Qoşulmama Hərəkatının Bakıda keçirilən XVIII Zirvə görüşü Ermənistan-Azərbaycan Dağlıq Qarabağ münaqişəsi ilə bağlı Azərbaycanın ədalətli mövqeyini daha da gücləndirdi. Qəbul edilmiş sənədlərdə dövlət və hökumət başçıları münaqişənin BMT Təhlükəsizlik Şurasının qətnamələrinə baxmayaraq, hələ də həll olunmamasından təəssüf hissi keçirdiklərini bildirir və onun Azərbaycanın suverenliyi, ərazi bütövlüyü, sərhədlərinin toxunulmazlığı əsasında həll olunmasının vacibliyini vurğulayırlar.
Yekun Sənədə ilk dəfə olaraq çox mühüm yeni bənd daxil edildi. Bu bənddə dövlət və hökumət başçıları güc yolu ilə ərazilərin zəbt edilməsinin yolverilməzliyini vurğulayır və təsdiq edirlər ki, heç bir dövlət Azərbaycan Respublikasının ərazilərinin işğal edilməsi nəticəsində yaranmış vəziyyətin qanuniliyini tanımayacaq, bu ərazilərdə iqtisadi fəaliyyətlər də daxil olmaqla, bu cür vəziyyətin saxlanması üçün hər hansı kömək göstərməyəcək. Burada bilavasitə işğalçı ifadəsindən istifadə olunur. Bu, Ermənistanın növbəti dəfə 120 dünya dövləti tərəfindən işğalçı kimi tanınması deməkdir.
Yekunda qəbul olunmuş Bakı Bəyannaməsində Azərbaycanın öz ərazi bütövlüyünü bərpa etməsi səylərinə ciddi dəstək ifadə olunub: “Biz, dövlət və hökumət başçıları Azərbaycanın müstəqilliyi, suverenliyi və ərazi bütövlüyünə möhkəm dəstəyimizi ifadə edirik və Azərbaycanın öz ərazi bütövlüyünü bərpa etməsi ilə bağlı səyləri ilə həmrəyliyimizi ifadə edirik”.
Ermənistan və onun havadarlarının dəridən-qabıqdan çıxmasına baxmayaraq, Azərbaycan Prezident İlham Əliyevin rəhbərliyi ilə böyük diplomatik uğura imza atdı, 120 dövlətin təmsil olunduğu Zirvə görüşünün nəticəsində Ermənistanın işğalçı dövlət kimi ifşa edilməsinə nail oldu.
Azərbaycanın yürütdüyü düzgün diplomatik kurs nəticəsində Ermənistana vurulan bu zərbə onlar üçün hansı fəsadlara səbəb ola bilər? Bu sənədin qəbulu onu deməyə əsas verirmi ki, Ermənistanın daha 120 ölkə ilə münasibətlərini yaxşılaşdırmaq imkanları bloklandı?
Elşən Həsənov: “Ermənistanın düşdüyü bu vəziyyətdən çıxması üçün yeganə yolu Azərbaycanın ərazi bütövlüyünə hörmət etmək və işğaldan əl çəkməkdən keçir”
Azərbyacan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, qəbul edilən sənədi çox böyük diplomatik qələbə saymaq olar: “Bunun həm də sədrliyin Azərbaycana keçdiyi dönəmdə baş verməsi olduqca əhəmiyyətlidir. Azərbaycan quruma sədrlik edən ölkə olaraq qəbul edilmiş yekun sənədin icrasına nəzarət edəcək, onu daim gündəmdə saxlamaq imkanına malik olacaq. Ermənistanın və onun havadarlarının Azərbaycanın imicini dünya ictimaiyyətinin gözündə ləkələmək üçün hər cür səy göstərməsinə baxmayaraq, Prezident İlham Əliyevin rəhbərliyi ilə Azərbaycan böyük diplomatik uğurlara imza atıb. Qoşulmama Hərəkatının Zirvə görüşü 4 sənədin qəbulu ilə yekunlaşdı. Yekun Bakı Bəyannaməsində Azərbaycanın öz ərazi bütövlüyünü bərpa etməsi səylərinə ciddi dəstək ifadə olunub. Zirvə görüşündə iştirak edən ölkələr Azərbaycanın müstəqilliyi, suverenliyi və ərazi bütövlüyünə möhkəm dəstəklərini və Azərbaycanın öz ərazi bütövlüyünü bərpa etməsi üzrə səyləri ilə həmrəyliklərini ifadə ediblər. Bu isə Ermənistanın 120 ölkə tərəfindən işğalçı dövlət kimi tanınması deməkdir. Azərbaycan Respublikası 2019-2022-ci illərdə Qoşulmama Hərəkatına sədrlik edəcək. Bu, az müddət deyil. Qoşulmama Hərəkatının Bakıda keçirilən Zirvə görüşünə, ümumilikdə, 60-a yaxın ölkənin dövlət və hökumət başçısı, həmçinin, beynəlxalq təşkilatların rəhbərləri qatılıb. Bunun özü Qarabağ həqiqətlərinin əyani şəkildə geniş bir elitar auditoriyaya çatdırılması anlamına gəlir. Qurumda dünyanın çox nüfuzlu ölkələri təmsil olunurlar. Belə korrekt bir sənədin qəbulu o anlama gəlir ki, onsuz da diplomatik səyləri tam fiaskoya uğrayan Ermənistan üçün daha bir baryer yarandı. Təbii ki, Ermənistanın həmin ölkələrlə normal diplomatik əlaqələr qurması çətinləşəcək. Çünki qarşı tərəfin onları işğalçı kimi tanıyan imzası var”.
Ekspertin fikirincə, bu bir daha Ermənistanın işğalçı mahiyyətini ifşa etdi: “Bununla Qoşulmama Hərəkatı həm də öz təməl prinsiplərinə sadiq qalmış oldu. Bu, eyni zamanda, beynəlxalq ictimaiyyətin Azərbaycanın haqq səsinə verdiyi önəmin göstəricisidir. Bu bir daha göstərir ki, Ermənistan bir işğalçı ölkə kimi get-gedə küncə sıxışdırılır. Ermənistanın düşdüyü bu vəziyyətdən çıxması üçün yeganə yolu Azərbaycanın ərazi bütövlüyünə hörmət etmək və işğaldan əl çəkməkdən keçir”.
Məhəmmədəli QƏRİBLİ
