19/10/2019 22:20
728 x 90

Əli Kərimlinin radikal dəstəsi Bakının mərkəzində icazə verilmiş aksiyanı da qarşıdurma səhnəsinə çevirmək istəyir

img

Məlum olduğu kimi, “Milli Şura” 8 oktyabr, saat 15:00-da Bakı Şəhər İcra Hakimiyyəti (BŞİH) qarşısında piket keçirəcək. Bir saata yaxın davam edəcək aksiyada “Milli Şura”nın 19 yanvar 2019-cu ildə keçirdiyi mitinqdən sonra ölkədə guya sərbəst toplaşmaq azadlığının məhdudlaşdırılmasına etiraz olunması nəzərdə tutulur.

Qeyd edək ki, təşkilatçılar meriyanın piketə razılıq verməsini müsbət addım kimi qiymətləndirsələr də, sosial şəbəkələrdə bu aksiya ilə bağlı bəzi qanunsuz çağırışlar da səslənir. Belə ki, qanunla piketdə ən çoxu 50 nəfər iştirak etməli olduğu halda, “Milli Şura”nın bəzi üzvləri tərəfindən “müşahidəçi statusunda” aksiyada minlərlə insanın iştirak edəcəyi haqda fikirlər bildirilir. Üstəlik, sosial şəbəkələr üzərindən insanları kütləvi halda BŞİH-nin qarşısına dəvət edənlər də var.

Nəzərə alsaq ki, Bakı Şəhər Baş Polis İdarəsi (BŞBPİ) aksiyaya icazə verildikdən dərhal sonra piket zamanı hər hansı qanunsuzluğa yol veriləcəyi halda müvafiq tədbir görüləcəyi ilə bağlı təşkilatçıları xəbərdar edib, o halda bu kimi çağırışlar anlaşılan deyil. AXCP sədri Əli Kərimlinin özü də bəyan edib ki, bu piketin məqsədi daha kütləvi, dinc etirazlara şərait yaratmaqdan ibarətdir: “Hökumətə də, xalqımıza da mesajımız aydın və birmənalıdır. Ölkədə xalqımızın konstitusiya ilə müəyyən olunmuş sərbəst toplaşmaq azadlığına nail olmaq üçün istənilən fədakarlığı edəcəyik, mitinq keçirmək hüququmuzdan vaz keçməyəcəyik”.

Əgər həqiqətən də bu piketin keçirilməsində məqsəd gələcəkdə daha kütləvi aksiyaların keçirilməsi hüququ əldə etməkdirsə, o zaman təxribat xarakterli çağırışlara nə ad vermək olar?

  • Vüqar Rəhimzadə: “Milli Şura” mitinq keçirməyə olan maneələrə etiraz edirsə, onda özü də gələcəkdə belə maneələrin yaranması üçün şərait yaratmamalıdır”

“İki Sahil” qəzetinin baş redaktoru Vüqar Rəhimzadə qəzetimizə açıqlamasında bildirdi ki, bununla müxalifətin iç üzü bir daha açılır: “Fikir verirsinizsə, icazə verməyəndə deyilər ki, hakimiyyət sərbəst toplaşma azadlığını məhdudlaşdırır. İcazə verəndə də belə təxribatlara əl atırlar. Əslində, mən şəhərin mərkəzində elə aksiyaların keçirilməsinin tərəfdarı deyiləm, hər zaman da buna qarşı çıxmışam. Bunların məqsədi tamamilə başqadır. İstəyirlər ki, əhalinin gur yerində asayişi pozsunlar, səs-küyə daha çox adam cəlb etsinlər. Bununla dinc sakinlərin, ətrafda yaşayanların hüquqları pozulur, onlara narahatlıq yaranır. Siz müxalifətin davranışlarına baxın. Piketin təşkilatçıları demir ki, bura 50 nəfərdən artıq adam gələ bilməz. Bu, qanunvericiliyin tələbidir. Niyə bunu tərəfdarlarına izah etmək istəmirlər? Əksinə, elektoratlarına çağırış edirlər ki, ora gəlsinlər, ancaq kənardan müşahidə etsinlər. Görürsünüzmü? Bu artıq siyasi cığallığın bir növüdür. Orada çoxlu sayda jurnalist olacaq. Onlar piketin gedişini canlı yayacaqlar. Yəni bunu internetdən də izləmək olar. Ancaq görürsünüz ki, təşkilatçılar tərəfdarlarını həmin yerdəki küçələrə çağırırlar. Deməli, məqsədləri tam başqadır. Ancaq bilsinlər ki, bütün təxribatların qarşısı qanunauyğun şəkildə alınacaq. Artıq təşkilatçılara bu barədə rəsmi xəbərdarlıq da olunub.  Bu məsələdə əsas məsuliyyət təşkilatçıların üzərinə düşür. Baş verəcək hər hansı təxribata görə məsuliyyəti onlar daşıyacaqlar. Əgər kimsə elektoratının çoxluğunu nümayiş etdirmək istəyirsə, buyursun, bunu icazəli mitinqlərdə etsin. Onda heç stadionu doldura bilmirlər. Dəfələrlə bunun şahidi olmuşuq. “Milli Şura” mitinq keçirməyə olan maneələrə etiraz edirsə, onda özü də gələcəkdə belə maneələrin yaranması üçün şərait yaratmamalıdır. Aksiyada baş verə biləcək hər hansı  təxribata görə bütün məsuliyyəti təşkilatçılar daşıyacaq”.

Məhəmmədəli QƏRİBLİ

Son xəbərlər