Azərbaycan Respublikasının Prezidenti İlham Əliyev oktyabrın 23-də Mikayıl Cabbarovu yeni vəzifəyə təyin olunması ilə əlaqədar qəbul edərkən ona sahibkarların hüquqlarının qorunması və onların məmurlar tərəfindən incidilməməsilə bağlı xüsusi tapşırıq verib: "Biz çox yaxşı bilirik ki, inkişaf etmiş ölkələrdə ümumdaxili məhsulda əsas rolu kiçik və orta sahibkarlar oynayır. Bizdə isə hələ ki, belə deyil. Biz də çalışmalıyıq elə bir şərait yaradaq ki, hər bir istedadlı insan, biznesə meyli, həvəsi olan hər bir insan bizneslə məşğul ola bilsin, məmur təzyiqindən, müdaxiləsindən azad olsun".
Dövlət başçısı bildirib ki, sahibkarlara yönəlmiş o çirkin əllər gərək kəsilsin: "Bəzi hallarda dövlət məmurları, yerli icra orqanlarının rəhbərləri, nümayəndələri imkan vermirlər, xüsusilə bölgələrdə. Əgər indi kimsə özü üçün bir balaca iş qurursa, gəlib zəli kimi onun bədənindən yapışırlar, qanını sorurlar. Belə adamlara qarşı çox ciddi tədbirlər görüləcək.
Hüquq-mühafizə orqanları artıq məndən çox ciddi tapşırıq alıblar və siz nazir kimi çalışmalısınız ki, belə hallara yol verilməsin, əgər yol verilərsə, dərhal məni məlumatlandırın. Belə yaramaz məmurlara qarşı ən ciddi sanksiyalar və tədbirlər görüləcək. Ona görə biz sahibkarlara nəfəs verməliyik ki, onlar rahat işləsinlər. Vergidən başqa heç bir ödəniş ola bilməz".
Prezidentin verdiyi tapşırıqda sahibkarlardan alınan qanunsuz ödənişlərə son qoyulması tapşırılıb. Ölkə başçısı “vergidən başqa heç bir ödəniş ola bilməz" deməklə sahibkarları hansı qanunsuz ödənişlərdən xilas etmiş oldu?
“Belə məmurlarla bağlı ciddi ölçü götürülsə, sahibkarların incidilməsinə son qoyular”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, ölkə başçısı olduqca ciddi bir məsələyə toxunub: “Kiçik və orta sahibkarlığın inkişafı dövlətin iqtisadi qüdrətini artıran başlıca amildir. Ancaq təəssüflər olsun ki, bəzi məmurlar buna doğrudan da maneçilik törədirlər. Prezident doğru olaraq qeyd etdi ki, xüsusilə də regionlarda bu hal daha geniş vüsət alıb. Mən bir neçə faktı sizin diqqətinizə çatdırmaq istərdim. Bilirsiniz ki, rayonların sosial-iqtisadi inkişafı ilə bağlı dövlət büdcəsi və ya Prezidentin ehtiyat fondundan vəsait ayrılır. Ancaq bir çox rayonda həmin abadlıq işlərini sahibkarlara gördürürlər. Sahibkar niyə bunu etməlidir? İş adamı vergi ödəyirsə, ordan da büdcə formalaşır. Büdcədən də rayonun abadlaşması üçün vəsait ayrılır. İlk növbədə bu məsələyə son qoyulmalıdır. Sonra Rusiyada biznesi olan hər hansı bir soydaşımız oradakı biznesinin bir hissəsini bura köçürmək istəyəndə onları elə sıxırlar ki, didərgin düşürlər. Bu yaxınlarda Rusiyadan olan tanıdığım iş adamı gəlib rayonlardan birində istirahət mərkəzi açmaq istəyirdi. Bütün sənədləri qaydasındaydı, hətta aldığı torpağın çıxarışı vardı. Ondan o qədər qanunsuz ödəmələr tələb etdilər ki, axırı işi yarımçıq qoyub getdi. Sahibkarlardan onların inşa etdirmək istədiyi hansısa tikiliyə sərəncam vermək üçün də rüşvət tələb edilir. Təbii ki, bütün sadalanan amillərin nəticədə ziyanı ölkənin iqtisadiyyatına dəyir. Ölkə başçısı deyir ki, hüquq-mühafizə orqanlarına bu cür hallarla bağlı ciddi mübarizə aparmaq göstərişi verilib. Bu məsələdə onların da üzərinə ciddi məsuliyyət düşür. Belə məmurlarla bağlı ciddi ölçü götürülsə, sahibkarların incidilməsinə son qoyular”.
Məhəmmədəli QƏRİBLİ
