsahibəsi zamanı Rusiyanı şantaj etməyi də unutmayıb. Hətta həmin ölkənin boynuna bir minnət də qoyaraq deyib ki, strateji müttəfiqlər üçün Ermənistandakı iqtisadi inkişaf dinamikasının aşağı düşməməsi maraqlı olmalıdır. Bununla Paşinyan fikrini belə əsaslandırır ki, bu rıçaq Rusiyanın əlindədir. Bunun üçün Ermənistana satılan təbii qazın qiyməti normal olmalıdır.
Paşinyan bildirib ki, hazırda Ermənistanda iqtisadi inkişaf yüksək templə gedir(?): “Bu səbəbdən də razılaşmamız müttəfiqlik əsasında olmalıdır. Başqa cür ola da bilməz”.
Erməni Baş nazir qazın qiyməti ilə bağlı konkret rəqəmlər əsasında danışmaq istəməyib və bildirib ki, Rusiya ilə onları daha sıx müttəfiqlik telləri bağlayır: “Rusiyanın hansısa problemi olanda, biz dərindən narahat oluruq. Onlardan da adekvat münasibət görmək istəyirik”.
Sadalanan fikirlərdən sonra bu qənaətə gəlmək olarmı ki, Paşinyan Rusiyanı açıq-açığına şantaj edir?
Elşən Mustafayev: “Ermənistanda belə inkişaf varsa, Paşinyan niyə pul vermək əvəzinə, şantaja keçir?”
Milli İstiqlal Partiyasının funksioneri Elşən Mustafayev “Bakı-Xəbər”ə açıqlamasında bildirdi ki, Ermənistanın nə demək istədiyi aydın görünür: “Adətən görmüşük ki, qaz şantajı ilə Rusiya məşğul olur. Çünki o, istehsalçı ölkədir. Bir çox hallarda Rusiya qaz təzyiqindən istifadə edib, ölkələrə öz siyasi şərtlərini diqtə edir. Biz bunu Ukrayna təcrübəsində də görmüşük. Ancaq Rusiyanın Ermənistanı şantaj etməsi üçün heç bir istəyi yoxdur. Çünki həmin ölkənin sərhədlərini rus sərhədçiləri qoruyur. Ölkənin ərazisində Rusiyanın hərbi bazası var. Burada yalnız Ermənistanın yeni rəhbərliyinin vurnuxması nəzərə çarpır. Məhz bu səbəbdəndir ki, qaz söhbəti indi meydana çıxıb. Görürsünz ki, Paşinyan deyir Ermənistanda gedən iqtisadi “inkişafı” əngəlləmək olmaz. Bununla Rusiyaya ultimatum verir ki, bunu etsəniz, Ermənistan çökəcək və bu, Moskvanın boynunda qalacaq. Rusiya Ermənistana qazı baha qiymətə satmır. Ermənistanda belə inkişaf varsa, Paşinyan niyə pul vermək əvəzinə, şantaja keçir? Ermənistanda Paşinyana yaxın olan media tez-tez bu fikirləri səsləndirir ki, dünya bazarında qazın qiymətləri aşağı düşür. Qazın qiyməti min kubmetr qaza görə 150-160 dollar aralığında dəyişir. Hazırda isə Rusiya Ermənistana qazı min kubmetrə görə 165 dollara satır. Yəni onların qənaətincə bu, dünya qiymətindən bahadır. Rusiya isə sərhəddəki qazının min kubmetrinin qiymətini 215 dollara qaldırmaq istəyir Hətta bununla bağlı Ermənistana xəbərdarlıq da olunub.
İrəvan isə hətta hazırda aldığı qiymətin daha da azaldılmasını istəyir və bunun üçün Moskva ilə danışıqlar aparır. Erməni KİV-i isə yazır ki, razılıq əldə olunmazsa, gələn ildən Rusiya təbii qazını Ermənistana daha baha qiymətə satacaq ki, bu da erməni istehlakçıların daha çox vergi verməsi ilə nəticələnəcək. Yəni Paşinyanın şantajları nəzərə alınmaya da bilər”.
Məhəmmədəli QƏRİBLİ
