Azərbaycan Prezidentinin Dağlıq Qarabağın işğaldan azad olunması istiqamətində çalışmaları ciddi təsirini göstərməkdədir. Qoşulmama Hərəkatı ölkələrinin Bakı Sammitində Azərbaycanın siyasi dəstək alması erməniləri yenidən hərəkətə gətirib. Tədbirin sonunda qəbul edilmiş sənədlə bağlı Ermənistan XİN bəyanatla çıxış edib. Bəyanatda Qoşulmama Hərəkatının üzvü olan ölkələrdən məsuliyyətli olmaq və danışıqlar prosesinə hörmətlə yanaşmaq tələb edilir.
Erməni diplomatiyası bu məsələdə də naşılığa yol verərək, Azərbaycanın üstün mövqeyini tədbirə sədrlik və evsahibliyi etməsi ilə əlaqələndirməyə çalışır. Onlar bildirirlər ki, Qarabağla bağlı məsələdə subyektivliyə yol verilib. Ermənistan XİN-i sonda Hərəkatda təmsil olunan üzv ölkələrə müraciət edərək onları obyektiv mövqe tutmağa çağırır.
Ermənistanın Qoşulmama Hərəkatının Bakıda keçirilən Zirvə toplantısı və onun yekununda qəbul edilən sənədlə bağlı keçirdiyi narahatlığın kökündə hansı amillər durur?
Yeganə Hacıyeva: “Birdən-birə bu qədər ölkənin rəsmi İrəvanı işğalçı kimi tanıması Ermənistan diplomatiyasının fiaskosu idi”
Politoloq Yeganə Hacıyeva “Bakı-Xəbər”ə açıqlamasında bildirdi ki, keçən həftə Qoşulmama Hərəkatının Bakıda keçirilən 18-ci sammiti başa çatdı. Sammitin gedişatında siyasi, iqtisadi, humanitar, mədəniyyət və təhlükəsizlik sahəsini əhatə edən, ümumlikdə, 10-a yaxın sənəd və ən əsası, bütün iştirakçıların dəstəklədiyi dörd əsas sənəd qəbul olundu: “Bütün iştirakçıların dəstəklədiyi sənədlər Bakı Yekun Sənədi, Bakı Siyasi Bəyannaməsi, Fələstin bəyannaməsi və yekun olaraq tədbirin yüksək səviyyədə keçirildiyi üçün ev sahibi Azərbaycan hökumətinə və xalqına təşəkkür və həmrəylik sənədi qəbul edildi.
Bizim üçün digər sənədlər də mühüm olsa da, əlbəttə, qəbul olunmuş qərarlardan ən mühümü, heç şübhəsiz, Azərbaycanın ərazi bütövlüyünə dəstək ifafə olunan sənədlər oldu.
Azərbaycanın ərazi bütövlüyünün dəstəklənməsi yekun 4 sənəddən ikisində - Bakı Siyasi Bəyannaməsində və Azərbaycan hökumətinə və xalqına təşəkkür və həmrəylik sənədində öz əksini tapdı. Bakı Yekun Sənədində BMT-nin üzvü olan 193 ölkədən 120 ölkənin dövlət və hökumət başçıları ərazilərin güc yolu ilə zəbt edilməsinin yolverilməzliyini vurğuladılar və Azərbaycan ərazilərinin Ermənistan tərəfindən işğal olunduğu tanındı. Yəni birdən-birə bir sənədlə 120 dövlət Azərbaycanın ərazi bütövlüyünü, Ermənistanın ərazilərimizi işğalı faktını tanıdı. Daha konkret desəm, dünyada beynəlxalq birliyin subyekti olan dövlətlərin 63 %-nin Ermənistanı işğalçı kimi tanımağı anlamına gəlir.
Rəsmi Ermənistanın Qoşulmama Hərəkatı üzvlərinə ünvanlanan müraciətinin əsası da bu faktdan narahat olmasıdır. Birdən-birə bu qədər ölkənin onu işğalçı kimi tanıması Ermənistan diplomatiyasının fiaskosu idi.
Burada bir şeyi xüsusi qeyd etmək istəyirəm: istər daxildə radikal qruplar, istərsə də xaricdə anti-Azərbaycan dairələri sanki bir dirijorun müşayiətindəkı ansambl kimi Qoşulmama Hərəkatının Bakı Sammitini Azərbaycan üçün vaxt və maliyyə itkisi kimi qələmə verməyə və cəmiyyətdə yanlış fikir formalaşdırmağa çalışırdılar.
Siz diqqət edin, ayrı bir vaxtda, BMT-nin üzvü olan 193 ölkədən 120 ölkənin dövlət və hökumət başçılarının imzası duran Bakı Yekun Sənədi ilə təsdiqlənən ərazilərimizin güc yolu ilə zəbt edilməsi faktının yolverilməzliyi və Azərbaycan ərazilərinin Ermənistan tərəfindən işğalının tanınması üçün nə qədər zaman, nə qədər maliyyə və enerji sərf edilməli idi.
Odur ki, Qoşulmama Hərəkatının Bakıda keçirilən 18-ci Sammiti ölkəmiz üçün mühüm, xarici siyasətimiz üçün uğurlu bir siyasi tədbir oldu. Ermənilərin də bu yöndəki narahatlığı əbəs deyil”.
Məhəmmədəli QƏRİBLİ
