Ermənistan Müdafiə Nazirliyinin silah alınması üzrə keçirdiyi tenderdən Rusiya şirkətini çıxarması iki ölkə arasında gərginlik yaradıb. İrəvan "Promtexnoloqii" qrupuna daxil olan “ORSIS” şirkətini həm də "ləyaqətsiz təchizatçılar siyahısı”na salıb ki, bu da Rusiyanın Ermənistana nota verməsinə səbəb olub.
Rəsmi Moskva Rusiyanın “ORSIS” şirkətinin də iştirak etdiyi silah tenderinin dayandırılması ilə əlaqədar Ermənistana etiraz notası göndərib və bu ölkənin müdafiə naziri David Tonoyandan bu vəziyyəti həll etməsi istənilib. Bu barədə yayılmış sənəddə deyilir ki, 2019-cu ilin avqust ayında “ORSIS” şirkətinin nümayəndəsi “RİA Novosti”yə bildirib ki, onların da qatıldığı bir neçə milyon dollarlıq silah tədarükü ilə bağlı Ermənistan Müdafiə Nazirliyinin tenderinin ləğvindən sonra ölkədə “xidmətə qarşı laqeydlik” maddəsi ilə cinayət işi başlanıb. Sonradan bu məlumat nazirlik tərəfindən də rəsmi olaraq təsdiqlənib. 2 oktyabr 2019-cu ildə Rusiya Federasiyası Sənaye və Ticarət Nazirliyi rəhbərinin müavini Oleq Ryazansev tərəfindən imzalanmış və Ermənistanın müdafiə naziri David Tonoyana ünvanlanan notada deyilir ki, “ORSIS”in bu tenderdə iştirak üçün müraciəti “səbəbsiz olaraq rədd edilib” və şirkətin özü Ermənistan ordusunun “ləyaqətsiz təchizatçıları siyahısı”na daxil edilib. Sənəddən də görünür ki, Ermənistan Müdafiə Nazirliyi “tenderdə iştirak üçün bank zəmanətinin ödənilməsi tələbi ilə banka qanunsuz müraciət edib”, baxmayaraq ki, şirkət tenderdə qalib gələrsə və müqaviləni imzalamaqdan imtina etsə belə, kompensasiya ödənilməsi qanunla tələb olunur.
Çox qəribədir ki, Ermənistan tərəfi Rusiyanın bununla bağlı nota verilməsini danır. Ermənistan XİN-in mətbuat katibi Anna Nağdalyan jurnalistlərə açıqlamasında bildirib ki, belə bir nota daxil olmayıb: “Ermənistan Xarici İşlər Nazirliyinə silah tədarükü üzrə tenderin pozulması ilə əlaqədar Rusiya Xarici İşlər Nazirliyindən heç bir mesaj gəlməyib”.
Görünən odur ki, Ermənistan həm tenderə qoşulmuş Rusiya şirkətini kənarlaşdırır, həm də yalan bəyanat verir. Saki tərəflər arasında heç nə baş verməyib. Bütün hallarda, yaşanan qalmaqal iki ölkə münasibətlərinə təsirsiz ötüşməyəcək.
“Ermənistan Rusiyanın Azərbaycanı daha müasir silahlarla təmin etməsini həzm edə bilmir”
Məsələyə münasibət bildirən politoloq Elşən Manafovun sözlərinə görə, tenderdən Rusiya şirkətinin çıxarılması təsadüfi deyil: “Bu qalmaqal Ermənistan hakimiyyətinin Rusiya ilə münasibətlərində olan gərginliyin daha da artması üçün müəyyən mənada ciddi amil ola bilər. Çünki Paşinyan hakimiyyətinin qərbyönümlü siyasəti onsuz da Kremli qane etmirdi və münasibətlərdəki gərginlik də bununla əlaqədar idi. Baxmayaraq ki, Paşinyan Moskva ilə münasibətlərə ölçülü-biçilmiş kontekstdə yanaşmağa çalışır. Ancaq Ermənistan Rusiyanın Azərbaycanı daha müasir silahlarla təmin etməsini həzm edə bilmir. Ermənistan hakimiyyətinin düşüncə tərzinə görə, Rusiya öz müttəfiqi ilə münasibətlərin mahiyyətinə sanki xəyanət edir. Ermənistan hesab edir ki, bu ölkə KTMT-də təmsil olunduğu üçün Rusiya Azərbaycana silah ixrac etməməlidir. O üzdən, “ORSIS”i tenderdən kənarlaşdırmaqla Rusiyaya etirazını bildirmək istəyir. Bu, məsələnin bir tərəfi. Digər tərəfdən, bu addım Ermənistan hakimiyyətinin qərbyönümlü siyasət yeritməsindən irəli gəlir. Ona görə də baş verənlər təsadüfi deyil. Ancaq, bütün hallarda, Rusiyanın Ermənistanın hazırkı hakimiyyətinə təsir etmək üçün kifayət qədər rıçaqları var. Qazın qiymətinin qaldırılması kifayət edir ki, Ermənistan iqtisadiyyatı pis vəziyyətə düşsün. Ancaq Kreml hələlik tələsmir. Gözləyir ki, ölkədə sosial narazılıqlar bir qədər də artsın. Ondan sonra “Qarabağ klanı”ndan bir vasitə kimi istifadə edib ölkədə Paşinyan hakimiyyətini devirsin”.
Vidadi ORDAHALLI
