ABŞ bir neçə min İŞİD-çi əsiri Suriyanın şimalında buraxaraq geri çəkilir...
Bu günə qədər Türkiyənin Suriyanın şimalında hərbi əməliyyata başlamaq niyyətinə qarşı çıxan ABŞ əsgərlərini bölgədən çıxarır, Tel Abyad və Rasulayndakı hərbi bazaları da boşaltmağa başlayıb. Bununla Türkiyə qarşısında əsas maneə ortadan qalxmış oldu. Qardaş ölkə Suriyanın şimalında hərbi əməliyyata hər an başlaya bilər.
Baki-xeber.com xarici mediaya istinadən xəbər verir ki, ABŞ əsgərlərini bölgədən çıxarılması qərarı ABŞ və Türkiyə prezidentləri Rəcəb Tayyib Ərdoğanla Donald Tramp arasında telefon danışığı zamanı verilib.
Prezidentlərin telefon danışığının təfərrüatlarını Ağ Ev açıqlayıb. "Türkiyə yaxın vaxtlarda Suriyanın şimalına uzun müddətdir planlaşdırdığı əməliyyat üçün hərəkətə keçəcək. ABŞ Silahlı Qüvvələri bu əməliyyatı dəstəkləməyəcək ya da bu əməliyyata daxil olmayacaq" - Ağ Evin açıqlamasında deylir.
ABŞ hökumətinin Suriyada tutulan İŞİD üzvü vətəndaşlarını geri almaları üçün Fransa, Almaniya və digər AB ölkələrinə təzyiq etdiyi, ancaq bu ölkələrin terrorçuları geri almaq istəmədiyi deyilən açıqlamada ABŞ-ın bu insanları illərlə əlində saxlamayacağına işarə edilir.
Ağ Evin açıqlamasında qeyd edilir ki, bundan belə ABŞ-ın son iki ildir bölgədə yaxaladığı İŞİD döyüşçülərinə Türkiyə cavabdeh olacaq.
Ərdoğan-Tramp danışığından dərhal sonra bölgədəki ABŞ əsgərlərinin istifadə etdiyi bazaların boşaldılmasına başlanıb. ABŞ əsgərlərinin bölgədən çəkilməsi xəbərlərini Ərdoğan da təsdiqləyib.
ABŞ rəsmilərindən biri “Reuters”ə “Amerika qüvvələri YPG terrorçularını müdafiə etməyəcək” deyib. Agentliyə açıqlama verən bir Türkiyə rəsmisi isə "Hərbi əməliyyat hər an başlaya bilər. Ancaq ABŞ qüvvələrinin bölgədən təm çəkilməsini gözləmək ehtimalı da var" deyib.
Suriya Demokratik Qüvvələrinin (SDG) əsas bazasını təşkil edən YPG/PKK terror təşkilatı isə ABŞ-ın çəkilmək qərarına sərt reksiya verib. "Təhlükəsizlik mexanizmi və mövqelərin dağıdılmasına baxmayaraq, ABŞ qüvvələri öz vəzifələrini yerinə yetirmədi və bölgənin yenidən döyüş meydanına çevrilməsinə icazə verərək sərhəddən çəkilməyə başladılar” – terrorçular bildirib.
Trampın çəkilmək qərarı Amerika və Qərb mediasında da ABŞ-ın Suriyadakı kürd müttəfiqlərini tərk etməsi kimi xarakterizə olunub. “New York Times” qəzeti Trampın Amerikanın siyasətini dəyişdirərək Türkiyənin Suriyada hərbi əməliyyatına dəstək verdiyini yazır: “Trampın qərarı həm İŞİD-ə qarşı əməliyyatlar, həm də İran və Rusiyaya qarşı Suriyanın şimalında kiçik bir hərbi qüvvə saxlamaq istəyən Pentaqon və Dövlət Departamentinin yüksək vəzifəli rəsmilərinin tövsiyələrinə qarşı çıxmaqdır”.
“The Guardian” qəzeti də "ABŞ kürd müttəfiqlərini tərk edərək Türk qüvvələrinin Suriyaya girməsinə icazə verəcək" başlıqlı xəbərində ABŞ-ın siyasətini qəflətən dəyişdiyini yazır.
Qəzet Tramp və Ərdoğan arasındakı telefon danışığından sonra Trampın siyasətini dəyişdiyinə diqqət çəkir: "Ağ Ev ani bir siyasət dəyişikliyi ilə Türkiyənin Suriyanın şimalında hərbi əməliyyata başlamasına “yaşıl işıq” yandırdı. Bu, Vaşinqtonun uzun müddətdir müttəfiqi olan kürdləri tərk etməsi mənasını gəlir".
Türkiyənin Suriyanın şimalına ola biləcək əməliyyatı ilə bağlı Rusiyadan da açıqlama gəlib. Kremlin sözçüsü Dmitri Peskov Türkiyənin öz təhlükəsizliyini təmin etməyə yönəlmiş addımlarından xəbərdar olduqlarını və bunu qəbul etdiklərini deyib. Suriyanın ərazi və siyasi bütövlüyü şərtinə Türkiyənin bağlılığını Kremlin bildiyini vurğulayan Peskov daha sonra bildirib: "Suriya böhranının həllində və digər problemlərdə Suriyanın ərazi bütövlüyü başlanğıc nöqtəsidir. Ümidvarıq ki, türkiyəli həmkarlarımız bütün şərtləri, ilk növbədə bu şərti yerinə yetirəcəklər... Türkiyənin öz təhlükəsizliyini təmin etməyə yönəlmiş addımlarından xəbərdarıq və bunu qəbul edirik. Suriya torpaqlarına sığına biləcək terror ünsürlərinə qarşı çıxmağı nəzərdə tuturuq”.
Peskov ərazı bütövlüyü məsələsində Türkiyənin Rusiyanın mövqeyini dəstəklədiyini bildiklərini də vurğulayıb. Peskov Rusiyanın mövqeyinin “Suriyada qanunsuz hərbi mövcudluğu olan bütün xarici qüvvələrin geri çəkilməsi” olduğunu deyib. Kremlin sözçüsü gözlənilən əməliyyatla bağlı Putinlə Ərdoğan arasında hələlik heç bir müzakirənin olmadığını da sözlərinə əlavə edib.
Avropa Birliyindən isə Türkiyənin narahatlığının başadüşülən olduğu, ancaq Suriyadakı problemin hərbi yox, siyasi yolla həll edilə biləcəyi qeyd edilib.
Türkiyənin Xarici işlər naziri Mövlud Çavuşoğlu isə bildirib ki, Suriyanın şimalındakı yeni antiterror əməliyyatları bu ölkəyə sülh və sabitlik gətirmək üçündür: “Türkiyə, əvvəllər olduğu kimi, Suriyanın ərazi bütövlüyünü dəstəkləyir”.
Nazir əlavə edib ki, Türkiyə regionu terrorçulardan təmizləyəcək.
Onu da qeyd edək ki, Türkiyə Suriya ilə sərhədə əlavə qoşun və hərbi texnika toplayır. Müxalif Azad Suriya Ordusu da Türkiyənin planlaşdırılan hərbi əməliyyatına dəstək verəcək. Bir neçə gün əvvəl Türkiyə prezidenti türk qoşunlarının Fərat çayının şərqində hərbi əməliyyata başlamağa hazır olduğunu deyib. Ərdoğan Suriya sərhədini ABŞ-ın dəstəklədiyi kürd "özünümüdafiə qüvvələri"ndən təmizləmək və orada "təhlükəsizlik zonası" yaratmaq istəyir. Ankara hesab edir ki, həmin qüvvələr Türkəyədəki separatçılara kömək edir. Vaşinqton isə "özünümüdafiə qüvvələri"nə İŞİD-ə qarşı mübarizədə müttəfiq kimi yanaşır.
